Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

MINACCIA

Marceddu

Briona
Cundanni
Ghjastemi
Bacii
Tradimenti
Fùlmini di paroli
Nàscini dighjà è intàrrani u soli
U lumu appena natu…





A cuscenza nè si compra nè si vendi
A bacia a vedi u cecu
A senti u cioncu
È u celi dinò
U celi da sopra à no
Eddu chì vedi à tutti
È nimu ùn a si franca
Nimu ùn a si franca
Da u ghjùdici supranu
U celi
L’hà vista crescia
Eddu
A storia d’issu locu
Alzatu di u so lumu
U prima passu corsu
Chì l’hà aiutatu à mova eddu
U prima patriottu
È l’hà vistu cascà
Cascà
Traditu da i soii

È l’hà vistu tantu è più
In sta tarra di Corsica
Paesi insanguinati
Rossi da u sangui nostru
Casi brusgiati vivi in a brama di campà
Corpi truncati à pezzi è cotti à u soli buddenti
Òmini liati, impastughjati, è mandati in galera à morti
Casi bioti pà sempri
Ma banderi iè
Banderi dinò
È banderi tant’è più in i cimi di a spiranza

U vulè campà ùn cunnosci leghji
Nè òrdini
Nè pistìcciuli d’oru chì càscani da in sù

Ma oghji à chì prima ghjunghji prima macina

Ùn sò ancu compii di cascà i fùlmini accesi
In piazza di a storia in andà
Ùn sò ancu compii di cascà
I saetti infiarati
Bianchi com’è u spaventu
Ùn s’hè compiu di sèntali
I briona di u celi ingannatu
I muchi di mondu in dà
L’affiàcculi di a vita scanniddata
I fiari rossi di u vulè
Ùn sò ancu compii di cascà…


Saveriu Valentini hè natu u 20 di sittembri 1947 in Sarra di Farru. Pueta, militanti culturali indiatu in u buddori di u Riacquistu sittantescu, cù a so attività di tiatrinu in u filu di Grotowski, Artaud o Brech,  hà prumossu un versu fidu à a lingua corsa è criticu di a rialità isulana. Cufundatori di a cumpagnia « Teatru Paisanu » in 1973, hà scrittu, da par eddu o in parechji, U Fiatu, A Rimigna, A Cabbia, Innò, Prima tù, Soli di Ghjunghju
Uni beddi pochi di i soii i puemi sò stati stampati in Rigiru. Hà publicatu dinò una racolta puetica Corsica Nazioni (1975) è unu racontu, A Cunfina (1978).
Oghji, faci u ghjurnalistu-reporter di maghjini à France3Corsica.


Pour être informé des derniers articles, inscrivez vous :

Commentaires