Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

U SCRIVA IMPEGNA

marceddu


    A faccenda di a prosa è quidda di a puisia sò sfarenti. A prosa hè fatta pà i loca frusti, in i piaghji. A puisia, inveci, hà u so sidili in l’altura. Ramintèmuci u monti d’Aliconu. A prosa porta cun edda a significazioni, a spiigazioni di u mondu. A puisia, inveci, veni innanzi à a significazioni, hè sustanza. È ci n’avvidimu chì, circhendu di difinì cù paroli appena lambiccati, prosa è puisia, omu ni veni, naturalmenti, à l’affari di u scriva.

    A prima volta chì a quistioni Pourquoi écrivez-vous ? fù posta, in 1919, da i Surréalistes ad uni pochi di scrittori, di i tanti risposti publicati da a rivista Littérature, veni quissa à l’accortu di Cendrars : Parce que. Et Sartre, in u famosu assaghju Qu’est-ce que la littérature ? stampatu in 1947, studieghja trè quistioni di primura : Chì hè scriva ?, Parchì scriva ? è Da quali si scrivi ?
Abbademu in un trattu i trè quistioni :

1 – Chì hè scriva ?

    Hè scopra situazioni, à sè stessu è à l’altri, propiu da cambialli. Di fatti, attraversu à situazioni in parechji, si tratta di a situazioni chì c’intaressa è ci arriguarda : quidda di l’omu, micca u so fini, ma a so storia.
Com’è l’ammintavu, a prosa s’arregna i segni : dici, ritratta, si servi di i paroli. Intreccia è sciogli l’idei. A prosa adopra ciò chì hè dighjà adupratu da l’usu. Dici comu si dici.

    A puisia, inveci, ùn faci micca u ritrattu di l’omu, ma ni crea u mitu. A puisia servi a lingua, fèndula nova ogni volta è senza mai dismetta. A puisia sò l’imàghjini chì viàghjani, nati da i sìmbuli sinamenti à u sonniu.
Prosa è puisia, tremindui sò quì, in manu à no, da ramintacci chì l’omu ùn hè micca parfettu, ma hè parfittìbuli.

2 – Parchì scriva ?

    Medienti i so raconti è i so puemi, l’autori riacquista l’interezza di l’essa è a prisenta, tali è quali eddu l’hà prudutta à a libartà di u lettori.
Par via chì hè, sicondu mè, propiu quissu u fini di l’arti : riacquistà stu mondu, chì ognunu l’abbadessi tali à com’eddu hè, ma com’è ch’eddu s’arradichessi in a libartà umana.
L’autori, in a so criazioni, riacquista a tutalità di l’essa à l’omu è accinghji l’umanità à l’universu.
Hè sputicamenti aduprèndusi à sta faccenda chì l’autori s’affizziuneghja à u lettori. Sendu rispettu di a libartà, a prosa vera hè cumpagna di u solu sistema pulìticu chì si valissi d’essa gosu è difesu : a dimucrazia.
Faci chì, comu voglia fussi, u scriva impegna.

3 – Da quali si scrivi ?

    L’autori riacquista u so mondu, chì hè variu è cuncretu, cù a so grivezza, a so opacità, i mendi, i virtù, i faccendi, i mancanzi. Un mondu affaccindatu è mancamintosu.
Dunqua fighjula a sucetà comu edda viaghja, muta è diventa, sempri in u solcu di cunsuetùdina.
Si scrivi da u lettori, puri ùn cunniscènduli u visu. Micca da agì nantu ad eddu. L’autori chjama. Chjama u lettori cù i so paroli. Ùn l’ublicheghja.
Ci vurria, di sicuru, à suvità sti trè quistioni più à l’affini.

    Guasgi vinti anni fà, u ghjurnali Libération feci un’ inchiesta intarrughendu 400 scrittori in u mondu, cù sta quistioni ùnica : Pourquoi écrivez-vous ? A listessa quistioni chì fù posta in 1919. I risposti funu diffarenti quant’è l’autori chì rispòsini. È mi pari chì, più di mai, hè bastèvuli a risposta di Cendrars : Parce que.

    Sarà chì a scrittura, sendu un impegnu, ùn ci pò essa risposta, almancu in vita duranti. A dici a tradizioni cù stu bellìssimu ghjudiziu : “Ùn ghjudicà a to vita in tal òpara finita”. Ma hè sicura chì quandu l’òpara di a vita hè compia, tandu ùn ci semu più par ghjudicalla.

    À u veru fondu hè chì l’omu, fintantu à campà, hè una parsona chì s’intarrugheghja, parsona intesa in u sensu carnali è spirituali di u tèrminu. È, parfinchì l’omu s’intarrugheghja, hè vivu, ma risposta sicura è assuluta li ni veni in palma di mani quant’è à u preti senza ufferta.
I ziteddi a sani bè chì pònini sempri sta quistioni : Parchì ? è sì vo rispunditi, ani da cuntinivà chirendu : È parchì ?

    A sola diffarenza hè chì u scrittori, ziteddu vinendu in anni, dici com’è Cendrars : Parchì…, senza intarrugazioni, è neancu affirmazioni. Ùn semu micca no à essa maestri di a tradizioni, bensì hè a tradizioni a nostra maestra. Scrivìa, un sèculu fà, u filòsofu spagnolu Miguel de Unamuno, chì a tradizioni hè a sustanza di a Storia. Hè una frasa sìmplicia com’è a filetta, com’è u sangui, com’è u pani. Frasa chì vali un mondu è chì c’impeda à pinsà, ad amà. Si tratta, micca di u vichjumu, ma di una tradizioni chì s’arradicheghja in u fondu d’oghji. Chì diffarenza ci hè da un Corsu, centu anni fà, achjappatu ad una fera, ad unu chì s’avvia avali annantu à una motò, quandu u còdici murali ferma sìmuli ? a diffarenza hè talmenti tènua è insignificanti chì, accantu, una ragnata pari un cavu. È ancu assai chì, osidinnò, èrami una straccia in bocca à u ventu.

    U scriva ùn hè nè prapaganda nè divirtimentu, hè altrimenti muvimentu di vita, chì sà, quant’è chì sà, chì sì no ùn vulemu turrà lumachi, ùn ci pò essa vita senza mimoria.
Ci pò essa un mondu senza litteratura. Ma ci pò essa peghju disgrazia ed hè chì u mondu si pò ancu megliu passà di l’omu. Hè quissu u mònitu di a scrittura.

    In a so mudesta vistura, u pueta indizialeghja a sarra cimaghja di u spìritu umanu. È, luntanu luntanu, vedi lucia segni di focu. È issi segni di focu sò l’amori in a bughjura.




Rinatu Coti hè natu u 20 dicembri 1944 in Aiacciu. Funziunariu di l’Educazioni naziunali in irritirata, hè u prisidenti di l’associu Cismonte è Pumonti. Hà messu à scrivu u corsu da ghjovanu ghjovanu è da tandu ùn hà mai spustatu. A so opara, ricca di parechji genari, rumanzi, raconti, puisii, teatru, assaghju, hè a più empia è a più di primura in a storia di a noscia litteratura. In i so libri si leghji l’universu suciali ed antrupulogicu di a Corsica, mitafora di un mondu fattu d’iniquità è d’intullarenza dundi mai si sminteca u scrittori di piglià a pratesa di la so ghjenti. Trà l’opari soi, ammintaremu Intornu à l’essezza (assaghju, 1978), Una Spasimata (rumanzu, 1985), Par viaghju (puisia, 1985), Raconti (1986), U Maceddu (teatru, 1988), Aligria (puisia, 1989), U Seminariu (teatru, 1993), Babbu Guidu (teatru, 1996), In u me filu (cronachi, 2002).
Pour être informé des derniers articles, inscrivez vous :

Commentaires