CRERGU IN L'OMU

Marceddu

11 avr. 2008

Crergu in l’Omu…
Parch’eddu porta in lu so fondu
Altri cosi cà eddu stessu

Crergu in l’Omu
Parchì in fondu à eddu stessu
Hè muvimentu di vita…

Crergu in l’Omu,
Parchì sà cumpona
Parchì sà accoglia è ligà amicizia,
Cù u vicinu, criendu a fratiddanza
È l’omi di dumani.

Crergu in l’Omu,
Parchì sà porghja una manu
È ch’eddu si sà custruiscia, circhendu sempri
À cunnosciasi.

Crergu in l’Omu,
Parch’eddu si sà trapassà,
Puntatu da u soffiu di u Santissimu.

Crergu in l’Omu,
Parchì un ghjornu,
I so ochji si aprani al dilà
Di u sguardu pà mughjà
U patimentu è a spiranza,
È infini scuprendu anch’eddu
Ciò chì hè di tena caru.

Crergu in l’Omu,
Parchì sà sarrà l’ochji
Pà cunnoscia u lumi…
Parchì l’Omu hè spiritu
È pruvucheghja u tempu è u spaziu infinitu.

Iè, crergu in l’Omu,
Parchì hè incontru è ch’eddu tissarà punticeddi
Di spiranza.

Crergu in l’Omu
Parchì da ogni tempu
Hè un locu d’Amori.

Petru Squarcini hè natu in 1969. S’edd’hè cutulesu di casata, i so radichi l’hà dinò in u Borgu, u quartieru pupularu d’Aiacciu. Mistieru n’hà fattu cent’è ondici è oghji, faci l’accolta di a ghjenti à u culleghju Arthur Giovonni d’Aiacciu. Omu rettu, di a parola ghjusta è assinnata, si dà di pocu à a scrittura.

Commentaires