TRADIMENTU

I tempi nosci sò beddi cà strani.

Strana quidda ghjuventù addulurata chì piegni è signozza da sopr’à a salma di u patronu d’Apple quant’è ch’eddu fussi statu calchì novu John Lennon o ancu puri un antru Martin Luther King.

Strani quissi altri ghjuvanotti è ghjuvanetti chì, accampendu piazzi è viali, da New York à Madrid, bramani ch’eddu si ni cadissi u capitalisimu.

Strani, beddi cà strani i tempi nosci, quandu chì i Stati, cusì ludati trè anni fà, comu soli atti à sortaci da a crisi di tandu, sò oghji addibuliti, indibitati, intustati, è missi à u ruveddu da impresi è banchi glubalizati senza più frenu.

Ancu più cà strani quiddi nosci puliticanti è capistati amiricani, francesi, tideschi, o inglesi, chì stancà,  ùn si stancani d’avvigna capitali è rughjoni è chì à manu à manu, sò in cerca di un mandatu novu, senza chì ci fussi stampa di prughjettu, ma cù à daretu, i contrapartiti, accaniti è spruvisti d’idei novi.

Strani i tempi nosci, strani, quandu chì un’idea di sulidarità vechja di sissanta anni è più, l’Auropa, chì ci duvia parà da ogni guai, da ogni sciagura, si ni sfraia da cima in fondu.

Or comu fà ? Mancu si pò appellanni à u privatu. A ci ani fatta capiscia i grossi impresi ed altri gruppi finanziarii dundi era u so intaressu : cuntinuà, cuntinueghjani à ammassà binifizii sprapusitati, ma ùn arricarani varun risposta à u malessa glubali.

I sindicati ed altri« partenaires sociaux », s’accuntentani di « journées d’action » è « d’accompagnement des plans sociaux ».

È l’intillituali mi diciareti ? Chì ci ferma in Francia di quidda bedda tradizioni di l’intillituali ? Poca robba di fatti . Ciò chì parmetti à un vechju risistenti di scuzzulalli è di turralli à a risa cù u so « Indignez-vous ! ».

Stranu ùn hè, ma Benda parlava aghjà di quiddi « cleri » ch’aviani barattatu i valori universali (l’omu, a virità, a ghjustizia) inveci di causi particulari ed ideulogichi.

Sartre, fendu tiuria di l’impegnu ideulogicu, hà minatu di piola in  u muru aghjà beddu cà sfraiatu di l’universalisimu di i valori.

In a lita chì l’uppunia à Sartre à tempu publicatu L'Homme Révolté, Camus facia riprovari à quiddi intillittuali "chì altru cà spona u so carrigonu in u sensu di a storia ùn ani fattu." Incalcava dinò cù st’ "intillittuali burghesi chì cercani di espià a so urighjina , ancu puri in  cuntradizzioni sulenna è viulenti cù a so intillighjenza." Cù quista a critica, era Sartre ad essa toccu, Sartre chì udiendu a so classa di nascita s’era lacatu a libartà in dispartu, da sguassà in sè stessu ogni traccia di "burghesu", in adurazioni assuluta pà quidda filusufia "fatt’è lestra" di u materialisimu storicu.

In quant’è à George Orwell, à quiddi intillituali "di salottu" i disprizzava più cà più, tal’è quali à Sartre ch’eddu turrava à a penta ceca cugnumendulu da "baudruche." St’intillituali quì pigliani pussessu di u sucialisimu pà esista in quant’è uppunenti ideulogichi è basta è cù un appittitu di puteri sprapusitatu.

Dici Orwell chì, a "manca muralizatrici", suddesfa d’edda stessa è di i so idei, appronta i vii di u tutalitarisimu.

È facini laudazii pà u righjimu di Castro, è si fermani in adurazioni di pettu à a « Rivuluzioni culturali » di Mao, è si rallegrani di u Cambogia « libaru » da i Kmeri rossi, è sustenini à Massoud com’è ch’eddu fussi statu calchì veru prutettori di u drittu di i donni…

Ci arreca a noia da tantu ch’eddu s’allonga u listinu di i soi i fali. Ma mancu una volta po i sintareti sprima ùn fussi un suppulu di rimorsu, oghji chì hè oghji, quandu chì part’è più di st’anziani trutskisti è mauisti si tenini sempri posti di primura in u mondu di i media, di a cultura è di a pulitica.

Puri puri, lucicava sempri a fiaccula di a tradizioni intillituali universalista cù « cleri », di prima trinca è franchi da u spiritu di partitu chì si pisoni di pettu à l’inghjustizia è a bucia, in tempu di l’invasioni di Budapest, cù Albert Camus, in tempu di i turturi in Algiria cù Raymond Aron, Jean-François Revel, Pierre Vidal-Naquet, Susanne Citron...

È dopu, da prupona una critica di a sucità cunsumarista è mediatica cù Jean Baudrillard, Guy Debord, Jacques Derrida, Gilles Deleuze, Pierre Bourdieu, Jean-Claude Michéa…

Oghji, pari ch’è no fussimi à u dismenu. Pari chì a catiguria di l’intillituali avissi cunnisciutu in Francia una razza di « scunsacrazioni ».

Basta à veda ciò ch’edd’hè torru u nobili statutu di filosufu in preda à quiddi « nouveaux philosophes », BHL, Glucksmann, Bruckner, Onfray, Finklelkraut. Mancu à dilla, à eddi sì chì si vedini è si sentini, a si sani fà valè in l’arghja mediatica, u locu maestru dund’eddu si faci a lotta pà i  simbuli è a duminazioni di l’animi. Ma a vittoria soia hè vana, vittoria di a maghjina sopr’à u cuncettu, di a forma sopr’à u fondu.

Ancu puri u puteri puliticu l’hà capita bè è strabè quissa : hè avvezzu Nicolas Sarkosy à invitalli à L’Elisée, ma scrittori, ma storichi, ma circadori, ma accademisti, ma filosufi…

Tutti quanti si poni vantà di cuttighjà u prìncipi è forsa di ghjugna macari à influenzallu ; parò, in a lotta pulitica fendusi, Nicolas Sarkosy a sà ch’eddu si ni pò ghjuvà di ‘ssi "leaders d’opinion" com’eddu i mintuva eddu  cù disdegnu.

Hè ciò chì Raymond Aron discrivia cù finezza com’è "u passaghju di a cuscenza libara à a schiavitù vulintaria".

Stranu ùn hè, chì a storia si cumpiacessi à facci ghjucà un’antru volta cosi visti. Com’è à l’epica trà i dui guerri mundiali, pari ch’è no campessimi un’antru « tradimentu di i cleri ».

Tandu, quali ci ferma, da arricà stampa di sensu à ‘ssa crisi di civilizazioni ? nimu ?

Di fatti, da scugnurà u malessa mundiali, in u mentri ch’eddi si fessini senta, o ch’eddi ùn firmessini più inauditi, « veri » intillituali, da cannà u bughju pagnu di u prisenti, bisogna à turrà à leghja l’auguri di u passatu :

« Une civilisation qui s’avère incapable de résoudre les problèmes que suscite son fonctionnement est une civilisation décadente.

Une civilisation qui choisit de fermer les yeux à ses problèmes les plus cruciaux est une civilisation atteinte.

Une civilisation qui ruse avec ses principes est une civilisation moribonde ».

Aimé Césaire, Discours sur le colonialisme, 1955.

Marceddu Jureczek