Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

I VASCELLI SUMERINI

marceddu


Quì da mezu à lu pratale sbuccionu li so caselli
Per dà l’ochju à la turchina aprendu li so purtelli
Affacati numarosi cum’è bande di zitelli
S’anu presu rocch’è mare arrubati i to ghjuvelli
Loche spartute à bon pattu viutati tanti cappelli

In poppa lu portafogliu, i vascelli sumerini
Alliscianu l’orlu santu ingrugnati cum’è zini
Piantanu e so bandere nu li tarreni cursini
È Stuppendu à la to faccia li so canti pulitrini
Prestu viderai o corsu li so capi pecurini

Tante piaghje inserpulite pienghjeranu lu passatu
Quand’era tempu à lu stantu, à u pane straziatu
Vulteranu li ricordi d’un vechjacciu spenseratu
Chì a miseria accitava d’un meravigliosu sguardu
Oghje hè venduta a so terra da un corsu gran’ bastardu

U pinzutu riccu è grassu diventa lu to patrone
Pocu li ghjova a to storia li basta lu to lucone
Trà dui roti rughjosi senterà le to canzone
Dopu intesu lu to versu si tuccherà u lardone
Per vantà à le furagne l’esutiche tradizione
 
Prestu serà a vendetta affaccata à la to porta
Cirnu ti manderà fora prestu fattu à l’accorta
Ùn parlu d’insanguinime nemmancu di malamorte
Ma s’è tù stendi l’arechje sia attentu chì a notte
U passu d ‘un omu solu nu le strade patriotte
Ferà tremà lu circondu unurendu tante lotte………



Petru Canon hè un ghjovanu pueta guagnesu di 28 anni è un cantarinu appassiunatu. I so puisii sò stati aghjà publicati in Avali, U Taravu, Le Journal de la Corse.


Commentaires