Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

ALTU CANTU

Marceddu





Sò a lingua straniera
Di a me bocca aparta
A me bocca chì ridi
A me bocca chì canta è chì pienghji
Sò a lingua imprighjunata
Chì voli campà fora
Apriti i balcona
Bugheti porti è sulaghja
Sò lingua paisana
Antica cugina di l’acqua è di a tarra
Isulana
Sò lingua chì và caminendu
Par i stradi d’aprili
Purtendu à u me passu un cantu chjaru
Un altu cantu fieru
Stu cantu si chjama lamentu
Stu lamentu hè a me stodia
Nova





Nurbertu PAGANELLI, hè unu di quiddi pueti nati in i buddori di a Corsica di u 70°, in cori à u Riacquistu culturali. Omu di a parola ghjusta è di u pinsamentu assinnatu, l’amori di a so terra si leghji in a scrittura soia, ma senza ch’eddu lachi in disparti unu sguardu acutu è esigenti. Hà publicatu Invistita (2007), una racolta puetica bislingua.



Commentaires