Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

PUTERI È BUCÌA

Marceddu



    Quandu un certu niveddu di disugualità esisti in un paesi è senza presa di cuscenza – com’è annu pà l’alizzioni prisidinziali, chì mori pòvari ani vutatu à dritta –, opa asaminà l’influenza ditarminanti di i media in a fabricazioni di l’upinioni.

    Cusì chì gallizzeghja una certa rialità. À l’uccasioni di dibàttiti di televisiò par un dettu, dundi, francu u cuntinutu, a mùsica di i paroli, l’attitùdina, u stili di u prisintadori, cusì diffarenti quand’eddu s’addrizza à un uparaghju o à un enarca, fàcini propiu viva à nudu, smascarata, com’è incarnalata, una viulenza latenti chì voli essa fighjulata da lotta di classi – cuncettu propiu vitèvuli. Par asempiu, duranti una trasmissioni, un sindicalista, solu contr’à tutti, era cunfruntatu à una prisintatrici pràtica di i sirati pulìtichi-mundani.

    Hè l’èpica di i grandi media chì cortucircuìtani u suffraghju univirsali, inièttani u virus nanzi di piglià a timpiratura, u pussessu di i mezi di pruduzzioni di l’upinioni da una classa duminanti hè una sfida inèdita à a dimucrazìa. Moltu più insidiosa chì a nuzioni stessa di «classa», mal difinitoghju, ma bè frasturnanti, hè oghji l’ogettu di tamantu silenziu, d’una scunniscenza cù i so modi propii di pruduzzioni.

    U prima di sti modi hè quiddu di u paganacciu : immigratu, stranieru, ghjudeiu, ecc., chì a prisenza caghjunaristi ogni disgrazia di u mondu.

    U sicondu cunsisti à metta in risaltu, da arnesi di cumprensioni, uppusizioni altri chè l’antagunìsimi suciali. I cunflitti trà nazioni par un dettu, a lotta di i generazioni o a guerra di i sessi.

    Ci hè un terzu modu da pruducia scunniscenza : stoglia l’attinzioni, facizia clàssica di l’illusionisti. U più visìbuli hè a primura pà i “faits divers” è u sport in u muntaghju ridazziunali di i «ghjurnali d’infurmazioni». U più ritrosu, a parsunalizzazioni spulitizanti di u pulìticu. U più suttili : a turbidità. I raporti di duminazioni, sò tantu intricciati, ch’eddi poni fà campà i lotti pulìtichi sott’à a forma di una rilazioni ghjenitori/ziteddu, masciu/fèmina. Chì sti diffarenzi sò in freccia scontri, beddu nanzi à l’intruta in u campu sociuecunòmicu ch’eddi cuntinuvarani da dopu à soprimprima.

    L’altru si prisenta cusì com’è un insemu di carattarìstichi, di parcizzioni simultània è affettivi, dundi si sguaglia a diminsioni suciali. Eppo dunqua scòndasi. Or a bucìa dà intimizioni è accumpagna u puteri com’è l’ombra u corpu, bucìa chì pirmetti à i putenti di dassi una pratesa lighjittimità. È di sta manera d’imprissiunà, d’imbambulì. Ùn ci hè sirvitù vulintaria, solu ci sò angarii intrattinuti.

    Di stu puntu di vista, in una sucità spittàculu-mercia chì insegna “l’arti di vèndasi” è u cultu pazzu di a valutazioni sciffrata, i grandi media sò l’arma assuluta. L’intensità emuziunali d’ogni dibàttitu, l’impattu di i visi, di i sguardi, dani à u bluff, quali voglia sìa, ingannu publicitariu o pulìticu, una spavintosa efficacità.
Abbadendu l’apparsa di un gutupponu di visi d’òmini è donni cunsidarati fin’ora da prugressisti è chì fàcini parti stu pocu di un guvernu riazziunariu, si pensa à l’intròitu di i «Guignols de l’info» : una faccia strana, cent’è òndici ochji chì s’ipertrofìzzani, si dilàtani, si tòrcini, l’insemu sbalancendu da ogni cantu, à a spiccera, prima di spizzulassi.

    Hè un malasgiu singulari di fattu chì pravoca sta cullaburazioni. Chì u visu di st’òmini, di sti donni, si parcipisci com’è un accordu musicali. Un accordu dulurosu. Una dissunanza chì risulvaristi, in apparenza, l’accordu di tunalità. Cadenza parfetta. Armunìa. «A viditi, anziani prugrissisti, una donna nera (com’è in i Stati Uniti), poni essa in u campu di i cunsirvatori-riazziunarii. Ch’edda basti di ròmpaci i stacchi cù i clivaghji tricaticci !» È tira avanti.

    Caghjoni a griglia tiòrica d’intarpritazioni chì li pirmetti da veru di smuntà i dispusitivi truccati chì a manca pari oghji invertebrata. Ciò chì s’aspetta d’edda : un’anàlisi pricisa, rigurosa, smascarendu a rialità vilata prupòstuci. Com’è ancu ùn ci vurristi chì st’anàlisi ùn fussi solu pulìtica. Nè solu ecunòmica. Chì a sfida, fatta fini, hè filosòfica. Dicisiva. Una scelta di vita.





Rinatu Coti hè natu u 20 dicembri 1944 in Aiacciu. Funziunariu di l’Educazioni naziunali in irritirata, hè u prisidenti di l’associu Cismonte è Pumonti. Hà messu à scrivu u corsu da ghjovanu ghjovanu è da tandu ùn hà mai spustatu. A so opara, ricca di parechji genari, rumanzi, raconti, puisii, teatru, assaghju, hè a più empia è a più di primura in a storia di a noscia litteratura. In i so libri si leghji l’universu suciali ed antrupulogicu di a Corsica, mitafora di un mondu fattu d’iniquità è d’intullarenza dundi mai si sminteca u scrittori di piglià a pratesa di la so ghjenti. Trà l’opari soi, ammintaremu Intornu à l’essezza (assaghju, 1978), Una Spasimata (rumanzu, 1985), Par viaghju (puisia, 1985), Raconti (1986), U Maceddu (teatru, 1988), Aligria (puisia, 1989), U Seminariu (teatru, 1993), Babbu Guidu (teatru, 1996), In u me filu (cronachi, 2002).


Commentaires