Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

Pourquoi t’entêtes-tu à écrire dans cette langue ? (3)

Marceddu


fascia(libri3)

Accittà soldi o ùn accittà soldi di a C.T.C. ?

 

Eccu a dumanda ch’e mi facciu ‘ssendu in puntu di fà escia un antru libru di meiu. Eccu u dilemma nosciu. Si pudarà cheri soldi (à l’usu aiuti pà a publicazioni, a pruduzzioni culturali…) à u puteri, senza o vulella o ùn vulella, ceda una parti di a so autunumia ? Hè propiu ciò chì veni à tarnalammi ‘ssi pochi tempi.

 

Chì l’edizioni Matina Latina/Cismonte & Pumonti, s’eddi ghjugnini à publicà, s’eddi à li facini à fà senta u so versu, diversu è criticu assai à li volti, hè parvia di u dinaru datuci da a Cullittività Tarrituriali di Corsica. Fin’ad ora, u puteri ferma « disintarissatu ».

 

 Bisogna à dilla, mai ma mai ùn ci hè statu impostu di tacia certi cosi, d’ammutuliscia certi analisi appuntu di a sucità corsa, di mutà versu via. U puteri, è mancu mi premi quì di sapè u so culori puliticu, hè statu manilargu pà a cultura, masimu pà l’edizioni. Ùn andeti à creda chì vulissi fà calchì panegericu o lampà calchì loda à u tali o à u tali. In i cundizioni ch’è no cunniscimu, cù pochi littori, cù pochi lochi di spachjera, pochi venditi è rendita misera, ‘ss’aiuti ch’e dicu sò una campa.

 

U mondu di l’edizioni, di a cultura si n’impippa, anzi tuttu hè impresa cummirciali è basta. A ci facini sapè abbastanza i librarii chì à spessu di i libri nosci ùn ni voni senta nomu è accorri l’arti finazzata di u diplumaticu da falli entra in magazenu (è chì esistenza avariani tandu casu mai i ricusesini eddi ?) sti publicazioni nosci. In Corsica, i libri ùn torrani riccu à nimu, infini ùn sò micca l’autori à arricchisciasi. Tandu, comu fà senza aiuti ?

 

Hè u paradossu maiori : a litteratura d’oghji (mintuvà, possu mintuvu dinò a musica… chì tantu riveni uguali) hè figliola di u riacquistu sittintescu, di a critica di u puteri, d’ogni puteri, di l’indiatura, di u rivoltu è di a libartà di cuscenza. Ma si stà u fattu chì oramai, salvuni uni pochi di furtunati, à si sfranca nimu da i soldi di u puteri.

 

U puteri devi firmà neutru in tuttu, macari s’è l’opari u poni pugna. Ogni artistu hè nutritu da i cundizioni suciali, pulitichi ed estetichi di u mondu dund’eddu si movi. Comu voglia fussi, ‘ssu retrupianu tuttu quantu, altru cà cumpariscia in i soi i scritti ùn pò, presu u casu di a litteratura.

 

Or dunqua, semu sempri à sicutera. Accittà o ricusà ? Metta u capu in a sacchetta è firmassi muti o dassi à i brioni (è turrà inauditi) ? Certi a devini ancu veda cusì a scelta. Eiu nò. U mondu mai s’hè righjiratu sionti a regula di u manicheisimu.

 

Eppuri, quantunqua libaru, u criatori ferma nantu à a ziglia calda. Ch’eddu vinissi un puteri rispituosu pocu è micca di a cuscenza d’ugnunu, in cerca d’allisceri, tandu, a scelta sarà quidda da veru. Di fatti, u più chì bisogna à tema, sò i pastoghji chì in capu ci mittimu da par no.

 

Marceddu Jureczek

Commentaires