Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

L'INFERNU TARRANU

Marceddu






Sò solu lu frateddu
Di i patriotti ghjusti
Di i vechji è di i ziteddi
Di a natura è di a brusta
Di tutti l’inghjuliati
Sbagliati da l’umani
Po di a ghjenti straziata
Da u castigu furdanu

Eiu sò lu frateddu
Di i criaturi santi
Nati in fosca matina
Chjamendu l’universu
Vogliu parlà di quiddi
Trallasciati par cantu
O quiddi chì ani persu
È i mammi mai chjamatu

Eiu sò lu frateddu
Di u tintu paisanu
Chì si strappa u ciarbeddu
D’invernu fin’à branu
Chì ùn vinci chè sudori
È si vasta u sangui
Sapendu incù ‘ss’amori
Chì a so vita s’infanga

Eiu sò lu frateddu
Di l’umanu interu
Chì hà coltu lu mali
Di l’infernu tarranu
Po eiu, pà u mondu sanu
Vogliu scruccià l’inghjustizia
Ma mi dumandu in vanu
Dundi hè ghjustizia

Chì dapoi ch’e sò natu
Aghju vistu cristiani
Perda sensu è fiatu
Pà megliu lindumani
Hè sempri u disgraziatu
Chì casca l’armi in mani
Cresci u campu sacratu
È prufitta lu falzu

Tutti li patriotti
A volini fà intesa
Pà dà ghjornu à ‘ssa notti
Campà in un’antra stesa
Eiu difendu a raghjoni
È s’e facciu uffesa
Sbandiscu i pratinzioni
Di u lacciu chì hè tesu

Pà essa lu frateddu
Di i ghjenti senza mani
Di tutti i puvareddi
Di quì è di luntanu
Pà essa lu frateddu
Di a ghjenti senza pani
Di tutti l’urfaneddi
Di l’infernu tarranu



Natali Valli, ghitarristu è cantadori attalintatu di u purtivichjacciu. Di lugliu 1979, cù parechji, s’impegna in u gruppu cantarinu SURGHJENTI, è si dà di manip à u Riacquistu culturali in anda tandu. Da 1989 in quà, in cerca di un versu intimu di di più, arrighjistreghja Natali Valli trè dischi :  Di qui e d'altrò (1990), U Viculu (1998) è Brasgi (2007). A musica soia trapassa i culturi è si campa fendu ch’eddi si mischiessini blues, jazz, bossa nova, folk… è lingua nustrali. Altr’è tandu i so testi, dundi si leghji sempri a primura di l’umanu, in cerca di dignità in un mondu duru troppu, crudeli ancu.




Commentaires