MEMOIRE D'UN SACCAGE

Marceddu

26 mars 2008

Ducumintariu

Prima ani accesu u lumu à l’undicesimu pianu. Sò sciuti in tarrazza, u babbu, a mamma è i dui figlioli. À cazzaroli è cuchjaroni in mani, ani cumenciu à minà à minera. I colpi, accaspati, rigulari, sò falati fin’à i piazzi incagnati trà i torri di ‘ssu quartieru di pirifiria è, à u broncu di i palazzoni, s’hè accolta a ghjenti. Piatti, pignati, vasetti, testi, buttigli, ecculi quì l’armi di i manifistanti. Hè ingrussatu u rimori è s’hè spartu, da una pirifiaria à quidd’altra, in a calura affanosa di Buenos Aires. Erami di dicembri 2001. A folla, ingrussata, hà impachjatu stradi è carrughji. Era corsa a boci, nantu à i radii, nantu à l’internet : « tutti ind’è Cavallo !»
À u capu è dui ori, tutti s’erani mossi voltu a casa di u ministru di l’ecunumia di u guvernu di Fernando de la Rùa. A sera stessa, dimissiunò u ministru, è u prisidenti ni feci altr’è tantu u lindumani in a mani. Avia vintu u so puntu u prima cacerolazo, u bangagliacciu. A prima rivolta di un populu à u ruveddu. Una vechja baschera cunnisciuta bè è strabè da tutti i mammi di famiglia avia fattu sbarrulà l’omini pulitichi tutti quanti.

Fin di u 2001, l’Arghjintina si righjiri in una crisi ecunomica, suciali pulitica è murali inauditi. U populu, stufu di pata una classa pulitica currotta ed incapaci, accampa i carrughji di i più grossi cità di u paesi. Tutti si dumandani comu sarà chì in ‘ssu locu, pruvistu d’ogni benifatti di a natura, cù una pupulazioni struita, un paesi attu à nutrì 300 millioni d’abitanti, si patissi miseria nera ? Comu sarà chì in Arghjintina, ogni annu, 36 000 parsoni si ni murissini di fami ? Comu si farà à disciuplicà i caghjoni di ‘ssu cataclisimu suciali ?

Hè da risponda à tutti ‘ssi dumandi è parechji altri ch’eddu hà sceltu d’avvigna l’Arghjintina da cima à fondu, Fernando Solanas, camera in mani, da accoglia evidenzi, da scuntrà vittimi. Anzi tuttu, u filmu soiu cerca di fà tistimunianza di pettu à u smintecu.

Fù a dittatura l’iniziu di i guai pà l’Arghjintina. Ghjunti à u puteri par via di a forza armata, i militari ani da appradà u tarrurisimu di Statu da mantenasi. L’uppunanti di manca tutti quanti sò eleminati. Ma u tarrurisimu era ancu nicisariu da impona una pulitica ecunomica neolibarali cù u fini di ghjugna à a privatizazioni di i ricchezzi naziunali. Ad un tempu, a dittatura indibiteghja u paesi à più pudè : quand’eddi ghjugni à u puteri i militari, u debitu à l’esternu era di 6 000 milliardi di dollari, quand’eddi cadini, s’accima à più di 42 000 milliardi di dollari !

Vultata hè a dimucrazia, ma in un paesi arruvinatu. Eppuri, guverni ani da cuntinuà a pulitica di u debitu pirmanenti, una manera di sottumetta u paesi à l’intaressi frusteri, quiddi di i Stati Uniti, hè capita. Or dunqua hè prighjunera tandu l’Arghjintina di i scelti ecunomichi è finanziarii di u F.M.I. (Fondu Munetariu Internaziunali) chì à senta dì asistaria da sustena i paesi in bancarotta. Bisogna à sapè chì u F.M.I. mancu stampa hè una stituzioni neutra, inveci hè a raprisintazioni di l’intaressi di i setti paesi i più ricchi di u mondu è dunqua di l’impresi transnaziunali soii.

Hè stata ubbidienti l’Arghjintina, hà missu in pratica edda i ricetti libarali tutti quanti imposti da u F.M.I. : apartura senza limita di u marcatu internu à l’importi, impieghi publichi canciddati, parità di u peso cù u dollaru US stabilita da una leghji. Cusì fendu, hà datu a mani u F.M.I. à i grossi impresi stragneri chì si sò impiuti i stacchi à i costi di u populu arghjintinu acquistendusi binifizii sprapusitati in u cumerciu di u teleffonu, di l’acqua, di l’ernergia… Da tantu ch’edd’erani calati i ricetti di u Statu, ci hè vulsutu à chjoda scoli è spidali.
Chì criditi ch’edd’hè accarsu ? A ruina di l’ecunumia naziunali, a morti di i sirvizii publichi. Tandu era torru più caru pruducia in Arghjintina cà à fà arricà robba da l’America o l’Auropa. Si ghjugnia carri vacina d’altrò, assurdità assuluta, quandu si sà chì da sempri l’agricultura arghjintina hè stata a più valenti di u cuntinenti latinu.
A catastrofa ecunomica in Arghjintina risulta di ‘ssa sottumissioni. U disimpiecu hè crisciutu à i numari infiniti. In 2001, 60% di a pupulazioni di u paesi viviva in u musinu, veni à dì 14 millioni di parsoni. In 2001, cù a cumplicità di u F.M.I. , sò scappati da u paesi 29 000 millioni di dollari. Eppuri, c’erani l’impiigati di a stituzioni internaziunali, ma in i ministeri, ma in i banchi, da cuntrullà, virificà, spertizà. ‘Ssi soldi, erani quiddi di u populu arghjintinu, soldi accatamalzati longu una vita di sgubbera à spessu, ascosi in i banchi di u paesi.

U risultatu : 36 000 morti à l’annu, culpiti da un’agrissioni surniona, cutidiana, chì ferma inavvista. L’arma di distruzzioni massiccia di una sucità, l’agrissioni suciali, privi ch’eddi sò i citadini i più debuli di i so dritti suciali.

Culpevuli sò i guverni arghjintini, cù u F.M.I., i paesi chì ani incaricatu funziunarii di a stituzioni internaziunali di metta in opara quidda pulitica miciaghja. È semu à bonavia à listessu segnu in tutti quanti quidd’altri paesi di l’America Suttana.

Eccu li quì i lizziò di u filmu di Fernando Solanas. Oghji, da furà i sò ricchezzi à un paesi, un centu di funziunarii ubidienti è zilati ùn bastani, bisogna unu sistema stabilitu da un’urganizazioni internaziunali, cù l’impegnu di i grossi banchi è di i setti nazioni i più putenti di u mondu. A crisi in Arghjintina palesa dinò ch’edd’hè fiascatu u mitu neolibarali cusì parfettu di l’ordini è di u prugressu.
Ed ultima lizziò da tena à menti : di pettu à un populu unitu è dicisu, ùn poni cà inciampà a forza di u soldu è l’armi di i Stati.

Marceddu Jureczek

Mémoire d’un saccage, filmu (DVD) di Fernando Solanas (Blaq out collection, 2004)

Commentaires