Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

Caotidianu (2)

Marceddu

 

Capitulu 1

Zona d’attività

 


 

Rocade è al di là

  

73704682.jpg


È s’eddu si principiava cù un fast food ? Di pettu à mè, in pochi metri quatrati, veni riassunta l’andatura nova di a sucità corsa : bistecchi spinghinosi, vechji à cocia in u pisciu trascaldatu, salmi trà mezu à quatru tavuli, ziteddi appiccicati à a televisiò, essenza in cistarra, vitturi lucichi à venda.

Ma postu ch’eddu si tratta di dì ciò chì si vedi, ripigliemu : u Quick, una casa di riposu, un bicchimortu, un quartieru HLM, dui o trè pompi, un cuncissiunariu, cumerciu via, altru nudda cà cumerciu. Innò po, mi scusu, sò sirvizii sò. Hè cusì ch’eddu si dici in a novlingua di a sucità di u cunsumu. Stranu, ùn hè, comu c’intistemu à vulè falsificà a rialità.

Di pocu, hè ghjuntu à cumplittà u paisaghju u tettu sanguignu è curnutu di un Buffalo grill. Ebbè, era ora ! I cosi parini ch’eddi vachini puri puri da bè. Hè propiu u segnu chì vultemu infini à a nurmalità. Mancà, ùn mancaria mai cà calchì Mac Do. Ùn tricarà più tantu quiddu oramai.

Eccu dunqua u locu. Un locu vutatu tuttu quantu à u cunsumu. Una zona spuntata è sviluppatasi in ‘ss’ultimi quindici anni par annant’à ettari è ettari di licceti, pineti, prati è chjosi. Una zona chì oghji faci leia da Aiacciu à a piaghja di Sarrula Carcupinu, in una striscia guasgi cà cuntinua di catramu, cimentu è farru. U sonniu mischinu di una classa d’imprisarii vulendu acquistà un imperu. Saria una di quiddi zoni cumirciali, cusì ditta d’ « attività ». Quiddi arghji arragnati oramai in pirifiria di qualivoglia fussi l’accolta urbana da un capu à l’altru di l’Auropa è vittimi di l’umugeneizazioni di u paisaghju urbanu in l’emisferu uccidintali : parcheghji, magazeni, divizia, miseria suciali, via, un elduradu.

Da Balioni à Mezavia, da Mezavia à a Rocade aiaccina, quantunqua ch’eddi fussini  pochi i chilometri, i sculinemu tutti o guasgi chì si fianchieghjani. I Conforamà, Gedimat, Vial, King Jouets, Casà, Le Dénicheur, But, Intersport, Carrefour, Kiaby… ani stabilitu u regnu di un’architittura cìnica è cuntempurània : u centru cumirciali, u culleghju, u garasgiu, a sala di sport, a panittaria industriali… semu in a ripruduzzioni sistematica di un mudellu listessu : farru è cimentu pà u struttura, muri è tettu fatti di lamonu, aparturi larghi di vetru. Sò custruzzioni massicci, standardizati, neutri, fatti senza pinsà à ciò chì vinarà à aggrundassi in i so buddeddi. In quà è dà, uni pochi di pompi à essenza, una ghjisgiola, incatagnati, un pratu, un tarrenu abbandunatu, una scola, pecuri in banda, calchì vaccina chì s’intesta à pascia ‘ss’arba chì aghjà senti u cimentu… vistichi, ma chì sdicini quì, di a vita vera torra irreali. Ci hè dinò quiddu locu di prighera di i musulmani chì mi veni mali assai à chjamà da muschea, una scàtula di cimentu, un hangar, via, dundi l’iman s’intesta à cantà inni da glurificà

« l’altissimu è misiricordiosu criatori di l’universu ». Ma mi pari ch’edd’hè da mori chì l’Urdinatori di i i cosi è di l’essari avissi tralasciatu a noscia dimensioni.

Tenini sempri i so cugnomi corsi i lochi : a Cunfina, a Mezavia, a Funtana Secca, a Caldaniccia… ma ùn si pò dì ch’e no fussimi in Corsica da veru. Micca ch’eddu ci fussi un modu sputicamentu corsu pà accuncià stesi cumpagni dedicati à l’attività cumirciali. Voglia vena à dì chì quidda zona, cù u stradonu à dui o quattru vii, i so magazeni di farru è di cimentu alti quant’è palazzi, latiati à parcheghji smisurati, assumuglià, s’assumigliani à quidd’altri zoni listessi posti à l'entri di i cità è metropuli di Francia, di Spagna, d’Italia… Tutti quanti zoni artificiali chì si poni sustituì una à l’altra. Fora cà i marchi (è ancu), tuttu veni uguali. Ecculu u tarritoriu fattu à a sumiglia di l’universu com’è no u ci figuremu. In i tempi antichissimi era a cità a maghjina di u mondu cilestu.

S’edd’hè cosa vera quissa chì l’omu i so cridenzi, i stampa in terra, tandu hè bedda cà trista l’epica noscia. Larghi pezzi di ‘ss’isula, l’emu fasciati  una siconda peddi chì s’hà rosu a prima sana sana. U più stupenti, hè chì quiddu mondu adduppiatu pari d’essa divintatu evidenza à part’è più di i Corsi. Hà funziunatu più cà più l’ideulugia chì u susteni. Fendu ch’eddi turressini « naturali », sti paisaghji, tal’è quali calchì nicissità chì và cù i so pedi, si sò infrugnati in lu nosciu l’incuscenti cullittivu.

Pà uni beddi pochi, hè torra u locu prasceltu da spassighjà in sabatu è dumenica, l’unica surtita ch’eddu s’accunsintissi in famiglia.

Oramai, a zona d’attività saria u retrupianu da mova i nosci esistenzi.

Hè tuttu ad un tempu : a parti sunniata, u paradisu matirialistu bramatu, un pozzu neru, u spiritu di i tempi nosci postu fondu fondu in u vulgari. Quindi, u citadinu cunsumadori passa una vita incerta è vagabonda, piena à prìculi è prumessi in un tarritoriu tagliatu à pezzi da l’AK 47 di i gang.

 

 

 

Strattu di rialità 1

 

 

 

Quantu sò famigli cù sempri à coddu u sbelu di ùn pudecci sbuccà un ghjornu di più. À misurassi u soldu, à matriculà, attarzà, priveda. Anc’à quissi quì li succedi di sunnià in quandu in quandu. À spessu s’infattani in i supermarcati, cuntendu, da ùn spenda troppu. Di regula, ùn vali ad abbadà l’almanaccu, abbasta à fighjulà i carretti. Veni faciuli à induvinà, sionti a quantità di l’articuli, s’eddu hè cumenciu o fin di mesi. U supermarcatu hè regnu di a tintazioni. Omini è donni, ghjovani o vechji, si vedini, in forsa, davanti à un parastaghju, calchì incrochju in mani, tucchichjendulu, guardendulu, lighjendu a ticchetta una volta di più, eppo infini u sponini. È rifletti è rifletti, si dicini ch’eddi poni fà senza, una volta di più… Moltu più cù prezzi cumpagni ! Sbarabattuleghjani da quinci è da culandi, indicisi. À u capu à un’ora è più, ghjungnini in cascia, à carrettu vanu. A spesa hè stata poca, una volta di più. Cunturrendu, ci hè quantunqua u sintimu d’avè risparmiatu calchì soldu più ghjuvatoghju da a pighjò o i midicini di a criatura.

 

O tantu si dani à u compra compra apprufittendu di u pruvidinziali creditu à u cunsumu prupostu da i magazeni, di a biata cartulina verdi o turchina, sèsamu avvilinatu. Ma quantu sarani  ad avè tastu u dolci è à cacà l'amaru, indibitati più cà più ?

 

Eppo cuncorri u ghjornu chì torra inutuli u carrettu. A visita à u supermarcatu diventa  spassighjata è basta. Tandu, indù sbatta ? Hè longa a cumpagnia di i pratichi senza mancu un soldu da fà cantà un cecu, in cerca di calori, di prisenza umana. Càmpani di fandogni, cumprendu, spindaccendu, spulendu in i sonnii. Ùn accattani nudda. In tempu di festa, hè un veru curdogliu. Ci sò i lumi lucichenti, i culori  spampillulenti, a musica, i surrisi in bocca à la ghjenti, quidda benistanta, quidda guasta, chì s’appronta à a trimbera nataleccia.

 

À casu pigliemu par un dettu à Larenza…

 

Avvigni pian pianinu, à ochji sciuppati, ammaravigliata. Fighjulendu in quà è dà, s’induvina, in senu à edda, a lotta chì hè in traccia. Fighjula, tocca, sonnia davanti à i ghjoculi ammassati. Quantu li piaciaria à rigalà ‘ssu camiò di pumpieru à Pasqualeddu, è ‘ssa puppona vistuta ad usu principessa à Anna Laura. È i ghjoculi elettronichi, i ziteddi d’avali pari ch’eddi si n’intindissini senza avelli tocchi mai. Da un sonniu à quidd’altru, da ‘ssu ghjoculu à quiss’altru, faci ghjuramentu edda, un ghjornu, una volta sola, d’affistà natali in cundizioni. Prestu, nanzi ch’eddi fussini ingrandati troppu i figlioli !

À Larenza, ciò chì saria a so campa pà Natali, hè un paghju di scarpi da l’invirnata. Micca scarpi di lussu mirè, ùn hè di quissi,  edda. Ghjustu stivali, beddi, sodi è comudi, chì u pedi ùn lu mucani. Ci vurria ch’eddi a duressini assai. I soi, frusti in tuttu, l’hà ghjittati pocu fà… Pà a ghjacchetta si pò sempri attimpà, t’hà quidda ch’edd’hà buscu à u Succorsu Cattolicu. Pà u maritu, li rigalaria un beddu pull over, di quiddi caldi, è dinò un pantalonu. I soi, da tanti ch’eddi sò fralati, ùn li lava à bona via più, casu mai ch’eddi si sfranfagliessini. In tempu di festa, fora, ci hè u fretu, moltu più cù u corpu à lampionu !

Sempri in i sonnii, in i scaffali di a robba da magnà, cumponi edda unu ripastu di festa. A magnuscula, quidda di i techji chì s’imbotrani à salmonu affumicatu, chì s’impanzani à fegatu grassu, caviar ed altra robba squisita è facini falà cù vinu sceltu, mai l’hà tasta,  edda. Da carri, li piaciaria un beddu caprettu. Hè da un pizzettu ch’eddu ùn s’hè più annasatu u fumu di caprettu in casa. Fà chì vurriani inveci una di 'ssi ghjaddinacci i ziteddi. Ma ch’edda ni fussi à sminticà i dulciumi, un ceppu natalescu ghjacciatu, ni venini tonti i ziteddi, cù una butteglia di u sciampagnu u più bonu, è parchì nò ! In varda, ùn si tratta d’imbriacassi, ghjustu da senta u dolci calori di l’alcol nantu à i maschetti. Quantu li piaciaria di tralascià ùn fussi una stundaredda quidda vita di piombu !

 

Di fatti Larenza si pò dà ch’edda si chjamessi Maria, Lucia o Malika. Hè più cà certa ch’edda campa quì, accortu à no, ch’è no à scuntressimi suventi, senza dacci capu mancu.

 


 

 

 

Lost in supermarket

 

 

 

 


 

À u sboccu di a RN 193, puntiddata da tavuloni publicitarii com’è tanti frustati da addrizzacci megliu à u cunsumu ci hè Mezavia, u Géant Casinò. I so 7 000 metri quatrati è più. U sabatu dopu meziornu : ci batti à millaia u populu di u carrettu, fendu è brighendu da ingarrà a vittura à toccu à toccu cù i ranghati di i caddie, propiu di punta à l’intrata, da ùn avè à marchjà troppu. Sò millai à fà a fila à i quaranta casci di pagamentu chì sboccani in una galaria cù varii cumerci.

I carretti, com'è scrochji à rutuleddi, passani è venini, carchi ziffi, cù indrentu ziteddi grassottuli aghjumpati, a bocca fatta di cicculata, i biscotti, attempu compri, attempu inghjuttiti. I masci è i femini, più in anni, di l’adulescenza dislaziata, à l’usu zombi, facini codd’è fala trà magazeni di panni à a moda, butteghi di teleffunini è parfumaria à bon pattu.

Ci sò quiddi chì a si pigliani frumbata. L’altri, losci losci, uchjichjeghjani ogni particularu in i vitrini, colmi è lucichi chì spechjani a maghjina di una sucità à l’imbrunì. Bastarani i lumi neon in i vitrini da fà rinculà l’ombra chì ogni ghjornu si faci più pagna ?

Chì cusì fendu si pidieghja razza di paesi di cuccagna. Hè cunnoscia a campazioni d’avvigna un giardinu edènicu chì deci chilometri di tubi da cundiziunà l’aria ci facini sminticà timpurali è staghjoni, in l’eterna primavera di u compra compra. Sippurmai ch’è no fussimi turbati da calchì candedda istrosa : bisogna à cuncintrassi nant’à ciò chì conta da veru quì.

Cumprà, à vulenni più, a robba da magnà pà a sittimana, i mobuli pà a casa, i panni da u ziteddu, un mazzulu di fiori, l’ultimu rumanzu di Marc Lévy, u teleffuninu u più sufisticatu, un CD di i Clash, calchì DVD, ponasi da bia u cocà o ancu puri da magnaccià in caffettaria, mamma babbu è figlioli.

U marcatu, altru nudda ma u marcatu è quiddu tardaveddu chì vi sticchisci da capu à pedi à tempu vistu è compru quiddu screnu plasma, quiddu canapè… u goiu natu da u piaceri di u cunsumu, d’essa in cumunioni cù tutti, d’essa partitanti di ‘ssu mondu, pà una stonda corta corta almenu, eppuri, quantu si godi tandu, franchendu al di là u spechju, saltendu da di viotu, tralascendu a solita noia, da riugna l’universu framanti, ridanciu, abbagliulanti, di a cuntrata di i maravigli. È sciaccassi quiddu shoot di l’adrenalina chì parè, pari calchì urgasmu.

Eccu ciò ch’eddi pruponini i supermarcati d’oghji : unu riassuntu di i nosci esistenzi in un intisgiu di ghjenti è di cosi. Una pratesa universalità sopr’à parechji piani è un parcheghju, da strigna u mondu mudernu. Steti puri spinsirati : nè crisa di l’ecunumia nè influenza apucalittica ùn sò boni à fà ch’edda piantessi a mossa cuntinua di u frazu.

Milingata dundi tuttu veni uguali, senza diffarenza da a fetta di prisuttu à u libru di fìsica quàntica, missi ch’eddi sò, buleghji, in u carrettu. Una mostra di quatri d’artisti di u lucali in a navata principali accantu ma piatti da l’ultima BMW à vadagnà, patt’è cundizioni di participà à u nosciu ghjocu cuncorsu… bundenza di robba è dicetta di cultura.

Un locu calamita chì cuncogli l'ultimi pisticciuli di vita suciali di u circondu, locu di scontru, à u bar di u centru cumirciali, di l'amichi è i cunniscenzi infattati à casu in i « rayons », puntendu u carrettu, « amichi » chì vinaria mali à vedali in altrò.

Cori pulsanti di u nosciu mondu, à u sbuccà d'ogni strada, chì reghji u cutidianu di tutti, vista in fughjina di a vita in u futuru, tutta para, disciplinata, cundiziunata, climatizata, adduppiata, una vita senza leia varuna cù locu è storia. Una vita senza più nè diffarenzi nè inghjustizii, sdrutti in a divizia, a facilità, u frazu di a biatitudina matiriali tutalizanti.

Da fora, nantu à i muri di u parcheghju, dui impiigati cuscinzosi battini da sguassà l’IFF scrittu à a pittura nera.

Hè riisciuta a tecnica à facci cridanci, à turbà u principiu di a rialità suciali. À u Géant Casinò, quiddi prisenti parini listessi tutti, uguali ricchi è povari, budditi ch'eddi si sariani in una classa è basta, quidda di i cunsumadori, cù brami, stinti, passioni listessi, via, listessi cunfini à l'urizonti. Pari sparitu u soldu veru cù a carta à pagamentu è i crediti di cunsumu. Pari canciddatu u prucessu longu longu di pruduzzioni iniziatu in quiddi usini buddenti è lutinosi da diti chinesi è indiani, u sottu prulitariatu d'oghji, fin'à i parastaghji spampillulenti di i nosci magazeni.

Semu nantu à Aiacciu, cù una mirria di manca. Ma a tassa prufissiunali di l’iper ed altri supermarcarti faci crescia a cascia di a cumuna. Tandu…

Tandu civa s’è a custruzzioni di l’attrazzi strutturali sò attimpati una volta di più. S’alzani in un ammè palazzi di farru è di vetru, cuncintrati di forza è di ricchezza, chì guasgi guasgi vinariani à sbuciardà l’idea ch’edd’hè sottusviluppata a Corsica è povara.

Forsa ch’edda devi cunvena à tutti cusì. Ma pudaraghju campà com'edda mi pari à mè oghji ? Innò chì si faci com'eddu si pò è com'eddi voni eddi, com'eddi vendini eddi... Oghji ghjornu, o vulella o ùn vulella, sogu impastughjatu, cullabureghju à a festa ubligatoria di u marcatu in perpetuu : u cumprà è u cumparì, bisogni assuluti è indòmiti, ci facini da cuscenza. Chì scelta t’avaremu, altru à participà, ogni ghjornu, à ciò chì ci rodi ?

Ci hà vintu u soldu ; ci pussedi. I nosci valori antichi ùn sò più. U soldu hè l'UNICU valori.

 

Commentaires