Overblog
Editer l'article Suivre ce blog Administration + Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

Pourquoi t’entêtes-tu à écrire dans cette langue ? (4)

Marceddu


 Da cuntinuà in u filu di l'ultima cronaca, senza tema riprovari, ghjudizii ghjunti da in altu o scaccani ch'eddi fussini, ghjustu da arruttà u pinsamentu meiu...

 


Comu sarà ch’eddu piacessi o dispiacessi unu scrittori ? Sarà par via di u so stili, di a manera soia ed unica d’incrucià paroli da cumpona maravigli di frasi ? Sarà ancu forsa par via di u so pesu mediaticu, di i panni ch’eddu vesti ? O sarà tandu par forza di ciò ch’eddu scegli di scriva, di ciò ch’eddu pensa ? Vi hè capitata mai di ammirà unu chì scrivi, ma d’idei privu, par via di a so patrunenza di a lingua ? À mè nò.

 

A penna hè una pena è ancu un impegnu. Quiddu chì scrivi, quiddu chì dicida à mumentu datu di passà ori è ori à l’infora di u mondu, spiccatu , in un esiliu di poca durata ma di vulè propiu, da scumbatta cù l’idei è i dimonii soi, ùn si pò, ùn si devi accuntintà di pruducia un’opara d’arti è basta. Quiddu chì scrivi è chì veni publicatu oghji si teni una rispunsabilità tamanta : comu fà po da scantassi quandu a forza parti di l’umanità pati strazii, fami è carramasci ? Comu fà, oghji, à firmassini cioncu è mutu, in Corsica, trà mezu à miseria è nigazioni culturali ? Fighjuleti puri in tondu à vo, eti da cunnoscia ch’e ùn istravecu eiu. D’altrondi, o vulè o ùn vulella, ad ogni opara, ch’edda fussi lebbia quant’eddu si voli, si currispondi una visioni di l’esistenza, macari s’è l’autori ùn hè pronta ad assumala à palesu.

 

Tutti ci n’avvidimu di u mondu com’eddu corri à l’abissu, ma u scrittori a risenti forsa di di più, di modu più acutu è dulurosu assai. Tandu, comu fà à tacia quandu chì l’inghjustizia ci accionca ? Bisogna à impignassi. Impignassi sì, ma patt’è cundizioni di francassila da ogni idea fatt’è lestra, da ogni dogma. U viottulu, sversu è pinosu assai, u ci ani tracciatu aghjà Camus, Orwell, Pasolini, Césaire… a ci ani ditta eddi : in a cerca di u bè è di u veru in a sucità, ci voli di dichjarassi sfidatu à l’ideulugii tutti quanti, bisogna à pinsassi areticu.


Marceddu Jureczek 

Pour être informé des derniers articles, inscrivez vous :
Commentaires
G
<br /> V'ha un problema di fundu i lu palchì li nostri modi di faiddhà e di scrii andani a murì. Semu campendi inn'unu mumentu storicu chi no ha gali in cantu cunnisciutu finzamenti a ogghj. Noi vinimu da<br /> una cultura di sempri ( no solu di seculi... ma da millenni ) chi emu chjamatu "agru/pasturali". In mancu di tret'anni c'emu bucatu chista cultura senza haè videa di dacinni una noa. Abali<br /> cumprindimu chi li nostri lingagghj antichi, primmu che esse fatti di parauli, erani fatti di cosi pa' meddhu cumprindicci a paru. Cosi di dugna dini chi ci passaani nantu a l'occhj, a li mani. I<br /> lu trabaddhu i' li rasgionamenti e li trasfulmaami in allegorii. Chissi cosi di dugna dini so' molti; e a pocu a pocu cu' iddhi si c'è murendi lu nostru faeddu, la nostra linga, Ancora un pocu ci<br /> cumprindimu; tambè eu scriu in gaddhuresu (saldu ) chi è un Corsu Sardizzatu e agghju muttiu di pinsà chi li me frateddhi Cossi possiani ancora apprizià e capimmi i' lu chi dicu. Ma pa' cantu<br /> ancorà ? ... Scriu e faeddu cussì palchì m'agattu cun cantu in cori agghju e addocu ancora di la me pisata. M'eti a di' chi socu un rumanticu ! ... E fossi è veru. Ma in chistu meu faiddhà e scrii<br /> cussì v'è ancora una spiranzia: chissa di l'omu chi torra a esse omu e no lu sciau di lu nuddha a lu cali linn'hani bucatu l'ANIMA. Ed è pal chistu chi c'intestaldimu a faiddhà lu nostru<br /> lingagghju- Un caru abbracciu fraternu a tutti li frateddi cossi da Gigi Angeli<br /> <br /> <br />
Répondre
<br /> <br /> Chì piaceri di scuntratti quì, caru Gigi. <br /> <br /> <br /> Sò i culturi autonumi è pupulari chì venini diruchjati. À tutti, Corsi, Gadduresi, Sardi, Taliani, Francesi, Arabi, chì ùn hè tantu ancora, dispuniani di una cultura, a soia, impastata da seculi<br /> di vita è di mimoria, cù usanzi, riti, ritmi, cridenzi, lingui, in cunsunenzi cù u so campà (chì sariani à criticà ancu quissi, mancu à dilla), li s'imponi un'antra "cultura", standardizata,<br /> utulitarista è vutatu à u cunsumarisimu.<br /> <br /> <br />  <br /> <br /> <br /> <br />
M
<br /> A to manera di lampà u dibattitu à modu radicali mi piaci o Marcè, emu vistu di chì manera si pudia cussì pruvucà i riazzioni è ancu schjarià i punti di vista chì parini addurmintati, ma chì<br /> esistini, beddi diffarenti, nant'à ciò ch'iddu pò essa l'impegnu di l'autori in a literatura noscia.<br /> Puri vurriu dì, micca di l'autori, ma "d'un" autori. Eu quandu ti legu quì ci vicu un disideriu d'affirmà prima a toia a dimarchja di scrittura, è dopu di chjamanni à un impegnu più largu d'altri<br /> scrittori in ghjiru à tè.<br /> T'aghju da dì : in 'ss'ultimu capitulu di a to riflissioni, puri, ùn sò micca l'argumenti "pulitichi" ch'e ritengu. Hè st'idea di a scrittura "in esiliu". Eccu una tematica literaria ch'e trovu<br /> forti, è quantu volti u risentu anch'eu st'esiliu, o 'ssa sulitudina, st'addisperu di pinsà chì u levitu di ciò ch'e mettu à cocia ùn pruduci nudda.<br /> Ghje dicu : ùn ti possu arrisponda annant'à st'affari d'impegnu, hè ghjustappuntu un attu troppu parsunali a scrittura pà currisponda in tuttu à ciò chì tù discrivi quì. Po eu mi lacu scunvincia di<br /> più in più da l'attu di scrittura com'è attu artisticu maiori. Spartu a to passioni pà Orwell, Pasolini, ma fermu di culu cù certi testi (à spissu puetichi hè vera) ch'ùn facini mai chè di<br /> trasfurmà a lingua in mezu di criazioni artistica, mi lacu siducia dinò da un estetica ch'e cridiu allauntanata da mè. Pinsemu solu à Rimbaud o Borges. Chì ci portani d'impegnu (si ni pudaria<br /> discutta ben sicura) ? Ci portani u scrittu com'è elementu forti d'arti mudernu.<br /> Voltu à a literatura corsa. Sciuta da u Riacquistu, mi pari dinò chì a so ricchezza hè in a diffarenza di i boci chì a portani.<br /> Cesari hè da cunsidarà o nò com'è un esteticu putenti di u bughju ?<br /> Ci sarà calchì rispechju di valori di Proust o Borges ind'è Desanti o nò ?<br /> U più bonu Ferrari sarà quissu chì stuzzica l'analisa sucetali o u stilistu raffinatu è putenti ch'iddu hè capaci d'essa ?<br /> Ma sò solu elementi di riflissioni in più, pisti, è tutti sti nomi ch'e docu, rimarcarè ch'iddi si sò dati una mani ancu quandu ci vulia à fà corpu par falla viva, una literatura chì sighi dinò<br /> corsa.<br /> Ma vurriu andà torra versu u to testu : ciò chì tù chjami di i to brami, è chì à u me avvisu esisti, hè una literatura scantata da i vii istituziunali, libara ma pocu cunnisciuta o ricunnisciuta<br /> (prima da i soia). Da u Riacquistu, o da i cumbatti di l'anni nanzi, emu riditatu dinò una burghisia d'intelettuali pocu disidarosi di sparta i so prebandi. Ghjenti com'è tè, com'è mè, o com'è<br /> l'altri ch'aghju mintuvatu, à spissu ani fattu a so strada senza pochi aiuti, ani fattu viva a so criazioni cù uni pochi di cumbatti dinò. Ùn hè micca par dacci una midadda ch'e a dicu, ma parchì<br /> mi pari una rialità.<br /> Tù chì ni pensi ?<br /> <br /> <br />
Répondre
<br /> <br /> S'è di ghjustu o Marcu, ai toccu u segnu ! Mancu à dilla ch'e circavu à pruvucà calchì riazzioni cù 'ssu testu (cù tutti quidd'altri d'altrondi). <br /> <br /> <br /> In prima locu, u 'mpegnu ch'e dicu quì, hè meiu, vali à dì hè a strada ch'e cercu, par avali, di suvità, in a me scrittura. À nimu vogliu ghjudicà, à nimu vogliu turrà à a penta ceca. <br /> <br /> <br /> Ùn basta à piglià dui sdf in i so libri o à mintuvà a parola ad ogni infrasata da essa "impignatu", mancu à dilla è u 'mpegnu si pò è si devi metta à u provu ancu puri vivendu ogni ghjornu.<br /> <br /> <br /> Di fatti, più cà robba di tematica, di scelti stilistichi varii, sò sempri in cerca di un sensu à dà à u scriva. L'impegnu, da mè saria una manera d'arrisponda.<br /> <br /> <br /> <br />