PARLANI DI CULTURA

Marceddu

12 avr. 2008

Parlani di cultura
Tutti
Si ni empiini a bocca
È ni parlani bè
Com’è a to voci greva ùn ni sà dì parola
Marchjatu ch’eddi l’ani in coddu
Pistiata di pedi
Insultata da in sù
Ni parlani à bassavvi in coddu
Oghji
Oghji chì ci hè da sparta
È a si facini soia
Ma di tè
Paisanu

Di tè

Quali ni parla più

Saveriu Valentini hè natu u 20 di sittembri 1947 in Sarra di Farru. Pueta, militanti culturali indiatu in u buddori di u Riacquistu sittantescu, cù a so attività di tiatrinu in u filu di Grotowski, Artaud o Brech, hà prumossu un versu fidu à a lingua corsa è criticu di a rialità isulana. Cufundatori di a cumpagnia « Teatru Paisanu » in 1973, hà scrittu, da par eddu o in parechji, U Fiatu, A Rimigna, A Cabbia, Innò, Prima tù, Soli di Ghjunghju… Uni beddi pochi di i soii i puemi sò stati stampati in Rigiru. Hà publicatu dinò una racolta puetica Corsica Nazioni (1975) è unu racontu, A Cunfina (1978). Oghji, faci u ghjurnalistu-reporter di maghjini à France3Corsica.

Commentaires