Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

UN PEZZU DI PETRA NERA

marceddu

 


In i viola muntagnoli si vidini picculi mori di petra chì u tempu hà fasciatu di murza. Suvitenduli, vi portani sin’à i bucchi o i foci pà aiutavvi à varcà i monti, sò stati fatti pà insignacci a strada chì no ùn ci pirdissimi. L’antichi i chjametini madunnini, madunnetti o madunnuchji...

 

 

 

Tuttu cumminciò a notti di quiddu timpurali. Sonu è acciniti chjariavani u circondu, grandina è buttighjona scurticaiani a crista ‘lla muntagna. Spinursali rasciatu da i burrascona ‘llu ventu, fasciatu da i nivona è richjaratu da i scurrotona d’acqua ; spinursali indù ùn nascìa un pizzineddu d’arba.

Com’u subrafrasca, eru tittulu d’una pùppula di sta muntagna chì spicca u Cuscionu da Asinau.

Da una parti à suliu, vidiu u pasciali incù i so casedda stabbii è orta murati in petra sicca, a Muvrariccia liscia tinta di giaddu ad ungni branata da u lepru corsu è i furchi di Bavedda chì bizzichiddaiani u cilestu.

Da quidd’altra parti à umbria, i me ochja suvitaiani u muraddonu fattu à mani cristiani, chì partia da a crista è si ni falava drittu drittu à a bucca Chiralba pà sfraiassini sparguddatu da i parti di a Chiralbeta è a Marinasca.

In parti maiò u spinursali ‘lla muntagna, chì nasci à nurdiu à a Punta Lattunaccia passa pà bucca di Broncu, foci Aparta è si ni fala pà Piana Longa, Monte Rasu Bambiolu è pianta da suttu a Cavaddariccia in a Vetta indù l’Erba Longhi caccetinu u beddu buttighju di Funtanonu, era un tighjali tamantonu di petra virdiccia rosula pichjulata di biancu è neru. A puppula era nera catramu.

L’inguernu vistia a muntagna da Cintu à Cagna. Stracciona di nivi è brandona di ghjacciu si puniani è s’appiccaiani da par tuttu. U spinursali firmaia biancu lisciu lisciu è a prima uchjata ‘llu soli scunghjiva l’appinuchja di biancu di a puppula. Da a Paglia Orba chì s’affaccaia à manca d’Usciolu à aTafunata ‘lli Paliri tuttu era biancu cutratu, è da tuttu u circondu si vidia sta pùppula nera subranata da tamantu cantonu quatratu.

U branu, sbucciava in verdu tennaru i fai chiralbi vittulli è subastri in i vangona di i Peddi Nieddi l’Agnone è Monte Tignosu.

L’istati accurbiddava l’Acunita Corsa u longu ‘lli pozzi indù si ciuttavani pizzini è pizzona di celi schiettu. Tutti l’anni, a muntanera sbalasgiava usci è balcunedda ingrunchjati in u silenziu di l’inguirnonu. È da maghju à uttrovi, com’è tanti rusgiuledda, cristiani è animali mansi si sparghjivani in quiddi loca. Ni iscìa da ungni pasciali : Chjassoli, Bassetta, Allucia, Cavaddari, Croci, Teppa Ritonda, Fraulettu, Palaghjolu, Carpicciola, Chiralbeta, Bucchi nera è Fessa. Tamanti mumenta ribuldriati di vita. Vita famita di vita, affannata da u straziu, vita cruda stanca morta.

È u vaghjimu, ristanghittava porti è balcunidduchja tinghjindu brancuchji è brancona ‘lli so culora inciappati.

Da u me appuddatoghju, neru catramu, vidiu sfilarà i staghjoni chì unghjivani sti loca muntagnoli di tuttu ciò chì a criazioni pò dà, tuttu ciò chì nasu pò annasà, ochji fighjulà, arichji senta, mani tuccà, bucca tastà. Ma in più, sti loca muntagnoli, loca d’eternità, tramindinu, tramandani è tramandarani tuttu ciò chì mimoria cristiana campeti da seculi è seculi, è mai ch’idda sia sminticassi pà ùn lacassi intuppà da a bughjura.

È po ghjunsi quiddu diluiu, acinniti sonu ùn ni richitetini una scartulla di siconda, acqua ventu fiumi scatinati in i ghjarguli è... ostia madonna... quidda saittata chì chjarieti Asinau da Prugna à a Punta Tintinnaghja sbianchendu u Cuscionu da Bucchi nera à san Petru. Ci vulissi chì u stazzunaghju fussi furzutu pà dà tamanta martiddata chì sciacceti a pùppula scappizzendula ‘llu so tittulu pà sbulallu spizzatu a sapareti vo induva.

Firmeti abbambanatu ùn sò quantu tempu. Quandu ripresi cuscenza mi ritruveti, mità di tittulu scuppulatu, pezzu di petra nera in u ghjargulu ‘lla Ghjallichiccia. Ch’era duvintata quidd’altra mità ùn la sapìu, ma mi sintiu pittughjà u pitturali com’è sì calcosa di mè vulissi escia pà andà à circà fora sta mancanza, com’è sì a me anima fussi smizata.

Sò statu tant’anni in quiddu vangonu. Aghju vistu i muvri falà da a Muvrariccia è a Calanca Vechja. I corba i taculi e i copii d’aculi andà da Puntaghjola Punta Alta Punta Longa. Aghju intesu u ventu infuriassi è ruzzà in a Bucca d’Asinau è sò statu ancu fasciatu in a bambacia ciociara ‘llu fumaccionu cardatu in i furchi di Bavedda. Ma ciò chì m’hè firmatu impressu, hè quandu aghju vistu l’omini à ghjaddonu cintu pà zappà a muntagna. Di quidda bedda furesta di ghjallichi ùn firmeti ch’è una pulvaraccia chì incrustuliti tuttu. A Punta ‘llu Furreddu spuntò da a morti ‘lla ghjallichiccia è u ghjargulu presi u so nomu. Eu firmeti ingutuppatu di biancu.

Una matina à l’alba, una mani mi presi è intesi una boci cristiana, una boci frusta, chì dissi vultuliendumi :

- «Chì beddu nidicali, quissu sì chì avaria impostu a ghjaddina à pona l’ovu in u nidu. Fighjola ghjà tù com’è stu pezzu di petra hè incrustulitu di calcina. Sarà cusì chì no c’inturbiddimu u ciarbiddinu stirpendu tuttu incù a scusa ‘llu bisognu. À pinsà chì ci sò sempri à dimmi ch’e sò sputrita : sputrita d’essami sbarrazzata di tutti i piccati chì i puteri vigliacchi insummetini à i nosci tinti vechji ; sputrita d’ùn avè vulsutu piddà a somma ‘lli me fratedda, i masci, ch’iddi crescani com’è ghjaddetta ; sputrita d’ùn avè vulsutu com’è minnannona minnanna è mamma carrià u dolu a pizzetta in capu, pà ùn vulè più puzzà a morti à l’ochji di l’altri ; sputrita sputrita sputrita di frustammi à vulè campà a me sorti dunnina è micca pudditrina insummata à sfundassi ‘llu puteri mascicciu.»

Passatu a Bucca di Maru ghjunta in u ghjargulu ‘lli Furchi d’Asinau, zirricata da a stizza, pà mandà à caternu tutti l’anziani diavulati chì intisichinu u mondu interu, mi sfrumbuleti.

Rità era stanca, ùn avia mai vulsutu calà u spinu sutt’à a ghjastima. Oghji era scuraghjita di veda a ghjuventù, inghjurantita persa, circà i vistichi di l’anticu campà à mezu à tutti ‘ssi madunnini sciambuddati, è comu fà, aghjà chì i signadori erani partiti senza sapè dà. Diciani chì in u so paesu, un omu pà puteri si presi è suttimissi à i so quattru vulintà i paisani impauriti. A so casa fubbi ancu battizata “casa ‘llu Diavuli”. Allora com’è pittughjati da una frussa, monda si spatrietinu a morti in l’anima è ci saria ancu un dittu chì crisciaria a ghjastima : “Livia Livia ch’ùn aghi chì fà ùn ci stia !”

U paisonu di l’Alta Rocca mintuatu, sbiutatu di a so aientedda, s’impicceti in u neoliticu intravendusi in a ‘mbuscata. Squatra d’Arrossu persa, l’ultimi pughjulani, ribaldunati, smintichendu a so lea cumuna, magàcciuli sfiulanciati, spizzicavani calchì carrafuddula com’è andacciani pà mantènasi in i so locca. Rità sapia chì a rivolta maciarendu in u malori ùn avia nienti di bonu, è chì a minima castizzedda d’odiu, ancu s’idd’era nicissaria, attizzaria a malanima, idda circava sempri u violu ‘ll’ arti ‘llu campà. Riparata, ch’ungnunu chjamava Rità, sapia chì st’anima nova chì avvinghji da i seculi, era pronta à calassi in un tarramutu silenziosu com’è un velu di dulcezza. È tandu, pula di steddi, l’ochja à l’unitu scintilleranu fendu di a Tarra u spechju ‘llu celi, a ghjuventù ricalzulata purtarà a bonanova di circà l’eternità in a Vita prisenti è mai più in a Morti.

L’acqua cutrata chì falaia da a Puntaghjola mi richjarò, è da nidicali biancu biancu, riduvintò pezzu di petra nera.

Sò stat’ anni è anni in stu fossu è po a piena cintunara riunsi. I grandinona è ranzati d’acqua svacati à bidunati s’infurionu in a Punta Alta è Puntaghjola chì si fecini imbutonu pà parà tuttu ciò chì falava da celi. A vudinedda duvintò fiumu scatinatu chì vultuliò tronca di chiralbi vittulli frassi alzi sradicati è mundati sin’à u Valincu. Eu biciùrculu di tamantu tighjali, fù spostu da suttu u ghjargulu ‘llu Pargulu, annant’à a ribba ‘lla vudinedda di a surghjenti ‘lla Ruara chì cresci l’Asinau.

Quì scuntreti l’ultima pastori. Ùn avia più i manzi d’animali com’è tempi fà, ma una piccula manata di pecuri pà mantena un pocu di campà in u pasciali tiratu cappiu. Un musculeddu di vita anziana iscìa da u fumarolu ‘llu so caseddu, buliatu à u parfumu di cardaghjoli di ghjineparu è di raza chì l’aiutaiani à accenda u so focu pà fassi a so casgiaghjuledda di brocciu.

Quidda sera, sola suletta, Bianca varcò i Saparedda è a surghjenti ‘lla Ruara intesi bilà à a morti in u fundu ‘llu vangonu. Cardata da tanca cirvuni è tiria vissi a so picuredda stracquata. I ghjàcari l’aviani lacata strappiddata è intazzata trimulendu di frebba. Bianca ebbi ghjustu u tempu di chjudali l’ochja è i bela ‘lla so picuredda caghjetini u silenziu. In vinochju s’avvicinò pà rinfriscassi in u fiumu lintendu una sola parola quasgi muta :
 

- «Aiutu !»
 

Vidindumi mi presi com’è l’ovu ‘ll’ Ascinzioni è addrizzendusi à a pidantrica abbaddatò :
 

- «Fighjola stu pezzu di petra

     pari una lacrima

     scunta

     una lacrima in dolu

     di Monte Rasu

     a to Muntagna

     a me agniddedda

     una lacrima scarpillinata

     pà tè

     tè a me picuredda tè

     i me ochja sò sicchi

     ma sta sera

     u me cori si scuppulighja

     o ‘lla me picuredda

     tù chì m’aiuteti à spizzicà vita

     da Bambiolu à Monti Rasu

     ti vidiu spassighjà

     rustuccendu lepru coria è barona

     impiindu u to uvareddu

     d’un buttighjeddu di latti

     tè a me agnedda tè

     Quist’annu sarà l’ultima muntanera

     è com’ùn ci sarà più tundera

     incù stu pezzu di petra nera

     lacrima muntagnola

     pà tè ‘lla me picuredda

     senza aspittà u branu

     faraghju l’ultima ricotta

     pà tè

     tè a me animaledda tè.»
 

L’anima antica ‘llu pasciali si ni svinì incù ‘llu muscu ‘lla frittata di brocciu friscu è di nepita.

Bianca feci u dolu ‘lla so pecura com’è i so vechji a d’insignetini, senza laccassi smuntà da i bastunati ‘lla sorti. Bianca tinia bonu, avia sempri rispettu è fedi in a so Muntagna, è ciò ch’idda ùn isminticava mai, hè chì l’omu un hè ancu fattu. Bianca sapìa chì sta forza chì livitighja da tanti seculi, a forza chì maturighja a cuscenza di l’Allevu ’lla Vita avia da sbuccià da a ghjuventù addispirata. Bianca avia a fedi in a so Tarra, pizzittinu d’universu.

Pà impiaghjà, Bianca mi sposi in una cascittedda à fiancu d’imbastu. Varchendu u fiumu à u Passu ‘lla Chjappa, l’asinu inciampò ed eu sbuleti. Lacrima nera impitrata mi sposi annant’à u ribbonu invirziu di Criviscia.

N’aghju vistu vaghjimi falà muscati di barona è di bassu. Brani cuddà ammeliniti di suchji meli è di muredda. È po ghjunsi quiddu ghjornu, una cosa straurdinaria m’accasi. Fubbi presu da una mani di piuma, un suffiu di tinnarezza mi fasciò, è com’un currintinu melinu melinu intesi :

- «O Ruspu, fighjola stu pezzu di petra nera, pari una goccia chì sgutta, mì, quì hè fertu com’è sì una martiddata l’avissi scuppulatu.»

Parlendu à u so ghjàcaru sciancu, l’omu mi missi in a so busgiacca è s’avvieti à capu in sù. Suvitendu u fiumu ghjunsi à l’anziana strada mulattera. Un’ uretta dopu lasciò u pasciali à mani manca, varcò l’Asinau, presi u chjassu ‘lli muvri chì codda à a bucca è piantendusi suffiò :

- «Aiò, o Rù, spuntinemucini quì à a surghjenti di Purrina.»

Da u so pusatoghju cacciò u tuvaddolu, u sposi in arba è u sciolsi : pani casgiu mela è fica sicchi si sparguddonu. A zucca ‘llu vinu vuleti esciasini ‘llu bughju ma u tappu di suvaru a ritesi suttu l’arichjona ‘lla busgiacca. Ruspu s’appruntava à stracquassi è l’omu u ritesi incù calchì paroli :
 

- «Attenti ‘llu me ghjàcaru fighjola accant’à tè

     a sà chì mi sè caru è quistu hè com’è tè

     stu fiori cusì beddu più chjaru ch’è ginziani

     s’hè cullucatu quì ‘n i ghjarguli di sti muntagni

     Cinqui casci turchini appinziati in stedda

     accoddani cinqu’altri tundi torti in ancinedda

     di Diana di l’Alba sariani sumenti

     è pà ùn sminticalla è tènala à menti

     ingnunu tramandò u dittu l’anticonu

     mandendu a so boci in tuttu u rughjonu

     ma vidindu stu fiori tutti s’innamuretini

     Amori chjusu Amori piattu à l’accordiu u chjametini.»
 

L’omu s’avvicinò ‘llu fiori sbucciatu, s’invinuchjò, sposi u nasu annant’à u cori è annasendulu dissi à pulmona ingonfii :

- «Senti, o Rù, annasa stu fiori, hè muscu di stedda, hè u muscu cilestu, annasa u me ghjàcaru u muscu l’amori, a sumenti ‘lla Vita.»

È sfarrachendu l’ochja, bulichendu in i casci di u toppu d’aquilegia, presi in i so dui mani, com’è s’iddu piddessi un piulaconu cascatu ‘llu so nidu, una petra :

- «O Rù, mì, stu pezzu di petra nera, pari una goccia chì sgutta, mì, quì hè fertu com’è sì una martiddata l’avissi scuppulatu, fighjolalu hè a mità asata di quiddu ch’aghju trovu in Criviscia !»

In vinochju, tinindulu in a so mani dritta, mi presi in a so mani manca è circhendu i dui feriti, ci avvicinò... scuppulatura scuppulatura... è com’è dui cippi liccini chì ani maciaratu tutta a nuttata in a cinnara, avvicinati, ci sfiaretimi :

- «O Rù, ùn si vidi mancu più a ferita, fighjola com’iddi si sò saldati, mì mì mì... dui pezzi di petra nera... dui lacrimi sguttati... sò duvintati... un cori parfettu !»

Cusì dicendu ci sposi in u toppu di l’Aquilegia bernadii, maraviddi sbucciati l’istatini in i ghjarguli di l’alti monti di Cintu Ritondu Rinosu è Bavedda. Certi pratindariani ancu chì quistu quì saria di a famida ‘lli Litarderei.

 

Ma ditimi ghjà, sti rusgiuledda di pulvariccia chì vultuliighjani in u spirionu ‘llu soli, nanzi d’essa cusì lighjeri, sarani stati tighjali, cantona o pezzi di petra nera ?Allora, sì u vosciu passu un ghjornu... ùn si sà mai... vi porta in i rughjona ‘lla Rocca... fighjuleti a cima di quiddu spinursali chì parti da Quenza è si ni capula à nurdiu in u zicavesu... fighjuleti bè, à umbria, à manca ‘lla Chiralbeta ‘llu Cuscionu passatu u casteddu d’Ornucciu, o à suliu à l’appiumbu ‘llu pasciali d’Asinau, vidareti un cantonu quatratu com’un martiddonu, è suttu, una pùppula sfracicata, ma fighjuletila bè è, mai ch’idda sia chì vo ùn vi smintichiti mì, chì oghji, seti Vo, u tistimoniu di sta Mimoria tramandata : una madunnuchja madunnina o madunnetta, ditila com’è vo vuleti ma sappiati chì seti un segnu ‘lla Vita Nova. Dicini ancu chì sariamu avviati è anc’assà chì ohimedda, basta chì no siamu vistuti da puteri pà stirpacci trà no, ùn ci hè ch’à veda i macedda umani chì no femu in u mondu interu. Allora pà ùn sminticà i segni chì i nosci vechji missini pà insignacci a strada, pà mantena a mimoria l’Omu, fighjuleti bè è vidareti chì quidda pùppula sfracicata sumidda à... un’ Alcudina.

 

Anghjulu Canarelli hè di Livia. Innamuratu di a natura corsa è di i so circondi rucchisgiani, Anghjulu si ghjova assai di a prosa puetica da scalpiddinà un universu muntagnolu beddu cà particulari.  

 

 

Pour être informé des derniers articles, inscrivez vous :

Commentaires

Cumpà 31/10/2009 19:08


Bona sera à voi, sò Cumpà di u foru, è disgraziamente, ùn scopru stu bloggu ch'è avà... (hà da esse longu di leghje tuttu, sopra tuttu chì pare interessante, stu bloggu, incù una manera di scriva
assai meglia ch'è a meia), è aghju avutu bisognu d'assai tempu per capì quale site voi (ma, cosa vulete, hè a fine di a ghjurnata è cumminciu podasse à esse stancu).
I vostri articuli sò veramente di qualità, è s'è vo vulete bè, v'invitu à raghjunghjecci in a cummunità virtuale "Adunita di i siti corsi", nant'à over-blog, in a quale simu dighjà quattru blogghi.
(http://www.over-blog.com/com-1125463190/Adunita_di_i_siti_corsi.html), è pensu chì a vostra presenza hè bramavule.
Aspettendu una risposta, vi salutu.


29/12/2009 16:31


Hè ditta cusì, m'affaccu o Cumpà.