Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

TRÈ PADDI IN U SPINU…

Marceddu






In prima sera,
S’infiara u celi
Sfriscia u ventu
Straccia i nivuli di sangui
A luna torra ceca
U carrughju si ni stà bassu
U caffè hè chetu.



Ci vurrà à turrà i carreghi è à puliscia i toli. Ma aghjumpatu da a ghjurnata, l’omu spigni u lumu, sarra a porta, metti u lucchettu, faci falà u tindonu di u farru.

Rimori, rimori in u neru pagnu. L’abissu burbuddeghja.

U capu ingarmigliatu, l’omu si ni volta in casa, culà l’aspettani i soi.

Spara un’ accendita, veni à minallu, una volta è po dui, è po trè.

Si ni casca, si strascina, prova à intuppà a notti in unu raghju.
Patansceghja è da quiddi tafoni, sorghji a so vita, una piena.

Trè paddi in u spinu
L’ani tombu com’è un ghjacaru
Si n’hè mortu in carrughju, senza chì u vidissi nimu, senza chì nimu u sintissi.



Culà,
u vintuleddu di a so boci ùn azzicarà più a criatura
Culà,
i so labri di zuccaru ùn basgiarani più u so pengu
Culà,
piegni una criatura, si strappa un cori, s'ammanta lu mondu.

Qual’ sarà à vindicallu ?



Marceddu Jureczek t’hà 34 anni. Hè natu in Aiacciu è ci insegna u corsu in liceu prufiziunali. Prisidenti di l’associu Matina Latina, hè u capiridattori di a rivista Avali è sicritariu di ridazzioni di u misincu U Taravu. Parechji di i soi i scritti, part’è più raconti, sò stati publicati in i rivisti mintuvati, in Bona Nova è le Journal de la Corse. U so prima rumanzu Ghjuventù Ghjuventù... hà ricivutu u premiu 2007 di u libru corsu cuncessu da a Cullittività Tarrituriali di Corsica. U so sicondu libru, U Vantu di a Puvartà, un assaghju, hè sciutu di pocu.

Commentaires