Overblog Suivre ce blog
Editer l'article Administration Créer mon blog
AVALI avali, a rivistablog primurosa di u spannamentu di a pruduzzioni litteraria corsa d’oghji, ma à tempu locu di baratti è di critica suciali.

IRLANDA 'LLU ME CORI

marceddu




Sfilani da ori è ori i nivulona 'llu mari cilestu
È rozani i mutora 'llu bufonu andaccianu carcu ziffu à robba è à ghjenti frusteri.
Mi scitu da prufondu sonnu par sentalu sfiatulà inchjinendu l'ali à parti manca
prontu ad aparturì u so ventri bumbuciunutu.
Nimu m'hà dittu nudda, nimu mi cuntarà u sbocciu di una tarra.
È quì, labbri stracciata in u sciambaddumu inchjustrinu di l'acqui furiosi;
È quì, pilonu verdu crudu squarratu à cuddetti chjosa appianculati;
È quì, manteddu di maga trapuntatu à lava bianchi.

IRLANDA, o rughjonu di sonniu, indù t'avaraghju scontru prima di oghji ?
In prima nascita forsa ?
Scopri u to pettu à li so basgia, omu frusteri, ed empii i to pulmona à ventu marinu.
'Ssu locu ùn s'assumidda à nisciun'altru;
Eccuti quì a tarra matri, l'utima bornia 'llu mondu anticu;
Citadinu prissatu, capinaffaracciatu, ùn andà più in dà. Poni i to passi stanchi in i so andani pitricosi è i to ochja frusti annant'à i so prati fiorallinzulati trinnicati da l'eterna svintiddola.

Ùn fà nisciun rimori chì posca tribbulà i spirita di casa. Vidarè t'hà da rinchera.

Urganettu è viulinu 'lli musicanti paciaghji ch'andeti ghjirandulendu i paesa, suneti, suneti senza mai arrichità.
Canteti a suprana billezza, a dolci miseria di 'ss'isula verghjini.
Annant'à ugni pinziu ghjaci un casteddu sfraiatu; à l'assaltu 'lli so alti muraddi codda cù stridi spavintosi, di l'acciddumu a maestosa tormia.
Basta un chjoccu di campana par vedali pisassi à cintunari, ali bianchi stinzendu à casti l'aria infiarata da la prima spiriata 'llu pallidu soli.

Fiera IRLANDA, isuledda strappiddata, pistiata à secula da l'inglesu pidiatu, firita da tanti offesi è afflita da tanti disgrazii; quandu vinarà quiddu ghjornu biniditu ch'iddi cumpiarani di carriassi à capimondu i galeri veli imbuffati di l'esiliu, l'ossa 'lli to fiddoli, u levitu 'lla to razza, quandu vinarà quiddu ghjornu...


Riverbula 'llu vaccaghju fischendu in a pianura amiricana chì mai và à tuccà fini, dammi tistimunianza di tamanta dissanguinata ed amara scunciatura.

Fimineddi irlandesi visi pichjulati salteti in baddu ch'e viga annant'à i vosci spaddi nudi tacchiassi a voscia capiddera culor'di granonu.

È tù, paisanu postu in u to vitturinu à passu lentu, carrighjami in alba malinconica 'llu veranu par i stradona avvinti à muchja bagnadosi chì vani da partuttu è ùn vani indocu suenti l'estru 'llu cavaddinu bragatu.

Apraraghju u catarinu à stanghetti di un campusantu è turraraghju à godami cù strana cuntintezza a paci sempiterna 'lli to croci arruvati cupruliti ad altu fenu.

IRLANDA, tarra urfanedda, a me siconda patria, dumani forsa, scalarà a truvata di l'ariondi insuldati, dumani forsa sarà svirghjinata a to billezza...

Inviniti l'umula è sbarnalita rundinedda scappata in fughjina 'llu cintabugliu 'lli cità tamantoni, u tempu di un sonniu, da annidassi in pettu à tè.






Paulu Susini di a Sarra (a Sarra di Scupamè), hè natu in 1936. Hè un anzianu duganeri in iritirata. Sò stati publicati i so puemi, part'è più prosi puetichi di versu liricu, ind'è Rigiru.

Commentaires