Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

L'OMU RIVULTATU

marceddu

"Je pense à Camus : j’ai à peine connu Camus. Je lui ai parlé une fois, deux fois. Pourtant, sa mort laisse en moi un vide énorme. Nous avions tellement besoin de ce juste. Il était, tout naturellement dans la vérité. Il ne se laissait pas prendre pas le courant ; il n’était pas une girouette ; il pouvait être un point de repère. "

Eugène Ionesco Notes et Contre-Notes  Gallimard, 1962






    Chì ci sarà po di stupenti è cumuventi quant’è ‘ssa sala di cuncertu, infiarata di centumila fochi, cù i culonni parechji chì si perdini in u celi di i volti. U palcu hè adurnatu di ùn si sà quantu fiori ciaddi. Sò tutti dalià sò. Pusati in i sedii ammuddizzati bè bè, in a prima rangata di a mezanina, u rè di Svezia, Gustavu VI è a famiglia reali tutta quanta. Annant’à u palcu, strignendusi u pulpitru neru à dui mani inguantati di biancu, u sicritariu ginirali di a fundazioni Nobel. Veni di prununcià l’umaghju da tutti aspittatu : quiddu fattu pà Albert Camus, premiu Nobel di litteratura pà l’annu 1957. Camus, chì si ni stà sticchitu à vicinu à u pulpitru, fighjula guasgi cà abbagliucatu a sala alluminata chì sciacca di mani à più pudè. Tandu, fala eddu i pochi scalini chì u spiccavani da u rè è si toccani a manu. Semu u 10 dicembri 1957 è Albert Camus veni d’essa cunsacratu scrittori di fama mundiali.

    I ghjorni dopu, sò cunfarenzi, discorsi, brindisi, intarvisti, è brindisi dinò, da affistà u primiatu francesu. À l’università di Stuccolma, ind’eddu scontra i studienti svidessi, Camus veni intargatu cù fuga da un ghjovanu algirianu. Quiddu li rimpruvareghja di stassini mutu quandu chì l’Algiria ni passa pà i buddori è i strazii di a guerra. Ritorci tandu Camus : « Ùn m’hè sucessa mai à mè di parlà in ‘ssa manera à un Arabu comu l’eti fattu à mumentu cù mecu ». Eppo aghjusta : « In a ghjustizia ci crergu eiu, ma nanzi à a ghjustizia, difindariu à mamma difindariu ».

    Paroli curaghjosi di unu chì sempri à ricusatu d’essa una straccia in bocca à u ventu di l’ideulugii o di i fanatisimi, di pusà in u sensu di a storia, postu chì, com’eddu l’avia ditta in u so discorsu di Stuccolma, davanti à l’accademia Nobel « Le rôle de l’écrivain, du même coup, ne se sépare pas de devoirs difficiles. Par définition, il ne peut se mettre aujourd’hui au service de ceux qui font l’histoire : il est au service de ceux qui la subissent » (Discours de Suède in Essais Bibliothèquede la Pléiade Gallimard). Paroli ricivuti mali è intarprittati ancu più mali da i partitanti di qualivoglia fussi u latu. Numicu d’ogni fanatisimu, era numicu d’ogni tarrori Camus, ch’eddu fussi usatu à favori di a libartà di un populu o da  pratenda salvà un mondu, quiddu di i Pedineri.

    Pocu u rimprovaru quantunqua. Camus Mutu ? Qual’hè po, megliu cà eddu, longu à a so vita, hè statu l’incarnazioni a più cumpita di l’intelletuali, chì s’indea à piglià pratesa pà quiddi chì di boci sò privi ? Riducia a vita di un omu, l’opara di unu scrittori à l’impegnu soiu, ùn cunveni. Parò, a vita di Camus pari ch’edda fussi stata cundiziunata da ‘ssu bisognu di rivoltu contr’à l’inghjustizia. Fà chì, natu povaru à mezu à i povari, è chì custrettu à scumbattala da ghjugna à cunquistà u drittu à a cultura, ùn ci sbuccava eddu à cuncipisciasi solu da artistu è basta.

    Da tandu, volsi truncà i reni à l’inghjustizia, à tutti l’inghjustizii, è dì ciò a forza parti di a ghjenti ùn sintia o ricusava di senta. In u 38, dinunciò a miseria nera chì culpia i muntagnoli di a Cabilia è chì I custrignia à una vita mischinedda. I so articuli, publicati in cullana in u 39 ind’è l’Alger Républicain sviletini à i littori citadini un mondu ch’eddu ùn cunnisciani micca o ch’eddi ùn vuliani micca sapè ch’eddu c’era.

    Di marzu 1944, in Parighji, s’impigneti in a risistenza parighjina è scrissi  in u ghjurnali clandistinu Combat. Eppuri, compia a Guerra, ghjunta l’ora di ghjudicà i sustegni di i nazisti, Camus, à fiancu à Arthur Koestler è uni pochi, dumandò ch’eddu fussi francu da a morti Brasillach, u scrittori cullaburatori.
Cuscenti chì L’URSS ùn era mica quiddu paradise sucialistu in via di rializassi ch’eddi cantavani tutti quanti l’intelletuali francesi di tandu, dinunciò di Staline a dittatura. D’altrondi, quand’eddi si fecini entra in Budapest i carri armati suvietichi, Camus, un’antra volta, dissi ciò chì part’è più di a manca francesa ùn vulia senta : « Je regretta de décevoir les nouveaux espoirs de certains confrères infatiguables, mais il n’y a pas d’évolution possible dans une société totalitaire ».


    In listessu modu, fù u sustenitori mai fiancu di i Ripublicani spagnoli. In a pezza di teatru L’Etat de siège  di 1948, fendu chì si sciuglessi l’azzioni in Cadix, circò à ramintà à i so cuitani chì a Spagna di Franco mancu stampa si pudia dì ch’edda fussi un paesi libaru. A so pezza divintò tandu un umaghju à quiddi tutti quanti chì luttavani contr’à a dittatura è ricusavani di u tarrurisimu i metudi, chì tumbendu à a ceca torra lighjittimu l’umicidiu.
In u frà tempu, cumpunì eddu, cù a risorza tamanta di a so arti, un’opara in cunsunenza cù a soia l’indiatura.

    A tematica di u rivoltu trapanna a scrittura da un capu à l’altru. Altr’è tandu a tematica di l’assurdu (L’Etranger, Le Mythe de Sisyphe, Le Malentendu, Caligula). Assurdita fundata chì faci chì l’omu fussi un inadattatu di natura à u mondu ind’eddu nasci. Inadattazioni chì in sempiternu u cundanna à un’infilici sorti. Da quì spunta u rivoltu contr’à quidda cundizioni chì pata ùn si pò. tandu, bisogna à rivultassi chì u rivoltu assurdu ùn hè. Ma Camus, spiccu trà rivoltu matafisicu è rivoltu storicu ùn ni faci, chì inveci saria in u filu di u ricusu di a cundizioni fatta à l’omu. Parò a rivuluzioni si faci prestu prestu bestia urrenda in brama di cunquista tutali chì canciddeghja a libartà in nomu à una ghjustizia astratta, da sbuccà in un mondu di u tarrori, in l’universu di i campi è di i prucessi. Cusì hè u fascisimu chì stabbilisci u regnu d’uni pochi è a schiavitù di tutti quidd’altri, è ancu u stalinisimu, chì cerca à libarà l’omu à vena, incatinendu quiddu d’avà.

    Si capisci megliu chì, cundannendu tutti ogni ideulugia assuluta, Camus fussi statu missu à u ruveddu da Sartre è a so squatra di i Temps Modernes, è a scorta di l’intelletuali francesi di l’epica.

È comu fà altru nudda quand’edda schiattò a lotta pà l’indipindenza in Algiria ? Da eddu, natu è ingrandatu in ‘ssa terra d’Africa, quidda guerra fù da veru un crepacori. Moltu più chì da ogni cantu, li si chiria sustegnu è rinforzu. Ma comu fà, in cuscenza soia, à sceglia trà tarruristi arabi è boia francesi. Comu accunsenta à l’inghjustizii puri da tuccà a ghjustizia ? Comu ammetta chì u fini ghjustifichessi qualivoglia fussini i mezi da ghjugnaci ?

    Mutu, Camus ùn hè mai statu mutu. Inveci, dicideti in vita soia, di pettu à l’ipucrisia è à u fanatisimu, dicideti di firmassini irreduttibili.

 

Marceddu Jureczek t’hà 34 anni. Hè natu in Aiacciu è ci insegna u corsu in liceu prufiziunali. Prisidenti di l’associu Matina Latina, hè u capiridattori di a rivista Avali è sicritariu di ridazzioni di u misincu U Taravu. Parechji di i soi i scritti, part’è più raconti, sò stati publicati in i rivisti mintuvati, in Bona Nova è le Journal de la Corse. U so prima rumanzu Ghjuventù Ghjuventù hà ricivutu u premiu 2007 di u libru corsu cuncessu da a Cullittività Tarrituriali di Corsica. U so sicondu libru, U Vantu di a Puvartà, un assaghju, hè sciutu di pocu.

Commentaires