Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

A CORSICA IN PANNA

marceddu


    PARI CHI L’ARIA fussi in cambiazioni. Ùn hè nè timpurali chì veni, nè sera chì fala. Bensì hè l’assenza di qualunqua prughjettu puliticu pà a Corsica. O ancu più pessimu, hè u disintaressu chì più và, più piglia forza in i menti corsi riguardu l’idea di suvranità.
Eppuri, era quista a dumanda à tena sveghji i puliticanti corsi tutti quanti da u 70a in quà, ad essa «in cori à l’arena pulitica» da ritena u dettu famosu di un certu prisidenti di a ripublica francesa. Sarà chì quidda idea di suvranità fussi suttarrata è basta ? Quantu sarani stati ad ùn avè avutu altru pinseri, à tarnalassi, ad arruvinassi, à mora, pà ‘ss’idea, è oghji, saria finita ?
In a Corsica d’oghji, guai altri vi n’hè à vulenni più, hè ancu vera.
Ma quantunqua, comu spiicà ‘ssu laca corra ?

Di fatti, l’ideali di una nazioni corsa suvrana ùn hè mortu. I partiti naziunalisti a si facini ancu valè pà l’alizzioni. Ma à u veru fondu, ciò chì pari propiu smaritu, saria a passioni, a vulintà di sbuccacci.
Mancu à dilla, u maceddu fraticidiu di u 90a c’entri pà calcosa. In una cappiamanata erami passati da u prughjettu di sucità di u FLNC (U Ribombu, prima trimestru 1990) à a lotta spiitata pà u puteri assulutu. È ùn valsini i patti di u Fiumorbu di sittembri 1999 da fà ch’edda turressi à crescia a spiranza.
Ci fù l’assassiniu di u prifettu Erignac pocu innanzi, di frivaghju 1998.
È po i scontri di Matignon cù l’accordi signati da tutti l’aletti corsi. È po a multitudina di i FLN. È po a scunvinta di u «sì» à u rifarendu à puntu di a riforma amministrativa di l’isula.
È po l’attentati. È po, È po… tamantu frombu, tanti morti, in darru.

Sò frusti i Corsi è dilusi. Mancani i discorsi fundivi da ribradisciali. Parini fralati i vechji argumenti naziunalisti, inutuli, incapaci à cunverta quiddi chì accunsentani à stalli à senta. Quiddi argumenti, atti à fundà una vera è nova lighjittimità, ùn sò.
Ci fù l’epica chì in Corsica, si pudia briunà «A Corsica à i Corsi», è vulia dì tuttu. Inveci, oghji, s’ani persu ogni sensu ‘ssi paroli, si sò svarniciati. I veri quistioni da fassi oghji sariani : chì hè d’essa Corsu ? Comu si pudarà fà ad essa Corsu ?


A sucità corsa ughjerna cunnosci un veru tarramottu à tempu dimugrafficu è suciulogicu. U populu corsu, chjamemulu «storicu» da taglialla à l’accorta, hè torra in minuranza in terra di Corsica. Comu sarà ? Par via chì i Corsi, figlioli ni facini pocu è micca ; par via ch’eddi morini i vechji ; par via ch’eddi scalani sempri di di più numarosi i frusteri à stabilisciasi quì.
Or dunqua, si capisci cusì chì in a noscia sucità, parechji gruppi campessini unu à fiancu di quidd’altru, senza mischiassi troppu. Mintuvà, i possu mintuvà ‘ssi gruppi, chì i so cunfini sariani etnichi : i Corsi (à buleghju ci mettu i Sardi è i Taliani ghjunti tempi fà, postu ch’è no scumpartimu una cultura listessa), i Francesi è l’Arabi (ci vurria ancu à fà u spiccu cù i Berberi, ma infini, a vogliu fà corta…). O vulella, o ùn vulella, cù i scossi parechji di a storia, s’hè assistata cusì a sucità corsa. È ‘ss’assestu novu, è fà è fà, cuntribuisci à spiantà i fundami di quali voglia fussi prughjettu cullittivu, moltu più s’eddu si tratta di calchì prughjettu almanaccatu à l’usu di innanzi, via naziunalistu.

St’ecclissa di u discorsu naziunalistu/suvranistu, si pò currisponda dinò cù l’individualisimu sfrinatu, stampa di i sucità urbani chjamati «muderni», sviluppatusi in Corsica st’ultimi anni. Appratendu u cuntrariu vinaria mali, chì ogni ghjornu si pò custattà d’ochji u fattu : cambiati i Corsi, sò cambiati miraculi. Oramai sò torri anch’eddi edunistichi è parsunali, cuncintrati ch’eddi sò nant’à u soiu u piaceri è basta. Ùn sani nienti, o poca robba, i ghjovani corsi di u passatu soiu, di u locu dundi sò nati i so antichi. Sò smimuriati è vutati di vulè propiu à i valori di u cunsumu. Altr’è tantu i babbi è i mammi.

Hè cusì chì, à manu à manu, ci hè fendusi una spiccatura, chì più và, più s’allarga, trà militanti di a cultura corsa è part’è più di a pupulazioni (ùn vogliu parlà di populu, par via di i «gruppi» ammintati) di l’isula di Corsica.
L’attori culturali, i pulitichi naziunalisti (certi…) torrani à pinsà a lingua corsa, a cultura corsa, i valori corsi, com’è rifarenzi fundivi di a Corsica da fà. A pupulazioni (o i pupulazioni ?) ùn la pensani micca cusì o pocu è micca ci credini. Rumpitura ? Ma chì sarà po ‘ssi idea di nazioni ch’eddi difendini certi ?

Mai hè statu cusì incertu l’avvena. Puri viaghjendu muru muru, in un mari d’indiffarenza è d’eguisimi, in quà è dà si cerca un versu da firmà o da essa arradicati. Sarà forsa calchì paradossu, o ancu ancu u risultatu logicu di a situazioni ughjerna. Ùn vogliu parlà quì di i soliti «culturali», bensì di a ghjenti, di ceppu pupularu o mediu, Corsi o altri ch’eddi fussini. Sighi cù l’insignamentu bislinguu, sighi cù a difesa di l’ambienti, o ancu puri cù a quistioni di a patrunanza di i casi è di a terra… a ghjenti di quì hè in cerca di una leia cù quidda Corsica storica, in via d’essa sipillita. I puliticanti ? Ricusani ‘ssa mossa o parini incapaci à capisciala. È i naziunalisti ? Oramai ùn sò più in via d’incarnalà nè spiranza nè suluzioni da dumani.
Or dunqua, hè ora è più cà ora di rifletta à un prughjettu novu pà a Corsica.
Unu Statu corsu, saria indispinsevuli ? Ancu fussi eddu puri corsu, mi ni fidariu pocu ; ci dici a storia chì sempri sò da oprima è custrigna i Stati. Indinpindenza o autunumia larga ? Ùn la sò. Ma un puteri in manu à i Corsi, da solva i prublemi capitati quì, più di mai ci voli.
Chì i sfidi ùn sò pochi :

S’eddi sò in parechji i ghjugniticci, ùn pari prontu à stanciassi l’undata migratoria, è bisogna ci n’hè vistu i cundizioni dimugraffichi corsi. Eppuri, quand’edda scala a ghjenti, ci vurrà ch’edda sapissi chì quì, si parla corsu, è chì tuccà, li tuccarà à viva è à travaglià cù ‘ssa lingua.

Comu risponda à l’intisgiati di a glubalizazioni neolibarali fatta à mutazioni tecnulogichi, priculi ambientali è desumanizazioni ? Forsa sarà a Corsica, cù tant’altri paesi cumpagni, u locu prasceltu da invintà vii novi.

Una volta par bè, turrà à difinì u cuncettu di nazioni : più razza, sangui, ma lingua, cultura è avvena pinsatu è spartu in cumunu.

È si volta cusì à quidda idea di prughjettu. Un prughjettu da custrignacci à straccià u velu, à sgrignà l’ochji, da fighjulà l’urizonti luntani, à cacciacci l’oziu, à facci attivi è passivi più, à pinsacci centru di u mondu, è più isulottu scantatu è emmarghjinatu.

Casu mai ùn fussi cusì, allocc’à vinti o trenti anni, sarà pà compiasi u prucessu in anda, si sarà disgregata in tuttu sta noscia sucità, sguagliatusi par bè i pochi acquisti d’oghji, annigata da a piena dimugraffica.

Ma u populu corsu, longu à i seculi di a so storia, hà palisatu u so vulè putenti d’essa da populu, emancipatu è cuscenti. Scummittimu chì a voglia di fà da sè ùn fussi ancu à spignasi.



Marceddu Jureczek t’hà 34 anni. Hè natu in Aiacciu è ci insegna u corsu in liceu prufiziunali. Prisidenti di l’associu Matina Latina, hè u capiridattori di a rivista Avali è sicritariu di ridazzioni di u misincu U Taravu. Parechji di i soi i scritti, part’è più raconti, sò stati publicati in i rivisti mintuvati, in Bona Nova è le Journal de la Corse. U so prima rumanzu Ghjuventù Ghjuventù... hà ricivutu u premiu 2007 di u libru corsu cuncessu da a Cullittività Tarrituriali di Corsica. U so sicondu libru, U Vantu di a Puvartà, un assaghju, hè sciutu di pocu.





Commentaires