Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

I CENNARI DI UN PUETA

Marceddu




   


    U 2 nuvembri 1975, vicinu à Roma, murìa Pier Paolo Pasolini, uccisu da un ghjòvanu malvaghju. Puri oghji mancu si sani i cundizioni esatti di sta disgrazia.

    I talenti artìstichi di Pasolini èrani numarosi. Amava a parola ditta, scritta, cantata, l’imàghjina di u cìnema, di u teatru. A parola è l’imàghjina stessa di a vita prufonda di i paisani in i cuntrati più sversi, di a puesia colta in bocca à u pòpulu, i guai di a ghjenti misiriosa.

    Mi ferma impressa sta frasa di soiu : «La morte non è nel non poter comùnicare, ma nel non poter più essere compresi». A capiscirà ognunu ciò chì stu pinsamentu significheghja. È mi pari à mè ch’eddu fussi ghjustu oghji più di mai. Duranti a so vita Pasolini hà patutu di ùn essa capitu, d’essa mal vulsutu par via di ciò ch’eddu era, di ciò ch’eddu dicìa, di ciò ch’eddu facìa. Sarà chì u nostru mondu ùn hè dispostu à suppurtà a dinuncia di l’ipucrisìa, di a bucìa, di a viltà.

    A virità di soiu era un’ eresìa pà l’èpuca soia. Ed hè quissa unu scàndalu intullarèvuli di cuntrastà u pareri stabilitu da tutti i dogma riligiosi, pulìtichi, murali ; di criticà i rapporti suciali fundati nantu à l’inghjustizia ; di dinuncià a duminazioni di i ricchi nantu à i pòvari ; di ricusà u disprezzu di i burghesi di pettu à u pòpulu. A soia l’andatura era propiu quidda di «a scrianza pulìtica» custanti.

    Parlà, pinsà, dì, scriva, Pasolini, cù i so risorzi d’omu, fù un omu chì capiscìa l’ostàculi chì impidìscini chì a chjarura cannessi l’oscurità. I so artìculi, i so libra, i so òpari di teatru o di cìnema, i cunsacrò à issu scopu guasi ùnicu è priziosu : rivindicà a Parola chì impeda l’omu ad umanizà u mondu è à divintà umanu, à rombu di vulintà ribraduta è di sforzi cuscenti. Si sà, purtroppu, chì l’omu ùn nasci micca umanu, diventa umanu cù l’aducazioni, a raghjoni, u pinsamentu, l’azzioni.

    Intellettuali fù Pasolini cù tutta a piinezza di u sensu di stu tèrminu. Impignatu ogni ghjornu in a lotta à prò di l’emancipazioni di l’omu, hà cuntribuitu, in larga misura, à fà capì l’impurtanza di u rituali culturali in una sucetà primurosa di pirmetta ad ogni indivìduu di sceglia a megliu strada da realizassi è di dispona di i mezi di tirà à u segnu. In «Bestia da stile», dici Jan unu di i so prutagunisti :
«Io sono ancora uno
che per puro amore estetico
e sensualità incestuosa
considera la morte di un individuo
intollerabile, incomprensibile e identica
alla morte di tutta l’umanità.»

    Par essa omu, l’omu mai si devi lacà spruvveda di a so suveranezza. Nemmancu devi accittà l’imperu di a tecnologìa chì pugna d’infilfarrà l’universu medienti reti, nodi, stradi virtuali. Nemmenu devi accunsenta à l’invasioni di l’ideologii chì sò a perversioni imaginaria di l’idei.

    L’idei sò l’idei ; hè l’omu à falli cuncreti. A dicìa sèculi fà Parmenidu, ciò chì hè, hè, è ciò chì ùn hè, ùn hè. Da l’essa à u non essa, ùn ci hè leia alcuna. L’ùnica cosa chì si pudissi abbadà hè u cuncretu di a vita. In i cènnari di un pueta sfiaruleghja a brusta.




Rinatu Coti hè natu u 20 dicembri 1944 in Aiacciu. Funziunariu di l’Educazioni naziunali in irritirata, hè u prisidenti di l’associu Cismonte è Pumonti. Hà messu à scrivu u corsu da ghjovanu ghjovanu è da tandu ùn hà mai spustatu. A so opara, ricca di parechji genari, rumanzi, raconti, puisii, teatru, assaghju, hè a più empia è a più di primura in a storia di a noscia litteratura. In i so libri si leghji l’universu suciali ed antrupulogicu di a Corsica, mitafora di un mondu fattu d’iniquità è d’intullarenza dundi mai si sminteca u scrittori di piglià a pratesa di la so ghjenti. Trà l’opari soi, ammintaremu Intornu à l’essezza (assaghju, 1978), Una Spasimata (rumanzu, 1985), Par viaghju (puisia, 1985), Raconti (1986), U Maceddu (teatru, 1988), Aligria (puisia, 1989), U Seminariu (teatru, 1993), Babbu Guidu (teatru, 1996), In u me filu (cronachi, 2002).


Pour être informé des derniers articles, inscrivez vous :

Commentaires