Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

Caotidianu (3)

marceddu

 

Capitulu 2

Pirifiria

 

 

 

Caotidianu

 

 

76530514.jpg 

À dilla franca, in paesi ùn ci battu tantu. U vecu da luntanu. Eiu passu in vittura, nantu à u stradonu, tagliu fondu, chì spicca a vaddi di a Gravona in dui ribbi, chì mai più si scontrani.

In piaghja, in i fondi, in quà è dà, un poghju anticu, magnatu da lutissamenti è casi novi. U caffè di u locu l’ani battezu cù u nomu di calchì cità esòtica. Ci hè un picculu supermarcatu, a ciandarmaria, a mirria annessa, a farmacia è u duttori. Hè quì chì si cullucheghja a poca attività di u circondu. Hè quì ch’eddu si prova à accastizzà i pochi brasgi di vita suciali.

 

Ci vocu à l’uccasioni in I Peri. L’arrochju, u francu, ma l’avvignu pocu è micca u paesi. Pà quiddi carrughji, ùn ci marchju più. Vocu è mi piantu, in vittura, à u locu pricisu ch’aghju dicisu di tuccà. È cusì, pari ch’eddi fussini spariti in calchì fumaccionu stretti, strittioli, piazzi è piazzetti di tandu. Ùn vò dì.

 

Da l’altra banda di a vaddi, à fiancu di muntagna, eccu à Sàrrula Carcupinu è l’àrgani in cor di paesi chì dicini u dinamisimu, a voglia di u ghjovanu merri, eredu di una vechja sterpa clanista. Culandi dà, s’alza una casa di riposu pà i vichjareddi, forsa dinò calchì sala pà i festi o mediateca ch' edda fussi.

Ma cuscenti chì l’avvena ùn hè quì, à vicinu à a sarra, u merri faci custruì casi novi longu à a strada naziunali, a muntagna à i vechji è a piaghja à i ghjovani, via una virsioni ughjerna è adumbarciata di l’anticu pruverbiu : « loda a muntagna ma teni a piaghja ».

Ed hè cusì chì longu à a R.N.193, a cità s’hè invintata razza di pirifiria. Oramai, i paesi di u circondu sò elementi di un tarritoriu urbanu beddu cà più stesu, a C.A.P.A. (Collectivité d’Agglomérations du Pays Ajaccien), vali à dì Appiettu, Alata, Afà, Villanova, I Vaddi di Mezana, Sàrrula Carcupinu, Cùtuli è Curtichjatu, I Peri, Tàvacu aduniti daretu à Aiacciu, a CITÀ VERA, surpendusi ogni energia, ogni mossa, ogni voglia, spietata. 

 

Quiddu pezzu di vaddi, u meiu, in via d’essa rurbanizata si chjama A Piraccia.

Da sapè ciò ch’eddi pariani paesi è piaghja in i tempi andati, bisogna à accuntintassi di i futtugraffii parechji, in neru è biancu è di l’album in vendita in libraria. Cù franasia, si faci racolta di i ritratti di u passatu, da rassicurassi sopr’à u prisenti inciadditu cù libri di com’edd’era innanzi, di tempi fà, di una staghjoni chì ci paria più filici.

Mancu à dilla hè cambiatu u paesi, hè cambiatu chì basta ancu. Hà cunnisciutu i muti ch’edd’ani patutu tutti quanti i campagni da un capu à quidd’altru di l’Auropa è al di là. Ogni epica hà arricatu a so nuvità : l’acqua in i casi, l’itricità, i stradoni incatramati, u cunduttu, i stretti alluminati, a televisiò, l’Internet…

Parò, I Peri si currispondini sempri bè bè à l’idea ch’e mi figurgu eiu di u paesi corsu : a cappedda, u campanili altu, a ghjesgia maiori, i casi di petra zuccata o scialbati, accumpulati, i tetti di coppi, un chjosu, un sameri, a funtana, u tempu sticchitu è severu… Eppuri u paesi ùn esisti più. Unu chì ci sbuccaria in cor di meziornu, altru cà casi bioti ùn truvaria. Micca ch’eddu fussi pupulati assai u paesi, mirè ! Quì dinò morini i vechji è durghjulani i pochi ghjovani. Quì dinò, aspettani casoni ch’eddi si fessini i spartimenti, ch’eddi vultessini i patroni statinanti, cù u stolu di u parintatu spalluzzatu o ch`eddi si ni falessini i tetti. Ma vogliu parlà nanzi di i casi abitati da un capu di l’annu à quidd’altru. Vogliu parlà di ‘ssi casi chì, di ghjornu, stani chjusi, stanghittati è tralasciati sin’à sera. Casi disirtati in modu rigulari, chì ani torru u paesi in calchì lutissamentu di pirifiria. Ancu quì, semu affibbiati à i reguli di u mondu urbanu. A mani matina si sbiota : ci sò quiddi, ma pochi, chì mova ùn movani tantu luntanu è travagliani in i magazeni di a zona d’attività. Inveci part’è più, l’attivi di u paesi, si ni falani in Aiacciu è, par istrada, si lacani i ziteddi à i firmati di i carri sculari o pà i più furtunati di i ziteddi è i più in anni, à u pedi di u cataru, à u culleghju, in Balioni. Ma tutti, o vulella o ùn vulella, a si pigliani in avanza è movini trà sett’ori è sett’ori è mezu di mani da pruvà à schisgià, ma senza riescia mai, l’ingorghi à l’entri d’Aiacciu. Or dunqua, in ‘ssu mentri, u paesi hè in gran sussuru. Dopu, ma più tardi in a matinata, hè u rimori, menu pricipitatu, di i vichjetti in i ritirata, ma sempri in gamba, chì movini in vittura da fassi dui spesi à u supermarcatu, u roncu cuntinuu di i pochi trattori o ancu u pass’è veni di ‘ssi camiò carchi à rena, mattoni, cimentu, pà i casi chì spuntani, ma guasgi sempri in piaghja.

 

A sera à l’abrucata si ritira a vita davant’à a televisiò. Eppuri in carrughju, ci poni fà creda i vitturi ch’edd’hè pienu u paesi.

U carrughu ùn hè più quiddu locu di scontru, publicu, apartu, di i discursati ad altu, di i spassighjati. Hè torru strada è basta. Una via chì si piglia da lacà u locu.

Chì ùn si campa più in paesi o puri in cità, si campa à bona via par istrada. L’ani capita bè è megliu quiddi di a Cullittività Tarrituriali di Corsica è i cumuni isulani. Cusì n’ani fattu a so priurità. Stradoni ed arghjini. Ghjiratondi è tunnelli. Farru è catramu.

A maghjina chì mi veni hè quidda di una cumunità in anda sempri, chì l’immubilità li saria cuntraria.

Semu liati mani è pedi è catapughjati in una piena cuntinua d’essari è di cosi, un currenti chì viaghja medienti una reta zeppa zeppa di fili, di fibri ottichi, di canaletti, di tubi, di stradi, di satelliti. Un currenti chì ci porta, chì ci mubilizeghja, ancu puri par ùn vulella. Si sò multiplicati chì basta i mezi da cumunicà è movasi, arranchenduci à a rialità di u locu cù a tintazioni d’essa sempri in altrò : un altrò di di più top, move, fashion.

Sta maghjina ch’e diciu cuntrasteghja cù quidda tradiziunali di di più ch’e mi facìu, o ch’e mi facciu, di a sucità paisana è campagnola. Hè vera chì si pudiani tramutà, muntanendu è impiaghjendu, paesi sani ; hè vera chì l’esiliu di i Corsi pà ‘ssi Franci è ‘ssi culunii chjamava sempri unu ritornu statinali brevu è intensu. Ma oghji, a mubilità ci hè imposta à tutti. È cusì si n'hè morta l'idea di vicinanza. ‘Ssu numadisimu mudernu, s’eddu pò, in quandu in quandu, ramintà à certi l’antichi impiaghjeri è muntaneri, si currispondi di di più cù quidda pindenza glubali chì vedi i pupulazioni, ma à milioni, tramutassi da un cuntinenti à quidd’altru.

 

 

 

Strattu di rialità 2

 

 

 

A mani…

 

À l’alba si parti, à a spiccera, in iritardu à li volti, innò à spessu, in zerga, dighjà. U ziteddu s’hè imbruttatu u pantalonu, a camisgia hè ancu à stirà, brioni, ghjastemmi, litichi, indù sò i chjavi, l’ai allucati tù, sempri a listessa cumedia, i me batterchji lacali stà ind’eddi sò, ùn vogliu più ch’è tù i tucchessi, in zerga, ci licinziemu senza licinziacci, nè basgiu nè mottu, à mutulera, in zerga, dighjà. In vittura, tutti, avanti, chì cumanda cusì a vita. Tutt’ugnunu a soia. Chì comu fà senza, chì ùn si travaglia po micca à u listessu locu, chì u ziteddu và a scola.

 

Trafficu, ingorghi, dighjà, à setti ori di mani… si faci a fila, s’avanza à u passu di a ghjaddina… ugnunu in vittura soia, pusati unu daretu à l’altru, unu accantu à l’altru, l’ochji fissati à l’urizonti strettu di u culu di a vittura di davanti è casu mai si scuntressini i sguardi, sò in catarochju. Tù à nimu fighjuli… unu, più astutu, cerca di duppià à tutti.

 

 

 

A sera…

 

Vitturi è ghjenti infurialati. Franasia.

Versu cinqui o sei ori,  torra  a listessa corsa da fughja u locu chì a mani stessa ai cercu di riugna cù tamanta fretta, a cità, l’ingorghi, a zerga. Ugnunu par sè. A corsa da ghjugna u prima à u focu di circulazioni. Vitturi à cintunari. Sortaci, u più prestu pussibili, eccu ciò ch’è tù pensi, eccu ciò ch’è tù vò, nanzi à l’altri, malgradu quidd'altri. Stizza. Rispettu più, abulita l’urbanità, chì da tè ùn ani eddi. Rabbia. Ti portani odiu, li porti odiu daretu à i to spichjetti neri, ti culpiscini di u sguardu pà un postu più in altu in a fila, da stabilì i ghjerarchii novi di u mondu mudernu. Frustrazioni. Zerga. ‘Ssu risintimentu stranu chì ti stà addossu è chì ti faci da cuscenza à tè, à noi altri, cunsumadori di chilometri.

L’indiffarenza hè ginirali, a malvaghjità cutidiana.

U dulori di u ritornu in casa, sottu à i cateni luminosi di i lampioni. I diti agguantani u chjerchju, mancu vedi, mancu senti, tù seria seria : in faccia mancu a vistica di calchì surrisu passatu o à vena. Eddu, hè com’è a mascara di quiddi ghjaccenti di i sipulcri. Tù ti sticchisci in l’attu silinziosu di quiddu rituali fattu da tutti, in calchì corsu aiaccinu, di pettu à u mari, in via di calchì carrughju, di una pirifiria qualunqua : à u centru di u mondu.

 


 

Accilirazioni

 

 

 

Sò crisciuti à i numari infiniti i scusi da facci mova da quinci è da quandi. Oramai, viaghji in vittura è ingorghi sò divintati cumpunenti essenziali di u nosciu u campà. L’obligu pà i babbi è i mammi di purtà i ziteddi à a scola, à u duttori, à u sport, à u sinemà cù a spesa à l’hyper è i soliti visiti in quiddi magazeni di a zona d’attività, c’imponini una ghjustra cuntinua contr’à u tempu. Sò stati scatabuttati i ritmi di a noscia esistenza, hè cambiata chì basta a noscia manera di viva. A vittura, a meia, a voscia, reghji viti, tempu è locu. Ad ogni ora, in ignalocu, neri è frumbati, filani i chilometri da sottu à i pneumatichi, purtendu corpi immatriculati in cerca di marcanzii ideali. Privi di vittura, mancu più avemu anchi da caminà. Chì i bisogni è i lochi da suddesfalli, sò à l’infora oramai è alluntanati.

I zoni d’attività è quiddi hyper marcati sprapusitati sò ancu accunciati à bedd’apposta pà i nosci attrazzi à rotuli, da scunvinciaci ancu di ùn entra in cità chì culandi dà, lochi da ingarrassi ùn ci n’hè. Hè cusì chì pà uni beddi pochi di ziteddi di u circondu, Aiacciu, altru cà cullana di parcheghji, supermarcati ed altri galarii cumirciali ùn hè. Cusì s’arradicheghja in i menti ghjuvanili chì si và in cità pà cunsumà è basta.

 

Ci hà adduppiatu a vittura. Semu dipindenti semu. Ci faci mutà. À tal segnu chì casu mai unu a si tucchessi à pedi, par cantu di stradonu è si faci ghjucà à a risa. Senza parlà di l’amatori di bissicletta, ancu ancu s’eddi sò spurtivi, ma s’eddi ùn ani altru mezu da movasi, tandu… tandu si ni fermani à u pedi di a piramida suciali. Comu viva senza vittura ? Chì hè a vittura à fà l’omu. Chì hè un mezu putenti da classificacci in a ghjirarchia suciali. S’edd’ùn hè calchì jogger, oghji, ùn sariani cà l’andacciani, in a menti cumuna, i privi di casa à pigliassila à pedi. Quiddu chì caminà, camina, hè chì altru ùn pò fà. È quiddi pumataghji chì s’intestani à fà u stop ori è ori. Puri quiddi chì tribbulani da una stedda à l’altra da strappassi calchì euro, quiddi chì sò disuccupati, i sbaiuccati, l’ani tutti a vittura. Ossinnò pronti sò à dissanguinassi, à misurassi u cibu da avenni una. Basta ch’eddi viaghjessini.

 

S'edd'hè un obligu pà quiddi chì si ni stani luntanu da u centru ecunomicu aiaccinu, hè à tempu è màsimu nicissità suciali.

Tistimunieghja a vittura, moltu più s’edd’hè cara è lussanti, di a pratesa riescita suciali, prufissiunali a vittura. Dici, ancu puri senza ch’è v’avissiti a voglia di palisalla, di ghjustificavvi, chì i soldi ci sò… o ch`è vo feti neci. Cuntribuisci l’automobili à stabilì razza di sucità chì altru cà a praforma ùn abbada. Ùn basta più ad essa benistanti, bisogna à avenni a cumparsa, veni à dì, à pusseda l’ughjetti carattarìstichi, sìmbuli, di ricchezza. Ancu peghju, ci faci mutà carattaru, valori, cridenzi a vittura.

 

Semu pronti à sacrificà i pochi soldi risparmiati pà a vittura, semu ghjunti à u puntu di sacrificaddi ancu u fior di a noscia ghjuventù. Ùn possu fà un chilometru senza veda, à cantu di strada, placchi scuri di granitu. Sò fiuriti tuttu l’annu, bisognu ùn ci hè di aspittà i Santi è i Morti. Tutti sò urnati cù u ritrattu scialbidu è ridanciu di ‘ssu ghjuvanottu, di ‘ssa ghjuvanetta, morti par istrada, in una bara micanizata. À li volti, un candelu accesu (o u più à spessu avali unu di quiddi candeli elettrichi, da chì u frulu di i vitturi ùn lu stuppinessi) com’è tistimoniu di unu ricordu adduluratu sempri frescu, troppu frescu.

Ùn li possu veda senza pinsà à l'usu anticu è tralasciatu di u muchju. Ma noi altri chì li passemu accortu ùn lampemu più n'hè petri nè rochji, mancu unu sguardu. Sò spinti i vindetti, l’accidenti stradali l’anni tacchiati cù u stolu di i vittimi.

Ma u prugressu, aiò ! U prugressu è a vitezza. Tandu, i morti par istradi, terra addossu ! D’altrondi, capulatu un tempu, ùn ci femu mancu più casu, acciliremu ancu, franchenduli, da sminticalli megliu, da scugnurà forsa calchì malamorti. U mali è u dannu ùn sò sempri da l’altri ? Da mè micca. Chì mi pò accada infini in u me 4X4 imbardatu à incrochji di prutizzioni elettrònichi ? Cusì, scucciuratu, rassirinatu, si pò incalcà un’antra vitezza è viaghjà in frombu, trà mezu à ‘ssu cimiteriu tramutatusi longu à i stradoni.

A vitezza hè una vucazioni cullittiva. Hè torra razza d’istituzioni dundi a libartà, u privileghju di l’accilirazioni, altru cà piattà l’ubidienza fonda à una norma suciali interiurizata ùn faci.

 

Sò torri i nosci viti sommi di stondi individuali (vittura, travagliu, sport, surtiti, spesa, famiglia, televisiò, internet, ghjochi video, sms, mp3…). U Nosciu campà hè pari à calchì corsa frenètica, in una ricerca d’accilirazioni cuntìnua. È più acciliremu, menu ferma tempu à a cumunanza, a frizzioni, u scambiu, u barattu. Ogni cosa, a più minima cosa, da falla, semu soli. Ricordi di ciò ch’è no femu, di ‘ssi stondi di vita intazzata ni tinimu à bona via pocu è micca. Ma infini comu fà da ricurdassi u ghjornu passatu quandu ci sò stati tanti è tanti stondi diffarenti, senza liamu da una à quidd’altra ? 

 

Quand’è no fighjulemu pà u vetru di a vittura, sfila u paisaghju, sfila chì mancu a li femu à tenalu à menti, à cunnoscialu. Semu in u trenu di u smintecu. Da quì à vint’anni, qualessi sarani po i futtugraffi ch’è no circaremu d’accoglia in li nosci l’album ?

Commentaires