Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

Caotidianu (4)

marceddu




Capitulu 3

Gravona

 

 


Rurbani tutti

 

 

lotissement.jpg 

quand’e pensu à a Gravona, ùn hè mancu stampa l’idea di u disertu chì mi veni à gallu di menti. À u cuntrariu. Più và più veni pupulata a vaddi. Basta à veda i

1 500 abitanti di a cumuna di I Peri. Part’è più sò ghjugniticci freschi freschi. S’eddi sò uni beddi pochi i paisani ad essa impiaghjati, i migranti, i « Piracci novi » scalani tutti o guasgi da a cità vicina, Aiacciu, da Francia o d’altrò, ma sempri da calchì cità.

À senta dì i giograffi, saria quissa una pindenza fundiva di l’epica noscia, una mossa naziunali u fattu di veda u citadinu lacassi a cità pà a pirifiria, l’urbanu pà u rurbanu (neulugisimu fattu cù i paroli rurali ed urbanu).

Fatt’è fini chì, in ignalocu dunqua, a cità si magna a campagna. Ma attenti chì ùn hè u paisaghju ad urbanizassi, o pocu ; quissa inveci hè in a pirifiaria accortu à a cità, com’è in A Mezavia è in Balioni. Anzi sariani i maneri d’essa. Un citadinu chì và à stassini in campagna, cun eddu si porta appressu a cità è i so cumpurtamenti citadineschi.

 

 À tempu à a crescita di i cumuni in u circondu aiaccinu, appuculiscini i terri à prò di l’agricultura, s’arritruisci u stolu di i campagnoli. In piaghja, i chjassi, i camini, i violi, i stretti, par forza di i venditi, i sparteri, di i casi è di l’acconci muderni, sò stati scatabuttati, allargati, incatramati, sguassati : cusì fendu, s’hè ammansata a campagna chì l’emu resa capiscitoghja di di più da noi altri citadini. I pochi casi vechji, suligni, i casetti usati da pastori sò accampati da villà. Hè mutatu u sensu di u locu : da campagnolu hè torru risidinziali.

 

L’agricultori, chì ùn hè tantu, erani sempri i più numarosi, oramai sò pà scumpariscia. I campagnoli vechji, l’antichi campagnoli, quidd’omini è donni attaccati à a terra com’è calchì ciaccara, ùn sò più. L’agricultori sò menu di quattru parcentu di i « Corsi » attivi d’oghji. Sò stati spussissati di u locu. Da quì à pocu, a maistria di u paisaghju chì si vedi mancu più soia sarà. S’approntani dighjà à ammantassi di neru.

 

Longu à u frisgiu di catramu naziunali 193 da Aiacciu à Bastia, sò spuntati casi novi, listessi tutti o guasgi, chì basta à vedali da induvinà quandu sò stati fatti : 70a, 80a, 90a o 2000a, ad ogni epica u so modu di casamentu, « tradiziunali », neopruvinziali, neocorsu, neo…

L’abitanti di ‘ssi casi novi, accumpulati in risidenzi è lutissamenti, cumponini un gruppu litessu, cù dui vitturi è più, un ghjacaru o/è una ghjatta, ritirati o maritati cù dui ziteddi di regula, fighjulani à listessa ora i listessi prugrammi televisivi, venini tonti pà i feuillettons, sò incantati da i rivisti people, si nutriscini cù i listessi cibi cunghjilati è dissapiti, compri à listessu locu, cacciati da u listessu frigò amiricanu, in i listessi cucini sbalangati nantu à u salottu…

U risultatu parturisci di un paradossu : cusì si forma un ambienti chì campagna ùn hè più.  Hè un locu dundi u liamu suciali acquista un carattaru più cà tioricu. Una beffa di paesi, senza cuscenza di l’unità di u vicinatu, sparitu daretu à muri alti, catari elettrichi è esistenzi impermeabili. Tali è quali in calchì palazzu via. ‘Ssu sintimu chì facia un paesi, quiddu di l’aiutu, di a primura pà i faccendi, i guai, i gioii di l’altru, ùn hè più. I primi à risentala è à patala, sò ‘ssi Piracci chì veda ùn si vedini à spessu :  vechji figli,  Rmisti1, vichjareddi abbandunati è soli. A si campacceghjani cù u pocu è l’assai. Certi ùn ani sceltu di stassini quì, ma altru ùn poni fà chì li vinaria mali à pighjunassi una casa in cità cù u Rmi o u Rsa, a campa chì ci hè quidda casa di famiglia in paesi ; si mettini da par eddi à u ritiru2.

Oramai campagna è cità parlani un linguaghju listessu oghji.

 

 

 

 

 

Strattu di rialità 3

 

 

In una vitturaccia sculurita di carruzzaria, tarrulata è arrughjinita, stani in dui. Senza più voglia d'andà in docu, for di buscassi calchì soldu, stani in dui, in una stretta scantata d'Asprettu, in Aiacciu. In una vittura chì li faci da casa, agrondani i so viti sgangarati. Ghjaseppu ed Andria, chjamemuli cusì, sò frateddi. Tremindui ani capulatu i cinquant'anni. Andria, u scafiulatu, ùn travaglia più. Chì travaglià ùn pò. Ci hè chì saria malatu. Ad ogni ansciata, ad ogni parlatura longa troppu, u si scuzzula una tossa canina, ma di quiddi è chì a dura, minuti sani. Ghjaseppu, capibiancu è furzacutu, si ni và ogni ghjornu à bon'ora à u ghjiratondu d'Asprettu. Aspetta ch'eddi s'arrighjessini muradori ed altri imprisarii. Faci u ghjurnatanti, à u neru. Zappa, carreghja mattoni è sacchi, sò da eddu i faccendi pinosi, da eddu è da quiddi Arabi, quiddi Pulunesi senza casa, chì vattani u picup è u camiò. Ma à li volti ùn veni nimu à ricutali. Tandu, a sani Ghjaseppu ed Andria chì li tuccarà à movasi voltu à u magazenu Carrefour o u Leclerc. Micca ch'eddi t'avissini soldi à spindaccià. Sò à u dismenu.

Cù un carrettu zoppu, vani à biffà i nosci usi di u cunsumu. S'avviani a sera, à capu bassu, prima ch'eddi chjudissini i magazeni. Ghunghjini pà daretu, da passà inavvisti da part'è più di a ghjenti inaffaracciata. Casu mai chì calchiadunu i cunniscissi, chì sò di ‘ssu circondu Ghjaseppu ed Andria. À u purtonu dundi si cunsegna a robba ghjunta da i camiò, aspettani. Quandu si aprani i porti di farru, sani ch'edd'hè ora. Cumpariscini container tamanti, colmi à sacchi neri, à robba di tutti i maneri, prisuttu, biscotti, caghjati è casgi passati di data, carri insacchittata, insalata sfracica, bannani macchi, citrò sciacciati, pani seccu, pasta in salsa... tutta robba tricaticcia, scunviata, avanzata ma bona sempri, chì venda ùn si pudarà venda à i cunsumadori vizzetti.

 

Ghjaseppu ed Andria si dani di mani. In i rumenzuli di u supermarcatu, buscani a so pruvenda pà a sittimana. Prima, à l'impiigati di u magazenu li diciani ancu ch'edd'erani di quiddi paisani in cerca di u magnà pà i porchi... ma avali, ùn dicini più nudda. Da chì fà ? Megliu à empia u carrettu, à carcassi à carchera, ancu puri s'è tuttu ùn si pò tena o magnà. Megliu à spicciassi, chì 'ssi pochi tempi, soli ùn sò più soli ad aspittà ch'eddu si sbalanghessi u purtonu di daretu.

 

 

 

Hè pà sguagliassi un mondu à tempu à l’attività chì li facia da punteddu, chì li arricava matirialità. A terra ribaldunata hè scunfitta pà l’omu. Ci scurdemu in chì modu si campava quì, ci scurdemu in chì manera si pinsava u mondu. cusì fendu, emu mozzu u sonniu chì ci facia da cuscenza.

A campagna, senza più campagnoli, scumparisci pidiata è astracata da u citadinu in cerca di natura. È chì hè a natura pà ‘ssu nosciu citadinu ? Altru cà l’uppostu di a cità, via. À u citadinu affannatu li ci voli a calma, u silenziu, l’aria pura, un ambienti da appacià i so rimorsi eculogichi : u gasu carbonicu chì impuzzichisci l’aria, u bancu di ghjacciu chì sdrughji, i diluri, i tsunami, l’epidemii, a populazioni chì cresci, l’erusioni di i tarreni, a scumparsa di i spezii animali…  è tutti ‘ssi danni ghjugnariani à fini cù una casa in campagna, un paghju di vitturi, ettari di terri agriculi cundannati, lochi incatramati è cimintati…

 

Una natura vinduta sottu à a forma di riserva naturali, di ritrupianu à villà, di paradisu francu da a pulluzioni, via una natura riciclata.

 

Hè un pinsamentu d’oghji nutritu da a moda (o u fundamintalisimu) eculògicu chì brama una natura « schietta », ancu à svirghjinà, da scopra sbalanghendu u balconu è di u cunsumarisimu chì chjama à goda aval’avà ciò chì si compra, arrichenduci razza di pratinzioni, di praputenza, di drittu inalienabili : aghju compru, sò ind’è mè, facciu ciò chì pari à mè è ùn viniti à tribbulammi. Idea di u « satisfait ou remboursé » pà cunsumadori ghjilosi, inaspriti, intullarenti.

Ma a natura senza i bandi di l’animali chì cacani, senza i runcati samirini, senza l’abbaghji in cor di nuttata, senza canti di ghjaddu, senza chjocchi di campana, senza trattori, senza campagnoli chì tirani brioni, natura ùn hè. Chì a natura, in Corsica, era umanizata, fatta à a misura di l’omu, da l’omu.

 

Ci sarani sempri pà ‘ssi lochi paisani è campagnoli, omini è donni capaci à dì : « eiu sogu di quì, quì ci sò nati è ci sò morti i me maiori, quì sò i lochi mei » ? Ciò chì da sempri hà custituitu a noscia individualità, parsunalità, i nosci casati, i nosci nomi, cugnomi, l’accentu ch’eddi vistiani i paroli à tempu francu i labri, à pocu à pocu, si sguassa, di pettu à l’uguaglianza prumossa ed imposta in l’universu ch’eddi ci imprumettini. St’ambraschi, st’animi forti, intrevi, indumevuli, chì pupulavani è davani vita à u cutidianu paisanu, oramai sò missi for da u mondu com’edd’hè oghji, di i tutti pari, lazzu, biotu, umulugatu, umbullitu, frollu, arrigulatu da codici frusteri : i media, u cunsumu… Chì beddu beddu, tutti quanti accunsintimu à l’imperu soiu, senza mancu più risista.

 

Eppuri, quantu sarani ed eiu u prima, à divvi chì quì ci si stà bè, ch’edda scorri tranquilla è dolci a vita, chì l’aria hè bona, chì a natura pari sempri d’essa quidda, chì cù u pocu si faci l’assai, ma chì di fatti a ghjenti ùn si cunnosci più comu s’usava à fà in i tempi d’innanzi, chì fà, ùn si pò fà tanti cosi, chì ùn si capisci più tantu comu si righjirani i cosi. D’altrondi, ad affaccà ed à capulà, ci n’hè troppu, quantu ùn preti ni pò binadì, o un merri arrighjistrà par annantu à a so lista, tandu comu fà da cunnosciasi tutti ?

Infini semu intruti in quistu anunimatu chì da longu tempu l’emu invidiatu à l’abitanti di i grossi cità di cuntinenti.

Ancu puri l’impiigati di mirria t’ani u so da fà à sapè di qual’hè u tali è ind’eddu stà di casa. In tempu d’alizziò, v’affaccani certi chì mai s’erani visti. Ma a parsona, scritta, hè scritta po. Vò dì ch’edda ci stà in I Peri, fussi in piaghja, fussi in paesi. Ma mai s’hè vista. Ùn ci cunniscimu più. Bisogna à dì ch’edda ùn veni più à fassi cunnoscia a ghjenti. Ci sò, ma altru nimu a sà… D’altrondi, quantu sò oghji à stà è à travaglià ind’eddi sò nati ?

 



 

Haute Gravona

 

 

 

Cuscenti ch’edd’hè pà mora l’antica cultura di u cumunu, a campagna cù l’agricultori, a campagnalità cù i vechji paisani, dicisu hà a stituzioni (C.T.C., Cunsigliu ginirali, C.A.P.A., Parcu Righjunali di Corsica…) di turrà à difinì, o inveci d’invintà usi è nomi novi. Or dunqua quiddi lochi, vutati in anticu à a vita campagnola venini travistiti da denuminazioni amministrativi, chì à spessu si poni riducia in una sigla, via in pochi lettari più dicitoghji.

Hè cusì chì s’usa C.A.P.A. pà mintuvà citadini, rurbani è paisani in una sola è unica difinizioni, quandu chì si dicia Aiacciu, Cinarca, Mizana, Gravona, Prunelli. Ùn si dici più Cèlavu, chì più nimu lu sà ‘ssu nomu : diti inveci « Haute Gravona ». I lochi oramai chjoccani in arechji di quiddi chì ci stani, màsimu i ghjovani, com’è nomi strani, esotichi, inauditi, com’è mastacciati in calchì lingua straniera, una di ‘ssi lingui ch’edda s’intesta à insignalli a scola. Or dunqua, scumparisci u paisaghju quandu turremu incapaci à numinallu.

 

Ùn diti più Bucugnanu, inveci, diti Bocò ; San Bè inveci di U San Benedettu…

 

Eccu pà i tuponimi i più cunnisciuti, quiddi di i vaddi, di i paesi, di l’antichi pievi. Ma sò dinò à cintunari, quant’è rena, sposti in quà è dà, da i plasmadori chì fecini u locu è di deti u so sensu sputicu. Quiddi nomi suminati da ramintacci chì quì, s’era arradicata una cumunità d’omini è di donni faccindosi chì scarpillinoni a natura à a sumiglia soia.

 

Tucchemu u puntu chì i lochi è i so nomi novi framanti torrani astrazzioni ; campagni, paesi, vaddi, rialità umani, storichi è giugraffichi vechji di parechji seculi, più, ma statistichi in anticipiu : quantu populazioni, quantu tunnillati di muddizzu, quantu suvvenzioni, quantu chilometri di strada…

 

Mancu pari d’affannassi a ghjenti di u lucali. È fà è fà, à truvacci u so torracontu sò l’aletti, in prima locu da fassi cunceda u cusì bramatu titulu di « vice-président » di a C.A.P.A., eppo i pochi impiigateddi da scumparta da quinci è da quandi, da sgrunchjà u mutori di u clanisimu à a malavia…

 

« Mais c’est pour mieux revivifier l’intérieuuur ». L’internu ! Iè ma di chì « internu » si tratta quì ? Vi pari ch’edd’esistissini sempri cità è paesi, piaghja è muntagna, cù a soia l’idintità sputica ? À mè nò. Ed hè mortu par bè u vechju cuntrastu trà urbanità è campagnalità. U locu chì ci stà à l’intornu ùn senti nè di cità nè di campagna : hè un pataffiu custruitu, senza gherbu nè unità, una zona srigulata, priva di cunfini pricisi chì si cumencia cù u centru museificatu d’Aiacciu è si cumpiaria cù i cimi di u parcu naturali.

 

A campagna, a muntagna, beddu beddu diventani lochi di gudimentu. Sò torri un paisaghju da metti in mostra à citadini corsi o frusteri à l’oziu è sradicati. Sò u dicoru maravigliosu di un passatu chì ci piaci à fallu ghjucà com’è nantu à calchì scena, un passatu ridutu à poca robba è ammansatu avali chì l’emu tagliatu i sanni. A campagna è a so cullana di paesi ùn hè più a raprisintazioni simbolica di quiddu tempu d’innanzi chì mora ùn mori mai ; fendula entra in u spaziu rurbanu, a campagna anch’edda hè torra mercia.

 

Sò lochi dundi, adimissa a regula di ‘ssu seculu, tuttu devi vena valurizatu è custituitu in robba patrimuniali atta à a visita di i piligrini in short, baretta è sciaretti : una ghjesgia, una cappedda antica, una stantara, un mulinu, una casa torra, un ponti, u sapè fà di un artighjanu, u pastori è u so brocciu, gosi è cunsumati tal’è quali calchì sacchettu di chips.

È si ni paga u marketing incaricatu di u spuntà di calchì idintità nova nova, tricaticcia è sottu à l’imperu di a moda, à mudillà quiddi lochi, scuseti, quiddu « territoire » o « bassin de vie», sionti i vogli turistichi di u mumentu, accrobranche, parcours aventure nature, canyoning, trekking, via ferrata, ferme-auberge, gîtes ruraux… di vestali ‘ssi lochi cù i panni di un passatu chì forsa ùn hè esistutu mai.

 

U spaziu nosciu, quiddu campagnolu, quiddu paisanu, ùn si cunfaci più cù u tempu prisenti. Bramemu a mudernità, bramemu di avè, di goda tutti piaceri, ad un tempu, senza facci tanti dumandi. Una mudernità chì ci paria alluntanata chì basta, prumessa à i metropuli cuntinintali ed avali ci scitemu ed eccula quì, par istrada, in i magazeni, à a televisò, in i casi nosci.

Semu abbacciacati, sbaurditi. Comu fà altru nudda in quistu mondu nurmalizatu, arrigulatu, comu fà po quandu chì tuttu pari listessu : magazeni, panni, cibu, televisiò, sciali, ghjenti ? Comu fà quandu ‘ssu nosciu locu torra à assumigliassi à qualivoglia fussi u locu in u mondu ?

 



1. In Corsica, à a fin di u 2004 erani 6 290 ad avellu toccu u Rmi, vali à dì 39 parsoni sopr’à 1 000 abitanti d’ità 20 à 64 anni (31 ‰ in cuntinenti). I Rmisti sò 4,6 % di a pupulazioni d’ità menu cà 65 anni (4,1 % in Francia).

 

2. In u 2004, cuntava a Corsica 11 800 parsoni à tuccà l’ASV (allucazioni in soprapiù di vichjaia). In u 2004, ‘ssi soldi erani dati da i casci di ritirata da cumplittà i rivinuti di i parsoni d’ità 65 anni è più.

In Corsica, quiddi chì ricevini ‘ssi soldi sò 227 sopr’à 1 000 abitanti. ‘Ssi sciffri supareghjani bè bè quiddi di u cuntinenti (53 sopr’à 1 000 ). Fonti Insee.

 

Commentaires