MAMMAPIERA

Tinnarezza di casa

Par mai ùn ni patiani


È i maestri di scola


Eddi ùn ni cunnisciani

Di ghjornu è di notti


Surrisi ùn ni faciani


Erani i ziteddi


Di tutti i suffrimenti

Pagati pocu è micca


Sgubbavani in silenziu


Fastidiu passaghjeru


Di i nostri cuscenzi

A so vita i maiò


L’aviani calcicata


Fendu ni schiavi manzi


Era vituparata

Zitiddina fughjita


À l’alba marturiata


È noi ùn li vidimi


Da l’africa à i Merichi

Granitula suffrenti


Porghja una manaredda


Da chera una limosina


Da stantà si un pezzu

Ognighjornu ind’à noi


Affacca a Mammapiera


Lacaremi strappà


Di i levi a catena

È vedi a miseria


Accasassi in paesi ?


Ad ora è a contr’ora


Ci tocca à ramintà

Chì l’unicu valori


Chì cunveni à parà


Hè quiddu di l’umanu


Hè a so dignità.

Paulu Zarzelli (†2010)

Illustrazioni di Albert Eckhout