U DIRRASCU

(Ill., Orozco, Luta)

Suldatu d’issu mondu

Parti altiera,

Suvu arradicatu in i tenebri

À nutriscia u lamaghjonu chì s’infilza meza frasca,

Allacia è stringhji rami,

Da cocia à u soli di u mali

Fiuritu vìa lu bè

Chì s’opponi, si mischia, cambia

S’anniedda è chjarisci

In u cuntrastu di a materia

D’acqua lugeri

È di tarra impulvarita

In u rispiru di l’aria

Esalata in un focu

Di vita è di morti

Annassati in u suffiu d’un’ energìa

In a matricia vegetali

Umiliata da a roba è u ventu

Tribbulata da l’acqua

Ma mossa vìa a tarra tralasciata,

Adunita à u caò

Chì imbruglia a vita

Firita in a carri di l’omu

Chì u so dirrascu l’adunisci à U Tuttu

È l’energìa d’un ventu d’un fiori.

 


Lisandru Muzy, duttori in infurmatica di l’Università di Corti, circadori à u CNRS, t’hà 29 anni. Pueta attalintatu è ricunnisciutu, l’hè statu cuncessu cù u so sicondu libru in puisii, In i me ochja, u premiu di u libru in lingua corsa di a Cullittività Tarrituriali di Corsica pà u 2006. A so prima racolta puetica, I sonnia agaresi, hè sciuta in u 2002.