AD ASGIU

Seti “stressati” ? Sempri à corra da quinci è da quandi ?

Bramariati di arrichitavvi par pinuchja ? Di cuntistà u cultu di a vitezza ?

Quantu vi capiscu.

Ma andà contr’à l’idei cumuni hè quantu à vulè spianà i monti, à zappà in acqua, via hè cosa impussibuli. D’altrondi, ci saria da chì à fassi chjamà da areticu o peghju, tontu cannatu senza tantu arbitriu.

Dunqua, vi tocca à pata a cruda tirania di l’iduli di u panteonu di a dea vitezza. Teleffunini invispiti chì bisogna ad aguantalli senza tricà tantu in quali voglia

fussi u locu è u mumentu, vittura, cabinetti, lettu ; l’urdinatori, l’internet,

i mail, u chat, i msm, chì ani mandatu via l’anticu modu di cumunicazioni trà amichi cari fermasi à stassini alluntanati ; a televisiò (a beatissima santissima televisiooooooò !) chì riduci l’infurmazioni à un “flash” d’uni pochi di minuti, ripitutu à l’infinitu, in un flussu cuntinuvu buliendu fatti d’alta primura è dati qualunqua ad una para, senza arricà ùn fussi stampa di sguardu criticu da nutrì a riflissioni di chì fighjula ; a stampa chì più và, più s’accortani l’articuli cù a scusa di i littori torri tranchji troppi da leghja righi è righi ; i filmi di sinemà indù si tacchieghjani arrabbiati i maghjini cù sempri di di più fretta ; u fast food chì vi faci pangrussonu in quattr’è trè setti ; un urchestru giappunesu chì hà arrighjistratu una virsioni di a Quinta Sinfunia di Beethoven più corta di cinqui minuti à pettu à l’urighjinali ; a Bibbia oramai pruposta à l’usu “light” da leghja in 100 minuti…

Sò tutti quanti l’indizii di a malatia chì culpisci a noscia sucità materialista dundi benistà è bundenza venini cunfusi. L’esistenzi nosci sò colmi à robba vanochja. Ma ci dumandaremu à li volti chì scopu t’avemu ? Quandu chì prima ci vulia ori è ori da accimà un travagliu pinosu è fastidiosu, oghji u ci abbughjemu in una cappiamanata. Nanzi si misuravani in ghjorni è sittimani i viaghji, oghji in ori. È in u mentri, di ‘ssu tempu guadantu, chì si ni faci ? Comu sarà ch’eddu ci sfughjissi com’è rena in tramezu à i diti u tempu ? È tuttu ‘ssu tempu risparmiatu, ‘ssi stondi accuzzati, chì ni femu po ? Circhemu di fà trè cosi à tempu !

Quantu volti ‘ssa sittimana aveti incalcatu l’acciliratori, vituparatu a vittura innanzi à vo da ch’edda vachi più prestu, surpassatu senza mancu riguardu à chì ghjugnia di fronti ?

Quantu tempu pinseti d’avè vintu, pigliemu l’asempiu, da Pitretu à Aiacciu ? Un pugnu di minuti, vistu i cundizioni di u stradonu è u trafficu. È di ‘ssi priziosi minuti, chì n’avareti fattu tandu ? Seti ghjunti à impiccicavvi in l’ingorghi aiaccini. Una cosa hè certa : cù ‘ssi pochi minuti, di custruttivu ùn si faci nudda è nienti. Si torra à risponda à u teleffuninu, à imbufalisciasi da nanzi à a televisiò, à mandà mail inutuli… U risultatu : cresci u stress, cala u piaceri d’essa insemu. Ùn avemu mancu più tempu d’incrucià dui pinsamenti da fanni sbuccià un terzu, di leghja, di raghjunà in cumpagnia.

Si sbagliava u bè d’Orwell. L’amicacciu Big Brother ùn ci surveglia micca. Teleffuneghja, canta è badda à a televisiò, manda cintunari di mail sporchi. S’impegna Big Brother à intrunacci i ciarbeddi ad ogni ora di ghjornu è di notti. Faci di modu à divertaci vitanda. Cerca d’accampà i menti nosci. Cusì, si perdi u filu di a creatività. Cusì divintemu minucci ingordi mai techji di maghjini, soni, tutti quanti stimuli da custrignaci à u cunsummu. Incù robba cumpagna, mancu più accorri d’essa survigliati. In menti chì vi ferma po ? Altru cà tuntii ùn ci hè. Arritruitasi l’imaghjinazioni, culunizati i menti, a parsona ùn hè più minaccia pà a sucità stabilita.

‘Ss’andatura nova ancu pà a lingua pò essa dannifica.

Sò pà scumparì sprissioni nustrali com’è ‘pianament’è bè’, ‘ad asgiu’, ‘à vacari’, ‘pian pianinu’, ‘à l’oziu’, ‘à tempu persu’…

Feti attu di risistenza : spigniti u teleffuninu, sbrancheti urdinatori è televisiò, lacheti a vittura in garasgiu. Andeti à tiravvi dui passi, à veda a billezza di l’abrugata, à senta l’armunia di i petri zuccati in un muru, à rispirà a purezza di una mani d’aprili.

Marceddu Jureczek