Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

LEGI LITTURALI

marceddu

A situazioni di a Corsica oghji chjamaria à una riflissioni funda. Parichji sughjetta mòsciani chì a noscia ìsula hè à a mala via. Si ni pò mintuvà calchiadunu chì sò cunnisciuti assa': pulitichedda, sbiutera di i paesa, disimpiecu, curruzioni, attività illìciti, pèrdita di a so idintità, pèrdita di i valori tradiziunali, pèrdita di so tarri à prò di u capitali frusteru; di a lingua è di a cultura ùn si ni parla mancu più, cosi capulati da un pezzu.

Vularia eu incalcà à nantu à un puntu chì mi pari di primura. Spissu si senti dì par pruteghja i nosci piaghji è i nosci tarri in ginirali, ch'iddu ci volga à difenda a Legi Litturali. Monda corsi sò à prò di quista biata legi pinsendu ch' idda hè a so salvezza. Socu anc' eu d'accordu ch'iddu ci volga à pruteghja i nosci loca da a ingurdìzia di u capitali frusteru ma puri unn isuscrivu micca à l'accunsentu ginirali subra à quista legi.

Prima hè chì sin' ad avà, in Corsica, ùn mi pari micca chì a Legi Litturali tantu ludata aghi prutettu tanti affari. Mi pari piuttostu chì sì u litturali unn hè micca statu bitunizatu in tuttu, hè piuttostu par via di l'azzioni di i clandistini; ciò chì, ben' intesu, ùn duvarìa micca essa u mezu nurmali di difenda i nosci tarri.

In sigondu locu, quand'iddu si fighjola i litturala francesi dund' iddu ci hè una prissioni urbanìstica paghjesa à quidda ch'è no' cunniscimu ind'è no', mi parmittareti di dubbità di a capacità di quista legi à parà i bitunadora. Piddeti u casu di a Costa Azura, da Mònacu sinament'è Cannes è ancu più 'ddà, unn hè ch'è infilarata di custruzzioni è micca tutti di nanzi à a prumulgazion' di a Legi Litturali. In terzu locu, s'iddu s'entri un pocu 'n u fundu di a Legi, mi pari chì fora di a banda di i centu metra è forsa di i rughjona acquistati da u Cunsirvatoriu chì sariani incustruttìbuli (dicu 'sariani' parchì si vidi bè ch'unn hè micca sempri vera) dunqua fora di sti dui casi, u restu di i tarri sò virtualmenti custruttìbuli è a so custruttibulità dipendi solu di a vulintà (praputenza?) di i sirvìzii prafitturali o di u pianu Lucali d'Urbanìsimu quand'iddu ci hè.

Or, andareti vo', quand'ì vo' seti merri, à scumbatta contru à l'appititi di i grossi pussidenti (è amichi) chì volni venda è di i ricchi cumpradora o prumutora chì volni cumprà è chì làmpani solda senza cuntà. Moltu più chì i lei tr'è puliticanti è quiddi chì si volni impatrunissi i nosci tarri ùn sò micca sempri scàpuli d'ambiguità. Ci vurria ad essa di farru da risista à sìmula prissioni malgradu i merri sò anch' iddi di carri è certi volti maccaru ancu di bambacia. Par ciò chì spetta à i sirvìzii prafitturali, a possu tistimunià par avelli praticati, a custruttibulità hè accurdata in unu stessu locu, un annu nò, un annu sì, i mutivi di ricusu cambiendu sigondu u tempu o l'asgiu di u funziunàriu, senza ch'iddu si capisca parchì.

Voddu dì quì, ch'ùn ci hè nisciuna règula chì guvirnessi di minera chjara, lighjitìa, pricisa è subratuttu stàbbuli a difinizioni di i zoni custruttìbuli. In fatti, i sirvìzii prafitturali fàcini ciò chì li piaci sigondu ùn si sà chì, u tempu, a parsona, l'amicìzia, i cunsigni di u ministeru, a situzioni pulìtica, a luna? Ùn si sà micca. Pensu chì parichji chì t'ani avutu à chì fà incun' iddi ùn pudarani nigà ciò ch' e' dicu. Avà, par ciò chì spetta à i Piana Lucali d'Urbanìsimu, bisogna à dì chivi dinò chì a difinizioni di i zoni custruttìbuli si faci di minera arbitrària è meddu hè à fà parti di u chjirchju di l'amichi di u merri o di quiddi chì poni fà prissioni à nantu ad iddu.

Fatta fini chì cunnoscu ghjòvani corsi, prupiitàrii d'un pezzu di tarra lasciatu da i so maiori (chì l'aiani stintatu) chì u so pezzu lla tarra si trova fora di i zoni custruttìbbuli difiniti da a mirrìa. Quisti tinti ghjòvani corsi chì si vularìani fà a so casa 'n i so loca, à nantu ad iddi si vìdini ricusà u parmessu. Bisogna ch'iddi cuntinivèssini à pacassi una pighjò o pacà l'ossa llu coddu pà cumprassi un antru tarrenu da custruìscia in altrù. Eh iè, à chì lecca, lecca! Sti ghjòvani corsi pàcani u fattu d' ùn pudè metta l'impegni o d'essa sacrificati da chì u vicinanti, chì iddu hè custruttìbbuli, poschi avè a so « zona verda » pà u so lutissamentu.

Quand'ì vo' mittiti quista situazioni di pettu à quidda par asempiu di un puliticanti cunnisciutu à u più altu niveddu di a pulìtica in Corsica è chì avendu a diccia, iddu, ùn si sà comu, d'avè a so prupiità di parichji èttari custruttìbuli in Purtichju, faci un lutissamenti di parichji dicini li lotta à venda (chì li rappurtarani milliona d'auri), si capisci tandu chì quista famosa Legi Litturali adunita à a niquità di i Piana Lucali d'Urbanìsimu porta in sè a sumenti di l'inghjustìzia. Pinseti bè chì a Legi Litturali parmetti ciò ch'idda chjama hameau nouveau, bedda parola par dì ch'iddu si pò crià in unu spàziu piaghjincu vèrghjini di custruzzioni lutissamenta di cintunari di casi è dunqua mi veni in deia chì ssu pòvaru corsu ch'ùn avia micca parmessu par fà a so casa, eh bè saria à dumandassi s'idd' ùn ci vurria micca à cunsiglialli di chera a criazioni d'un 'hameau nouveau' di dicini di casi par pudè avè a soia, venda quidd'altri è fassi un saccu di solda.

Nò, a Legi Litturali com'è a maiò parti di i legi francesi sò adatti à u sistema cunòmicu francesu parti di capitalìsmu mundiali. Quisti legi, andeti puri, ùn vani mai contru à i intaressi di u puteri di u capitali, di u soldu. È sì u soldu voli bitunizà, ci vol' di lacallu bitunuzà. In Corsica, deti tempu à u tempu, deci, vinti, trenta anni, vidareti a quantità di 'hameau nouveau' chì s'ani da crià. Cari amichi, mi possu sbaglià ma a vi dicu com'è a pensu, a Legi Litturali ùn pruteghji nudda è nienti. Apriti l'ochja, fighjuleti in ghjiru à vo', abbadeti u nùmaru di 'grue' travaddendu è feti pur' contu chì à u rìtimu attuali di custruzzioni ligali, auturizati da a Legi Litturali, a Corsica unn istarà tantu à piddà u versu di l'ìsuli Baliari o di a Costa Azura.

S'è vo' pinseti à longu andà, parchì u tempu t'hà u tempu è a prissioni urbanìstica mi stunaria ch'idda calessi, vidareti chì a prissioni vinciarà sempri malgradu i pìcculi risistenzi è inciampi ch'è no' pudaremu metta in traversu à a strada. Sta prissioni si pudaria paragunà à una ritinuta d'acqua. Sì u matrali unn hè micca fattu in cundizioni, a prissioni di l'acqua cù u tempu truvarà sempri sfilaturi è fìstuli par fà a so strada è 'n u nosciu casu, u matrali custituitu da a Legi Litturali mi pari beddu chè tafunatu. Ci pudemu dà appuntamentu da quì à cinquanta anni, s'è Diu ci presta vita, t'aghju a paura chì a noscia pòvara Cursichedda t'avarà presu un versu stranu. 

 

Ghjuvandumenicu Tafani hè natu in 1969. Stà in Bala di Purtivechju. Maestru di scola, appassiunatu di lingua corsa, si dà di cori è d’intelletu à a ricerca linguistica.

Commentaires