Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

Caotidianu (1)

Marceddu

 

 

 

Ecculu quì, ammanitu è gratisu u me ultimu libru chì vinarà publicatu da a casa editrici Cismonte è Pumonti/Matina Latina. Sarà prupostu in virsioni bislingua. Par avali lighjareti u testu in a so virsura corsa. Ch’edda vi pudissi metta in brama sta littura, da ch’è vo cumpressiti i nosci libri, in libraria o nantu à u blog di Cismonti&Pumonti. 

 Tiniti à menti : accorrini i venditi da favvi scopra autori è libri novi… è libari.


***

 

 

À quiddu chì si farà dumandi...


 

Quali semu duvintati ?

 


 

À rombu di dilla, sarà ancu vera chì ni semu à a coda : lingua, usi, cridenzi, pratichi paisani, campagnoli è campagna, sò à u ruveddu… tuttu cuncorri à dacci razza di sintimu apucaliticu. Iè, pari ch’e no fussimi ghjunti à a fini. Macari si sà, ùn morini micca i sucità umani chì ùn ani nè tarmini nè principiu ; si scrivini eddi in un cuntinuu storicu dundi ritorni ùn ci n’hè è chì si cumpiarà à tempu à l’umanità.

Dunqua mutemu cultura. Vogliu dì di manera d’essa, di cumpurtacci cù i pari nosci, di pinsacci è di capì u mondu à l’intornu…

Agguantati da l’universu glubalizanti, semu custretti à vesta i panni di un’umanità nova, o vulella o ùn vulella. Scambiemu liveddu. Sò morti par bè i picculi sucità pianisgiuli, fatti à misura d’omu, di storia, locu, lingua, riti, cultura, unichi è cumuni, in l’alzà di a sucità di l’individuu fattu à milliardi, di l’avvinti scemi è di a cumpitizioni in perpetuu. Iè, semu cambiati : a ghjenti hè quì, ma i nosci l’attività, ci chjudini, u tempu nosciu u vutemu à a suddisfazzioni di u piaceri parsunali è basta, ùn ci aiutemu più trà no, l’idea di u cumunu hè guasgi cà sminticata. Sò spapersi i famigli, donni è omini vivini da sè in u suspettu di l’altru, i vechji sò numarosi è sbaurditi, i ziteddi fughjini u veru pà u virtuali. Viti pizzulati, fatti à stondi, à quandu si stà quì, à quandu si stà culà, veni mali à arradicassi in un locu, à fà soiu u locu, à cunnosciasi, versu utulitaristu è parsunali di l’esistenza prumossu da u cunsumu rè à tutti impostu.

Viulenza, sulitudina, miseria è benistà à fiancu à fiancu, spesi adduppiati à l’iper, corsi tonti è murtali in vittura è u soldu torru diu.

Tutti st’elementi cuncorrini in unu sistema.

Un mondu intazzatu, affittatu, spiccatu, lucali ed in un tempu glubali, in una razza di gran tuttu chì ci veni mali assai à cogliani u sensu.

 

A sprissioni a più putenti parchì a più impalpabili di ‘ssa mudernità, hè u ritmu di a vita noscia, sta mossa dritta dritta voltu un altrò oramai ammanitu in un lampu. Hè u ritmu, iè, u ritmu di a noscia vita, chì hè statu scatabuttatu più cà più, à tempu à a noscia manera di viva. ‘Ssa riflissioni meia sopr’à a mudernità, a vita in paesi, in i zoni periferichi è rurbani di Corsica, ci palesa u mondu com’è no u ci figuremu oramai.

L’urbanizazioni di i maneri di viva è d’essa, a teledipindenza, a retadipindenza crescini i brami, i vogli, di tutti quanti i Corsi, citadini è paisani. Sò forzi chì cunducini, senza ch’è n’avissimi cuscenza, à muti fondi fondi chì ani impostu una vita suciali, o piuttostu una vita dissucializata inveci di l’abitudini chì funi i nosci, fin à pocu, in quant’è populu. L’eguisimu di i cità, à pocu à pocu, si runzica i campagni.

‘Ssu fenomenu, pà mè, altru cà acculturazioni ùn si pò chjamà : un prucessu surnionu chì scambia, ogni ghjornu di più, a manera ch’è n’aviami di cumpurtacci, trà no. È quandu ci n’avvidimu, mezi cà abbambanati è sturduliti, sò stati calpighjati i punteddi culturali, privi di u sensu soiu è d’ogni cuntinutu.

Ùn sarà pò micca quissa l’alienazioni ?

 

Semu stati chjappi da ‘ssu mondu quandu chì cridiami di francaccila.

St’ultimi trent’anni è più di utupia naziunalista ani alzatu muri di vetru da a Corsica à u Cuntinenti, infini, cusì ci paria. Veni à dì chì l’undati malavaghji chì si sparghjiani in altrò, masimu in Francia, ùn a li faciani à riugna i spondi nustrali o casu mai ci ghjugnissini, firmavani debbuli troppu da incausà qualivoglia fussi dannu. Cusì l’emu criduta. Eccuci à l’entri di u vintunesimu seculu, dopu à a trafalera ideulogica, murali caghjunata da l’ammazzeri trà clandistini è u peghju chì ci facia tema paura si trova cunfirmatu…

 

Una sucità vìttima è à tempu reia, rispunsevuli di i so malanni, una sucità strappazzata da u fora, ma chì si saria fracicata da l’indrentu, distrutta da vulè propiu. Una sucità d’essari chì pata, ùn si poni più pata, chì tutt’ugnunu si tira in daretu, accuntintendusi di u so qualtantu da sopraviva è basta. Semu ghjunti à u segnu di ùn fidacci più di nimu.

Una sucità di l’omu chì ùn cerca di cunnoscia l’omu, di l’omu chì odia l’omu. U nosciu mondu, a noscia terra ch’e cridiu aparta, fraterna, curiosa di sè stessa è di l’altri, colma à spiranza, manu à manu, s’hè arritruita, inchjustrata quandu chì i media è u cunsumu glubalizatu ci davani l’illusioni falsa di l’universali. Semu prighjuneri di u caotidianu. Urfagni di cultura, quidda cultura ch’è no sapiami noscia.

Ùn mi criditi micca ? Hè vera chì pari ancu stupenti postu chì tuttu ferma à l’usu di nanzi, ma acquistendusi un versu novu novu.

 

Dunqua ùn scumparimu micca in quant’è Corsi, scambiemu in modu radicali à tempu à quidd’altri populi, pupulazioni, cumunità chì ci stani à l’intornu. Ed hè propiu quì ch’edda si ni stà a dumanda : comu ghjugna à dì un mondu chì saria pà nascia ? Comu fà da visticà i segni atti à palisà u sconciu, i scundesi o inveci l’assestu novu di a sucità ?

 

Da dì tuttu quistu, mi ferma a discrizzioni è basta, postu ch’e sogu incapaci in veru à davvi qualvoglia fussi spiicazioni. Postu ch’e ùn possu dì parchì, aghju vulsutu dì comu.

Tandu hè quì ch’e pongu u sguardu, sopr’à i nosci viti, a voscia, a meia, da pruvà à discriva ciò ch’è no semu torri, ciò ch’è no semu in via di turrà aval’avà, à u cuntattu strettu di a materia incandescenti di u cutidianu.

Mancu cercu di sapè in chì manera ni semu ghjunti quì, in u caos di u prisenti. Sò dumandi chì certi ci ani risposti aghjà o pruvarani à rispondaci dinò.

Di fatti, u meiu u travagliu s’assumigliaria à calchì studiu etnulogicu, ma privu di dimarchja scentifica è sughjittivu assai.

Un’etnulugia di u cutidianu dunqua, un cutidianu in mossa perpetua, un contra rumanzu di a rialità inturbidita.

Ma comu fà po ? Discriva sì, ma discriva chì, à quali, indù ?

 

 

Marceddu Jureczek

Commentaires