Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

CORSICAN GODS

marceddu


    Hè un’animalu rilighjosu l’omu. L’abbisogna à creda quantu è l’aria da campà. Ma si sà pur troppu ch’eddu hè ingratu di natura. Capulatu a festa, sminticatu u santu. È macari s’è i miti, i raconti, i scritturi, di u cuntrariu ci voni scunvincia, sò murtali i dii, altr’è tantu à quiddi chì i rivariscini. Sò tinuti o vituparati sionti i benifatti o i guai ch’eddi arrecani è mutani eddi à tempu à staghjoni è modi. Quantu volti l’avaremu sminticati, pigliendu, inveci di i vechji, divinità novi da aduralli ?

    Oghji, rivarimu l’iduli novi di a sucità di u cunsumu è di u frazu. In i cuscenzi umani cuntempuranii ci si scatena un cunflittu trà l’antichi cridenzi, chì sò pà scumparì, è i miti muderni chì facini da maestri.

    Sò fatti à a sumiglia di l’omini i dii, è ancu peghju à li volti. Voltaire dicia, à u XVIIIu seculu, cunvintu ch’eddi erani l’omini ad avelli invintati i dii : « Si Dieu nous a fait à son image, nous le lui avons bien rendu. » Oghji ghjornu, sò parechji à creda chì l’essari magichi è i divinità altru cà pruduzzioni di un cuntestu culturali ùn sò. Prudutti di una cultura è di una visioni di u mondu, incarnalati, mossi da vogli è passioni umani è basta. Ogni populu, ogni cità di i tempi andatoni t’avii a so scorta cilesta è ctuniana. S’edd’accurriani, dii novi, ni cuncipiani à vulenni più o i pigliavani in i populi à vicinu. Cusì fecini i Rumani longhi i seculi nanzi à fassi cristiani. Nietzsche à pruclamatu à a fin di u XIXu seculu ch’edd’erani morti i dii, pinsava tandu à i dii antichi, micca à quiddi inghjinnati da a sucità ughjerna materialista, criati da arricà unu sensu à a vita di l’omini.

    Parchì sò fabetichi i cridenzi di i nosci cuitani, privi di raghjoni, quant’è quiddi di l’antenati. Sò u risultatu di i publicità è di l’emissioni di televisiò chì impastani u ciarbeddu umanu da furmà i fandogni di a civilizazioni d’oghji, cusì ditta di u prugressu. L’omu d’oghji s’hè invintatu sonnii novi, paradisi novi, tal’è quali i nosci avii di tempi fà. Ma no, dispunimu di i mezi tecnichi di sparghjera di l’infurmazioni putenti chì basta. Oramai hè ora di u cultu di l’artisti di sinemà, i cantadori, i spurtivi, i candidati di a telerialità, i fantasimi di a sucità di u cunsumu.
Ci saria à dumandassi quali hè oghji à primurassi di u sacratu in i sucità muderni ? Sarani i marcanti di u tempiu ad avella vinta ?

    Quantu n’avaremu aduratu, dii, in Corisca ?
 
in 2 000 nanzi à Cristu :

i petri, u soli, a luna, a terra, u sonitu, i monti, u ventu, i fiumi, l’ochji, u toru, u signari, l’altagna, u farru, l’oru, u focu, i morti, a forza…

in 1600 dopu à Cristu :

i sciabuli, i stiletti, l’archibusgi, u piombu, l’anori, a nubiltà, i favori, i tituli, u danari, i morti, …

oghji :

jack Daniel’s, Ballentine’s, Cardhu, Johnny Walker, Ricard, Casanis,

Adventage, Westwood, Timberland, Nike, Reebook, Converse, New Balance, Assics, Adidas, Prada, Dior, Chanel, Gucci, Mendel, Boss, Lacoste,

Nokia, Ray Ban, Police, Dolce & Gabana, Persol, Œakley

Browning, Beretta, Remington, Smith & Wesson

Carrefour, Casino, Super U, Monoprix

BMW, Subaru, Porsche, Mitsubishi, Mercedes, Toyota

Quick, Mac Donald’s, Burger King, 

Star Academy, Loft Story, Secret Story è tutti quidd’altri « Story » di a criazioni, Pop Star, les Feux de l’amour, Loto, PMU,

Play Station, Nintendo, Apple, Sony, HP, Packard Bell, Ericsson, Philips, Samsung,

Via notte…

Aghjustareti ciò chì vi pari…


Hè ci ni di più benistà ?




Marceddu Jureczek t’hà 34 anni. Hè natu in Aiacciu è ci insegna u corsu in liceu prufiziunali. Prisidenti di l’associu Matina Latina, hè u capiridattori di a rivista Avali è sicritariu di ridazzioni di u misincu U Taravu. Parechji di i soi i scritti, part’è più raconti, sò stati publicati in i rivisti mintuvati, in Bona Nova è le Journal de la Corse. U so prima rumanzu Ghjuventù Ghjuventù... hà ricivutu u premiu 2007 di u libru corsu cuncessu da a Cullittività Tarrituriali di Corsica. U so sicondu libru, U Vantu di a Puvartà, un assaghju, hè sciutu di pocu.

Commentaires