Culandi inghjò

Culandi inghjò 'n a timpesta 

Un' umbra và in a notti 

Troscia, a natura li presta 

Ventu è cotru par aggrotti 

Ùn sapendu ch'ùn li resta 

Solu un' ora da a morti 

Tali un dannatu in battaglia 

Lampa a so ultima forza 

Dananzi ad idda a mitraglia 

Ni senti dighjà i morsa 

L'affibbiarani a midaglia 

È a piinghjarani forsa 

Luntanu da a tragèdia 

I tarcani praputenti 

À pusà nantu à a so sèdia 

Dicìdini pà l'aienti 

O calescia o galèra 

Sacrifichendu nacenti 

Ch'idda si sparghji a so gloria 

Ch'iddi fàcciani u so vantu 

Ch'idda i mintuvi a storia 

Ch'idda ni discorra tantu 

Ùn hè chè quissa a so voglia 

U so urgogliu tamantu 

Pocu impremi i cunsiquenzi 

I morti, i ferti, i malati 

Sarà a so pinitenza 

Parchì sò sacrificati 

Da magnificà a putenza 

Di i so capa adurati 

È circa è voddi è batti 

È torra è punghja di capì 

È si batti è si scumbatti 

Ma u celi ùn hà nudda à dì

Ùn si pò cambià i patti 

U tintacciu devi subì 

Sarà una legi eterna 

Ch'unu sia cundannatu 

Sia mandatu à caternu 

Da chì hè culandi in altu 

À pacà i so sguverna 

Sarà sempri u disgraziatu 

Ghjuvandumenicu TAFANI