NÈ CAPU NÈ CODA

Ci vole à dì ch’ellu capisce per aria

Chì hè cioncu cum’è una campana

È puru ellu sì chì e cappia scusgite

Hè una fralleppula à u tirà di e rete

Porta di fola in canzona à ognunu

Perchè parla di u più è di u menu

È stà cum’è a capra nant’à a panca

Si crede figliolu di a gallina bianca

Vultulà u mezu mondu si primura

Chì per forza o per amore hè sicura

Ma l’estru in caterochju ùn l’avia

Girà e sette chjappelle solu vulia

Face issu omu orechja di mercante

Storie di tutte e mamme ne sà tante

Per vulè esse di l’emme ellu ne hè

Forse e caghja in l’acqua à tè à mè

Ma spessu ellu esce da u suminatu

Perchè pratende esse natu amparatu

Po à bocca in telaghju ferma ellu

Chì ci era ghjattu sott’à u mantellu

Ùn ne sorte mancu in castagne cotte

Stu persunagiu hè in un mare di latte

È poi chjachjare à u ventu ne conta

Quandu chì batte e furagne ellu canta

Vole parlà cum’è un libru stracciatu

Po stà una manu nanzu è l’altra daretu

Ma a sà ch’ùn sò muntagne à spianà

L’imbusche sò in u saccu quessa a sà

Solu stà indù l’inforse è hè mal conciu

Di sti versi ùn ne femu un cuncistoriu

Acqua in bocca ete scupertu a pignatta

Stefanu Pergola hè un ghjovanu pueta chì insegna a lingua corsa in Bastia. Natu in Balagna è di sterpa vinachesa. A scrittu assai in i rivisti isulani. A so prima racolta di puisii, Or provu hè sciuta in u 2006.