UNA NOTTE

Bughja è negra hè la notte

Cù lu fretu par cumpagna

Chjose sò tutte le porte

Chì babbu hè in campagna

Longa hè la vita à vene

Fatta di strazii è di pene

A casa face silenziu

Dura hè stata la ghjurnata

Di fatica ognunu hè saziu

S’arriposa la casata

Longa hè la vita à vene

Fatta di strazii è di pene

I letti si sò impiuti

Di fiati assirinati

Di calori benvinuti

Dormenu l’appena nati

Longa hè la vita à vene

Fatta di gioia è di pene

U riloghju ticchiteghja

I strapzzi sò luntanu

Affacca lu sonniu à veghja

Cù le so spiranze in manu

Longa hè la vita à vene

Fatta di gioia è di bene.

 

Ghjuvan Santu Plasenzotti, stà in Lozzi di Carghjese. Hè prufissori di lingua è cultura corsa in Aiacciu.