Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

LETTERA À CORSICA

Marceddu



Ùn abbia tù penseri sarà a to sulenna scena
O quantu vulerie disciuplicà le e sazie ore
Di a m’angoscia mea ne sò prontu à more
À quellu praticatu l’esiliu ùn si tira catena

Aiò fà mi issu sullevu po metti tù à scrive
Senza artifiziu mattu conta mi lu mo paese
In l’attesa di l’abbracciu teni e mani tese
Quandu unu seremu inseme in ste dolce rive

Tanti è tanti cuntrasti di rima corsa mai
Ùn ci la facciu eo à inizià l’amicizia
In tornu à issa ghjente ùn piccia l’allegria
Eo luntan da tè sapendu duv’è tù stai

Ma ùn vedi issi tempi cum’elli sò bugiardi
S’o pudia fà piglià pichju torna à u nostru fume
Quandu à bruste cunsumate ùn pò risorge lu lume
Un ideale à brusgià si l’ale sarà ancu tardi

Di canti è di misteri in giru à qualchì focu
Emu da ritruvà ci è ti facciu la prumessa
A spiccanza a rumperemu d’anelli è messa
A terra di i paisani fieri hè quessu lu mo locu

Per mè sì a più bella ùn ne serà un misteru
Tù saluti la to ghjente è u sole intepidisce
Spergu rimirà cun tè i nuli chì facenu strisce
Ti lacu mal vulinteri cù u sintimu sinceru.



Stefanu Pergola hè un ghjovanu pueta chì insegna a lingua corsa in Bastia. Natu in Balagna è di sterpa vinachesa. A scrittu assai in i rivisti isulani. A so prima racolta di puisii, Or provu hè sciuta in u 2006.

 

Commentaires