Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

RAGUAGLI LITTERARII

Coti

À a sparata di a guerra di 1939, i rivisti A Muvra è l’Annu corsu càdini.
In u mentri chì l’antisemita docteur Destouches alias Louis-Ferdinand Céline a si sciala, incarciarèghjani à Petru Rocca, Ghjacintu Yvia-Croce è Preti Dumenicu Carlotti dittu Martinu Appinzapalu.
Ci voli ad aspittà l’anni 50 par veda sbuccià in Bastia u 15 lugliu 1955 u prima numaru di U Muntese chì soffia in ogni paese, chì ricurdava a Tramuntana fresca e sana di Santu Casanova nata in 1896.
Sfiatatu, U Muntese dismetti d’aostu 1972. Ma in a so durata di vita assicura a so faccenda di mantinimentu prumuvendu, frà altri, a riapartura di l’Università di Corti. Petru Ciavatti, l’omu chì fù u capimaestru di l’impresa di U Muntese, morsi tant’anni fà in l’anunimatu di a bughjura.
Dopu à a guerra, a situazioni hè pèssima è ci manca una leva di scrittori. A rimigna trionfa. U Palazzu Naziunali di Corti hè un purcili è una stadda, in u veru sensu di i tèrmini. In càrciara ci sò i porchi, è sopra i sameri.

In u me scrittu In tempu d’oghji publicatu in u numaru 8 di sittembri 1972 di u misincu Terra Corsa direttu da Gisèle Poli, scrivu tandu sti paroli ch’e mantengu : “Pà tumbà una terra, pà dissuchjalla, pà turrà debuli è disfà un populu da un ghjornu à l’altru, pà scatruscià a biddezza di a natura è assuffucalla par bè, eccu a suluzioni a più faciuli è aduprata : svià a ghjuventù u più luntanu pussibuli, è falli sminticà a so lingua, a so Storia, i so usanzi, a so cultura. Cusì fendu a vita veni lestra dissapita è biota. È sta pratica a chjamu eiu u diciarbiddumu.”

A nostra campa fù d’avè un omu di valuta chì t’avia in gradu altu a cuscenza di un intellettuali primurosu di l’avvena di u so pòpulu. Si chjamava Farrandu Ettori, maestru di i studii corsi, maestru di pinsamentu è maestru di vita. In l’anni 70 desti à l’Università d’istati una diminsioni maiò. Duranti cinqui anni di fila, ogni sittimana, à costu di so stacca, Farrandu Ettori cuddava da Ecchisi à Parighji à spenda una ghjurnata da pieta a riapartura di l’Università di Corti.

Purtroppu à Farrandu Ettori u scantarani. Ùn fù nè prufissori nè prisidenti di l’Università di Corti. Oghji ùn ci hè mancu un catagnonu dundi si trova scrittu drentu u nomu di Farrandu Ettori.
O lu me amicu ! Vo chì fusti l’ùnicu è grandi intellettuali degnu di l’antichi naziunali vistuti di pilonu ùn ci hè nimu chì avissi u vosciu talentu annaturalatu, a voscia dignità, a voscia sapienza. I peghju sapientoni sò i sapientoni senza sapè chì voni scassà una pràtica di sèculi è sèculi di cultura di u pòpulu da sustituilli una gramàtica fatticcia. Di pettu à st’andatura derelitta tocca à fà fronti. Ma oramai Farrandu Ettori ùn ci hè più. Dormi cù l’ossa antinati in Turri.

Campa chì Farrandu Ettori ci lascesti l’esigenza di u so pinsamentu, u megliu di l’òpara di u so studiu. I so vistighi sò priziosi è prupizii da rivalutà comu si devi a Storia di Corsica. Altra strada ùn avemu. È, par appuntu, discurrendu cun eddu, duranti sti ghjurnati curtinesi, grevi di caldamona, dici : U Muntese hè sparitu, ci voli à fà calcosa. Cusì chì, l’ottu aostu 1973, Dumenicantone Geronimi ed eiu, staccendu i paroli, avemu elaburatu insemu sta frasa : “Un populu vivu teni a so lingua, hà u so rigiru, è assicura i so passi”. Èrani trovi cusì l’andatura è u tìtulu di a rivista : Rigiru. Cù l’aiutu di Luigi Muri è, màsimu, u sustegnu finanziariu di Niculaiu Ambrosini, l’impresa principieti.
Ci funu l’arvai pà truvà scrittori in àbitu à cuntribuì à l’òpara di Rigiru. Ci volsi un annu par assistà u prima nùmaru è stampallu. Cusì chì dicisa fù di prisintallu duranti l’Università d’istati di Corti. Ed eru incaricatu d’appruntà è di prisida a matinata “Scrittori è pueti d’oghji” di u sàbatu 3 aostu 1974. Fù l’occasioni di prisintà à Rigiru. À i participanti aghju mandatu capunanzi un fogliu cù sti paroli :
«In Corti, annu, hè ghjuvata a lingua corsa par lizzioni è discorsi à liveddu univirsitariu. Era a prima volta ch’edda accadìa, è intindiami ch’edda ùn fussi l’ultima.

Voi altri scrittori è pueti chì seti à capu di u pesu di a parola, avareti l’onori maiò d’aduprà a nostra lingua da u scagnu supranu di l’Alta Scola, fendu senta u vostru sintimu è dicendu ciò chè vo vuleti sprima in u mondu d’oghji.
À u publicu di ghjovani è d’anziani, di Corsi è di frusteri, in brama di roba corsa, sarà data a prova chì a nostra lingua hè viva è s’arricchisci, chì a nostra litteratura s’arradicheghja in a vita d’avali, cumpagni tremindui  di l’omu corsu d’oghji. Di quissa vi ringrazia u populu corsu sanu.»
À parlà funu : Marcellu Acquaviva (di l’Acquale di Niolu), Ghjuvan Ghjacumu Albertini, Rigolu Grimaldi, Francescu Mattei, Vincenzu Pasquale Medori, Roccu Multedo, Ghjuvan Teramu Rocchi.
I scrittori mori annosi ùn pudiani fà stu viaghju cù a sciappitana. È i scrittori ghjòvani èrani ancu à nascia. L’emu corsa brutta. Faci chì l’esciuta di Rigiru, cuprenda bianca è tìtulu neru, dava unu rispiru novu è spiranzosu à a tradizioni litteraria corsa. U listessu annu, preti Desanti publicheghja l’insemu di i Poesie giocose di vescu Paulu Matteu della Foata. L’annu nanzi di lugliu s’era onorata a mimoria di u vescu, in u so paesi d’Azilonu, cù Munsignori Anghjulu Giudicelli è l’associu Parlemu corsu prisidutu da Elia Pappadacci.

I vicendi di Rigiru sò stati parechji, ma hà fattu una sparghjera degna di u scrittu corsu. Da dopu hè principiata Bonanova chì s’affacca oramai ogni sei mesi. Sta publicazioni cerca d’allargassi à un’ arghja più stesa in u Tarraniu. Intriccià scritturi sfarenti, di lingui parechji hè ùtuli assai è cuntribuisci ad arricchì u campu di a litteratura corsa.

Da aprili 1991 ad aprili 1995, l’associu Embiu di Quinci hè editatu i 19 nùmari di a rivista A Pian’d’Avretu. Di ghjinnaghju 2004, A Pian’d’Avretu ripiglia fiatu è ci offri u nùmaru 20. È v’eccu ad Avali. Ci semu.
L’esciuta di una rivista hè una sfida è una scummissa. Hè ancu una pratesa maiò chì significheghja chì una squatra si ribradisci à prò di a lingua di u locu. Avali hà una mira propia, quidda d’indiassi in u lignamu di a lingua di u pòpulu è di a so cultura. Ùn si tratta solu di bugà à stradi fatti, bensì di mutà passu di modu à scopra virsuri scunnisciuti. È màsimu di lacà l’autori lìbaru di u so pinsamentu è di a so scrittura.
Par appuntu a campa hè d’avè, avali, autori ghjòvani chì pari ch’eddi avìssini vistigatu i pidati antichi. È chì sò in brama d’accirtà à modu ughjernu a so dicitura senza tema di qualunqua scunghjura. S’e avissi à dì calcosa in modu particulari, diciarìu vulinteri : scriviti com’edda vi pari. Patti è cundizioni di sèntavi in cunsunenti cù sta vechja ràdica funduta. Gudareti tandu cù empia balìa un’ andatura dilittarosa.

A cultura porghji una sustanza litteraria bundanziosa. Basta à cògliani i frutta sicondu ciò chì si brama. Sò i sèculi di vita strapazzata chì ani stazzunatu sta lingua è sta cultura. Avaremu a vargogna di tamanti patimenti ? Sta lingua è sta cultura sò un lignamu di risistenza. Risistenza à ciò chì desfa l’omu. Risistenza à ciò chì spatrona un pòpulu da u so locu. Risistenza à a disumanizazioni di u mondu. V’ècculu, à contu meiu, l’impegnu di a noscia litteratura in u so ambienti, quiddu di u terzu millenniu. Ùn si tratta manc’appena di piacia o di dispiacia. L’attitudina maestra hè quidda chì dà mutivu di spiranza. Avali. Ad alta voci.



 Rinatu Coti hè natu u 20 dicembri 1944 in Aiacciu. Funziunariu di l’Educazioni naziunali in irritirata, hè u prisidenti di l’associu Cismonte è Pumonti. Hà messu à scrivu u corsu da ghjovanu ghjovanu è da tandu ùn hà mai spustatu. A so opara, ricca di parechji genari, rumanzi, raconti, puisii, teatru, assaghju, hè a più empia è a più di primura in a storia di a noscia litteratura. In i so libri si leghji l’universu suciali ed antrupulogicu di a Corsica, mitafora di un mondu fattu d’iniquità è d’intullarenza dundi mai si sminteca u scrittori di piglià a pratesa di la so ghjenti. Trà l’opari soi, ammintaremu Intornu à l’essezza (assaghju, 1978), Una Spasimata (rumanzu, 1985), Par viaghju (puisia, 1985), Raconti (1986), U Maceddu (teatru, 1988), Aligria (puisia, 1989), U Seminariu (teatru, 1993), Babbu Guidu (teatru, 1996), In u me filu (cronachi, 2002).

Commentaires