Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

STATU È RAGHJONI

marceddu

 

N’aviami u vintisetti, di marzu, un vennari. Erani deci ori di sera. Un ghjurnalistu di a televisiò vinia d’annuncià a cundannazioni in appellu di Yvan Colonna à a prighjò in perpetuu cù 22 anni di peine de sûreté.

Tandu, aghju ricusatu à scriva. À scriva sopr’à un fattu chì vinia di succedi aval’avà. Mai vogliu rifletta sott’à l’intimizioni di l’attualità. Iè ma quì, hè attualità chì a dura. Chì cù u prima prucessu è dopu u sicondu, veni à palesu u stintu chì duranti à bona via quaranta anni, hà mossu a pulitica di a Francia in Corsica, qualivoglia fussini i guverni o l’omini à u capu di u guvernu : a raghjon di Statu *.

 

Appratenda ch’eddu saria imparziali u Statu in dimucrazia, saria quant’è à dì chì u mari hè seccu. Appratendu ch’eddu saria da serva u benistà di i citadini u Statu, saria quant’è cuntà chjachjari.

 

Ani custruitu l’idea chì Colonna era statu quiddu à ammazzà u prifettu Erignac.

Tutti quiddi chì mettini u suspettu sopr’à u scenariu accunciatu da a pulizia, a magistratura, u ministeru di l’internu, u prisidenti di a Ripublica, sò visti da numichi di u Statu è purtati à a penta ceca.

 

Duranti deci anni, cintunari di ghjenti arristati, 300 parsoni missi in asaminu in u filu di i prucidimenti antitarruristi, vali à dì cù una guardia à vista di quattru ghjorni eppo imprughjunati (détention provisoire dici l’amministrazioni) parechji mesi, un annu è più pà certi, nucenti è bè. U tintu Marcellu Lorenzi, Matteu Filidori, Colombani… sionti i filières. Da ghjugna à a cundannazioni di Castela è Andreuzzi… cù u fiascu ch`è no sapemu.

 

Ma ci vulia ch’eddi paghessini, qu’ils expient ces satanés nationalistes, tous ces Corses, pour avoir porté atteinte à ce que la France a de plus sacrée, l’idée d’une république une, indivisible et généreuse. Iè ma, altru cà mitulugia ùn hè quidda République une, indivisible et généreuse.

 

L’hà ditta à palesu l’avucatu di a partita civili Lemaire : « il ne faut pas oublier que c’est un préfet de la République qui a été assassiné ! ». È l’assassinu di un prifettu, pà u Statu francesu, hè l’ultima di i sfidi ch’eddu pò pata ; da ricustituì una faccia in quant’è puteri, bisogna à tutti patti à truvà unu reiu è à cundannallu.

 

Hè ‘ss’ idea LISTESSA chì a sustinutu l’azzioni di u Statu duranti più di quarant’ani in Corsica.

 

 

La loi l’11 di ghjinnaghju 1951, a leghji Deixonne pruibisci a lingua corsa ind’è l’insignamentu, raghjon di statu ; [

 

Di lugliu 1970, u rapportu di l’Hudson Institut hè missu à palesu cù i so cunclusioni pèssimi, raghjon di statu ;

 

In lu sissanta, si pensa à fà provi d’armi nuclearii in l’Argentella, raghjon di statu ;

 

In 1972, i cianghi rossi, raghjon di statu ;

 

In 1975, Aleria, raghjon di statu ;

 

U 6 di ghjinnaghju 1980, l’affari Bastelica/Fesch, raghjon di statu ;

 

Ma ùn vogliu cascà micca in a trappula paranuiaca. Intindimuci bè : hè a Francia ad essa malata di a so dimucrazia. Hè a Ripublica francesa ad essa inferma di nàscita, culpita da quidda malatia chì si chjama ghjacubinisimu.

 

L’affaire Dreyfus, raghjon di statu ;

 

U scandalu di Panama, raghjon di statu ;

 

I fucilati di 1917, raghjon di statu ;

 

Vichy è i ghjudei mandati in i campi di u starminiu, raghjon di statu ;

 

U bumbardamentu di Haiphong (Induscina) in 1946, raghjon di statu ;

 

A riprissioni di 1947 in Madagascar, raghjon di statu ;

 

A turtura in Algiria, raghjon di statu ;

 

L’affari Maurice Audin, raghjon di statu ;

 

L’affari Ben Barka, raghjon di statu ;

 

L’affari Markovic, raghjon di statu ;

 

l’Irlandesi di Vincennes, raghjon di statu ;

 

U Rwanda è a pulitica africana di a Francia, raghjon di statu ;

 

L’affari Julien Coupat

 

Turreti à leghja à Tocqueville  chì prisintava à Ripublica francesa com’è razza di rilighjò nata da a mistica rivuluziunaria.

 

Turreti à leghja à Suzanne Citron :

 

« La religion de la Révolution française imprégnait les pères fondateurs. Pour eux, la République, la nation, l’Etat désormais entre leurs mains, se confondaient en une seule mystique. Leur patriotisme exacerbé par la défaite de 1871, nourri de la lecture de Michelet, chantre d’une France messie du genre humain, inspirait le Petit Lavisse, le manuel phare de la République. « La République a fait de la France le pays le plus libre du monde », y lisait-on. Ce catéchisme républicain longtemps reproduit dans les manuels primaires ultérieurs, avait modelé l’inconscient collectif. N’est-il pas la référence implicite dans l’usage immodéré du mot République, de l’expression réflexe « la France pays des droits de l’Homme », alors que, ces dernières années, le passé glauque  – Vichy et les juifs, la torture en Algérie – c’est inscrit dans la mémoire collective.

Le constat est sans appel : l’histoire prétendument nationale, la vulgate républicaine écrite pour légitimer l’Etat, était l’histoire de la raison d’Etat triomphante. Le passé des vaincus, des victimes de cet Etat conquérant ou dominateur se dissolvait dans cette légitimité ».

Suzanne Citron, Mes lignes de démarcation, ed. Syllepse.

 

Ùn a sò s’è Colonna era di cumbrìccula cù quiddi chì ani pensu, appruntatu è missu in anda u prughjettu di tumbà à Erignac. Ma oghji chì hè oghji ci hè una cosa ch’e ni sò sicuru : ùn hè statu Yvan Colonna ad avellu ammazzatu à u prifettu.

Ma u Statu, par via di i sò raprisintenti i più alti (ministru di l’Internu, di a ghjustizia, prisidenti di a Ripublica), ùn si pò è ùn si voli sbuciardà.

 

Puteri è stituzioni si dani a mani da cumpona una virità bedda cà còmuda, un acconciu di virità bonu da piattà i falimenti i più tòrbidi è da sfrancassila da ogni umiliazioni, quandu chì i cittadini di ‘ssu paesi duvariani ricusà quidda cuncipitura di ghjustizia tessa à viltà ed iniquità. È ciò chì mi dà da fà, chì mi frastorna, hè u silenziu di u mondu puliticu ed intillituali, in Francia è in Corsica.

 

Accurrarà po pà a stabbilità di a ripublica francesa chì quiddu insignattuci sighi à tutti patti culpevulu ? S’edd’hè propiu cusì, ditila. Tandu sarà più semplici sarà.

 

* A raghjon di statu hè a nuzioni usata da u Statu da ghjustificà l’azzioni soi in u filu di i so intaressi naziunali calcichendu murali, drittu o qualivoglia fussini quidd’altri impirativi.

 

Marceddu Jureczek hè natu in Aiacciu in u 1973 è ci insegna u corsu in liceu prufissiunali. Prisidenti di l’associu Matina Latina, hè dinò capiridattori di a rivista Avali. Parechji di i soi i scritti, part’è più raconti è cronachi, sò stati publicati in U Taravu, in Bona Nova è le Journal de la Corse. U so prima rumanzu Ghjuventù Ghjuventù hà ricivutu u premiu 2007 di u libru corsu cuncessu da a Cullittività Tarrituriali di Corsica. U so sicondu libru, U Vantu di a Puvartà, un assaghju, hè sciutu in 2008.

      

 

 

Commentaires