I SUNADORI

Marceddu

16 mai 2008

Di Castiglione, San Gavinu,
Di Pastricciola o Sermanu
Lu valsu era di razzinu
Incù qualchì sonu stranu
A chì lu so viulinu
Cetra o ghitara in manu

Pocu à pocu si sò cambiati
Li strumenti i più anziani
Ma u baddu di i frati
Risunava notti sanni
Pariani scatinati
Cù u paghjolu i paisani

Filippone Rocchi

È in Rusiu un ziteddu
Sunava à l’usu nustrali
Cuntradenza o saltareddu
Fendu baddà senza mali
Valsuvienna eppò currentu
Filippone, chì talentu !

Pò Giacometti è Turchini
Sin’à ghjornu erani intesi
Stacchitati è viulini
Sott’à li lampioni accesi
Lu baddu era senza fini
In piazza di u paesi

Di Guelfucci u calori
Infiarava a quadriglia
Cù a riverbula, ori è ori
Di Marcellu, chì maraviglia !
Versi vechji à l’unori
Polca, mazurca in famiglia

Quì vicinu à stu cantoni
Sunava u gran’ Giudicelli
À l’ascolta di i so soni
Ghjuvanotti è damiceddi
Si pigliavani a via
Quidda di Santa Lucia

Natalellu u sunadori
In Pastricciola rinumatu
È chì campava pastori
La banda s’avia lasciatu
Par fà baddà tantu mondu
Luntanu di u so circondu

Coddaccioni di u Pughjali
È ancu li scunnisciuti
D’architati infirnali
È di noti ben’isciuti
Cun Achili è li Colonna
Facini l’arechja bona

Ma si morini li versi
Li trincati sò stranieri
È li sunadori persi
Di a so rubaccia sò fieri
O Casalta, o Pazzoni,
Datili puru lizzioni

Sunemi la Giardinera
Lav

andaria è Manfarina
Cù lu garbu è la manera
Pà a ghjenti baddarina
Palisemi senza fatica
La nostra sunata antica

Tucchendu à paghju li cordi
Trà dui bichjer’di vinu
Chì rinascini l’accordi
Di l’anticu viulinu
“Scutiscia” senza tracassu
“Sciangedama” eppo “à spassu !” Dopu Cena (Toccu di ballu, Aiacciu, 23/06/2006)

Ghjuvan Micheli Weber, stitutori in a Meza Via, Taviracciu di u paisolu di l’Acqua Longa, hè anzi tuttu un omu di a terra è a puisia soia ni teni muscu è sapori. Musicanti attalintatu, maestru di u viulinu sunatu à l’usu corsu, hè statu cù parechji à l’iniziu di u gruppu cantarinu I Voci di a Gravona. Oghji, raconti è puisii i publicheghja in i rivisti isulani, Avali, U Taravu, Le Journal de la Corse. A so prima racolta puetica, À Meza Via, hè sciuta in u 2006.

Commentaires