Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

PULIFUNIE

Marceddu

pulifunie-M-blog.jpgIn Corsica più cà in altrò, publicà un libru in corsu, di sintimu naziunali, hè una prova. Ma quandu si torra à publicallu un’antra volta, hè tandu una vittoria. D’altrondi a ramenta sempri a voci antica : à chì a dura a vinci !
È Iviu Pasquali ùn hè unu chì tralascia. Bensì hè omu ribradutu chì ramenta chì u megliu modu di ùn mora di seti hè di dissitassi à l’acqua di a surghjenti tarrana. Masimu chì si tratta propiu quì di l’Acqui d’Orezza. Sò acqui quissi chì viaghjani senza bisognu qualunqua di riclama. Hè acqua schietta d’induli naturali.
Ci vurrà di stunassi chì da sta terra vechja com’è a petra verdi è nova com’è l’acqua matutina iscissi da a bocca di a ghjenti sta pulifunia unica in a so virsura ma chì hè un ribombu di l’altri pulifunii di u Maritarraniu è di u mondu sanu.
Sti canti sò l’espressioni chjara è fonda di a lingua di un populu chì sparghji una visioni di u mondu. Attraversa ad eddi ribomba a storia luttata di un populu in brama di vita degna.
Iviu dici parechji affari di primura. Pari à a prima ch’eddi fussini pinsamenti chì vani cù i so peda. Ma tocca à dilli è à ripetali. Oghji uni pochi voni chì a pulifunia divintesi « patrimoniu universali ». Purtroppu sapemu ciò chì succedi cù a robba intanata in i musei : basta à veda com’edd’hè trattatu u Fondu Quilici in u museu di Corti. È chì sustanza t’avarà a pulifunia spiccata da a lingua chì a porta è da u populu chì a canta ?
A pulifunia ùn hè pussessu particulari di certi cantanti, o cantadori o gruppi. Hè lighjittima sendu di tutti. Abbadata in stu sensu quì hè da veru un patrimoniu à ghjuvori di tutti. Ùn ci poni cumpeta i prufissori nemmu i spicialisti. Ognunu pò dì a soia, ma in ultima risorza a risposta spetta à u populu maestru di a so cultura.
U cantu ùn isbotta micca à u cumandu di a bacchetta. Bensì hè pà a forza parti un’emuzioni di u mumentu, a campa chì si manifisteghja d’essa insemu, di sparta u pani, u vinu, a gioia. Sta tradizioni à bocca hè da trent’anni ch’edda hè purtata nantu à a scena. Sbiutendusi i paesa, si perdi à pocu à pocu l’usu di a pulifunia da elementu di a vita cutidiana in campu sacru quant’è prufanu.
Ciò chì hè sacru devi firmà cù a so sacrezza. U cantu ghjisgiali teni a so putenza da a fedi chì movi a ghjenti chì faci ribumbà a volta sana. Sapemu chì sott’arca, suventi, dormini l’ossa di l’antenati.
È u cantu tramandatuci da i morti à i vivi hè cantu di vita da i morti è da i vivi, di prugenia in prugenia.
Cantà hè invenasi qual’è no semu, di dund’è no semu, è ciò chì no vulemu, insemu. Sapendu l’arimani campatu oghji cantaremu dumani. Camparà a pulifunia patti è cundizioni di firmà in bocca à u populu.

Rinatu Coti

Commentaires

IVIU PASQUALI 16/02/2011 15:05


Mille ringraziamenti fraterne pe stu scrittu chi mi tocca in fondu di u core . Bon'andatura a u vostru travagliu tamantu, sinceru , di qualita suprana.