Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

HOMMAGE À LA CATALOGNE

Marceddu


Tistimunianza









Hè divintatu
l’usu, oghji ghjornu, ma in i cuntrasti pulitichi, ma in i libri, ma in l’emissioni di a televisiò, di dichjarà chì u sucialisimu hè utupia, chì rializà ùn si pò, è saria priculosu ancu. Da scunvinciavi, abbadeti ghjà i provi sturicamenti faltati di i Russi, Chinesi, Cubani, Cureani è tanti altri. À ‘ssi puliticanti, à ‘ssi storichi, à ‘ssi ghjurnalisti, mai li vinarà in cori d’apradà a parola uguaglianza da qualificà u sucialisimu ; truvarani di di più ammaniti paroli o sprissioni tal’è quali sottumissioni, partitu unicu, ripressioni, pianificazioni è tir’è tocca.


Centu sacchi di raghjoni è mai ch’edda ni fussi centu anni andaddi contru nantu à ‘ssi punti. D’altrondi, macari i sucialisti d’oghji Francesi o altri ch’eddi fussini, vali à dì quiddi chì ni voni avè a cumparsa, l’ani lacata in dispartu una volta par bè quidda idea di fundaliziu di u sucialisimu. Tutti quanti, sfundatu u muru maladettu di Berlinu è caduta l’URSS, ani fattu soiu u versu novu di u vintunesimu seculu : oramai hè u capitalisimu à righjirà pà u sempri l’affari di l’umanità. Ch’edda fussi capita : mancu vogliu piglià quì i pratesi di l’URSS difunta è sipilita : terra addossu. Ci hà fattu capì quidda pessima è dulurosa spirienza chì puri arrimbati à idei ginirosi, si pudia sviluppà è pruspirà a bestia tutalitaria ; è ùn vi parlaraghju di Fidel Castro è di u stolu di i dittatori ammazza populi.

Vi vogliu parlà di antra manera d’avvicinà u sucialisimu, di a forza di ‘ssa idea mistica atta à fà mova populi è nazioni di u mondu, donni è omni, neri è bianchi, paisani è citadini : l’uguaglianza. U sucialisimu hè sonniu di una sucità di u sintimu è di a sulidarità umana. U sucialisimu, hè a sucità senza u riccu chì s’impanza spulmunendu u disgraziatu. U sucialisimu, hè una sucità dundi i techji ùn lesani più i famiti. Ci hè un locu in u mondu, ci hè una stonda in a storia, dundi s’hè guasgi tocca di ditu ‘ss’utupia di a sucità senza classi : in Ispagna, duranti a guerra civili. ‘Ssu mumentu raru è priziosu, u ci hà fattu cunnoscia George Orwell in u so libru Umaghju à a Catalonia. Impignatu in i milizii di u POUM (Partido Obrero de Unificación Marxista), u partitu anarchistu catalanu, Orwell hà cumbattutu nantu à u fronti di l’Aragona in 1937.

Avia scupartu in i transcè ch’edda asistia una cumunità chì tinia da veru una cuscenza di classa. Eppuri, pruletarii tutti ùn erani, ma vivivani trà eddi sionti a regula di a parità a più assuluta. In i transcè di l’Aragona, in u 37, ci si rispirava tandu com’è muscu di sucialisimu. Part’è più di i soliti pindenzi di a sucità ditta civilizata, accuzzera, paura di u patronu, disprezzu di u povaru…. s’erani svaniti. A divisioni in classi ùn asistia à bona via più. Tutti, da u ginirali à u suldatu, riciviani una paga listessa, magnavani robba listessa, vistiani panni listessi è si chjamavani da « camaratu » : galoni, salutu militaru, più. Ogni milizia era torra una dimucrazia è micca una ghjerachia. À i suldati li tuccava à ascultà l’ordini, mancu à dilla, ma mai da superiori à inferiori, da camaratu à camaratu inveci. Sicura, certi volti, accadia ancu ch’eddi a si discutissini uni pochi di minuti i suldati cù l’ufficiali prima d’ubidì. Ma u fattu si stà ch’eddi tensini u colpu di pettu à i suldati di Franco. Cusì ebbi l’asgiu u guvernu ripublicanu di custituì una armata rigulari. Era una cumunità chì avia mandatu via ogni spiritu parsunali, puri in a caristia, ma senza privileghji è senza servi.

A vi diciaraghju comu s’hè sconcia a storia di i milizii anarchisti di a Catalogna ? L’ani sterpi i cumunisti. Dopu à avè luttatu contr’à i forzi fasciti, dopu à avè sunniatu à a rivuluzioni, ani cunnisciutu i carciari, i turturi, i prucessi è i fossi di i staliniani. Di ghjugnu 1937, hè pruibitu u POUM, venini arristati i capipartiti è, à buleghji à parechji, Andrès Nin hè ammazzatu da l’assassini à ordini è cumandi di u NKVD (i sirvizii sicreti russi). In u frattempu, veni torru eddu à a penta à cecca da a stampa staliniana chì u si dipigni com’è spia di Franco è di Hitler, dendu ribombu à l’accusi tunitini è miciaghji di i prucessi di Mosca. Ricercu anch’eddu da a pulizza staliniana, a corri brutta Orwell. Cù a moglia, a li facini à riugna a Francia franchendu i Pirenei.

Al di là di u POUM, i staliniani battini da acciaccà l’anarchisti, a prima forza di a mossa suciali spagnola, è tuttu quantu u prucessu rivuluziunariu : «quand le pouvoir a commencé à échapper aux anarchistes pour être pris en main par les communistes et les socialistes de droite, le gouvernement a pu se remettre en selle, la bourgeoisie a relevé la tête et l’on a vu reparaître, pratiquement inchangée, la vieille division de la société entre riches et pauvres. Depuis, toutes les décisions prises (…) ont tendu à défaire ce qui avait été fait dans les premiers mois de la révolution». À u vultà in Ingliterra, principia Orwell a scriva Homage to Catalonia. Ma tandu, veni missu à u ruveddu da a manca inglesa. Cù u mutivu di l’antifascisimu, a manca britanica accunsenta à a pulitica di Fronti pupulari pensa è imposta da Staline è u Komintern è dunqua à l’ammazzera di i spiranzi rivuluziunarii spagnoli. Nanzi i burghesi cà l’anarchisti. Funi i fascisti ad avella vinta.

Hommage à la Catalogne, George Orwell, 10-18, 293 p.


Commentaires