Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

A VITA DI I RIVISTI

marceddu


    HÈ STATU, u Riacquistu, un bullori pupularu forti è s’hè vistu sbuccià rivisti ad ogni chjassu di l’isula. Vita campagnola, storia, foli, puesii à buzeffa, literatura… Si pudia capì chì a smalmera si faria è, di sicura, fubbini uni beddi pochi à «fiurì è ùn granà». Parò, comu pinsà ch’eddu si ni ghjunghjaria oghji à sta pessima situazioni.

I raghjoni, à parè nostru, sò almenu trè :

– pocu litturatu
– finanzamenti scarsi
– forza militanti sfiatata.

In trenta anni ùn hà crisciutu micca a ghjenti da leghja u corsu – o poca –. I generazioni di l’uralità ani fattu, eddi, u sforzu di leghja. I nuvelli generazioni, pà a maiò parti, nè ùn lu leghjini nè ùn lu parlani. Forsa i scritti pruposti ùn garbani à i mintalità d’oghji ? È puri ùn si pò dì què. Allora ?

Una hè chì oghji ùn si leghji più. In alcuna lingua. Stassini di culu in siddionu è guardà a televisiò pari sudisfà a nostra curiusità intellettuali. Oghji, in fatti di littura ni semu à u pralinatu (Plessis-Praslin, a parolla veni da quiddu ambrascu) : volisi dì, pocu scrittu è assai imaghjini. Hè cusì chì un libru hà ancu un certu successu.

A forza militanti erani quiddi chì cumpraiani tuttu ciò chì iscia in corsu. Era dinò quidda chì, passiunata, ùn misuraia nè tempu nè dinari da mova una rivista. Mancani una è l’altra.

I finanzamenti ? Nicissarii po sò, hè vera ! Ma ùn bastarani mai da mova i cuscenzi.

Oghji, a vittoria, hè di quiddi chì annati è annati ani nigatu a lingua corsa in iscola, in casa, in la suciità, cù u neci ch’edda era quidda di i Naziunalisti. Ani missu i so antenati à corpu inghjò, di bocca in la tarra ch’eddi ùn avissini à falli rimprovaru di tamantu tradimentu.

Ma comu rimpruvarà à un populu di perda a so lingua tandu ch’eddu hè tuttu ch’eddu perdi : a so lingua, a so tarra, i so usi, a so dignità. Prestu camparà, u populu corsu, in calchì riserva chì i stranieri chì si comprani l’isula vularani bè accurdalli.



Lisandru Bassani, anzianu cunsiglieru pidagogicu di lingua è cultura corsa in l’insignamentu primariu, militanti culturali, autori, traduttori, crunistu à u Journal de la Corse, hè oghji vici prisidenti di u Cunsigliu Ecunomicu, Suciali è Culturali, un cunsigliu cunsultativu di l’Assimblea di Corsica.

Commentaires