À a prussima, o Natà….

Marceddu

12 avr. 2008

Vesta nera è capu drittu
si ne và u prufessore

Cù la so ghitarra in manu è tante foglie spaperse
Forza hè l’ultimu messaghju, semu ghjunti à l’altare
Mancarà quì u maestru, à u cantà d’altre messe

Trà lu bughju è la lumera ùn si pò fà l’accunsentu
Solu hè bonu lu caminu ch’ùn trema sott’à lu ventu

Avia sceltu l’andatura di quelli chì sanu luttà
In pett’à la malvuluntà à l’orgogliu è la malavia
Oghje di punta à quella teppa ci chjama l’omu à marchjà
Nant’à u filu cusì strettu di a cuscenza fatta spia

Trà vie torte è strada santa ùn ci hè ch’una croce à purtà
Per diventà volpe umbrosa ùn ci hè ch’un passu à francà

Vultendusi una volta li scappa una sccaccanata
L’ochju ardente è maliziosu a ci hà fattu a macagna
Ùn dite ch’ell’hè tradita quessa ùn hè mai stata
Era un omu maestru nobile cum’è l’altagna

Trà lu ghjornu è la notte ùn si pò sceglie u chjassu
À l’aldilà tant’altre lotte senteranu u so passu

À l’usciu d’un altru mondu pichja l’omu verità
À u son’ d’una paghjella Ghjesù Cristu aspettarà
«O Ghjesù chì ghjè issu frombu u sentia da quallà»
«Pinsava chì per isse loche m’avia da ripusà»

«Ghjusta à puntu o prufessò ci hè bisogn’à imparà»
«Quand’elli cantanu falsi hè longa l’eternità»
«Ci saria lu riposu senza tanta falsità»
«Anch’eiu la vogliu fanne imparami, o Natà !»

Petru Canon hè un ghjovanu pueta guagnesu di 28 anni è un cantarinu appassiunatu. I so puisii sò stati aghjà publicati in Avali, U Taravu, Le Journal de la Corse.

Commentaires